ក្រសួងអប់រំ នឹងពិចារណាលើសំណើដាក់បញ្ជូលកីឡាល្បុក្កតោ ក្នុងកម្មវិធីសិក្សា

កីឡាជាតិ

ជាតិ

ក្រសួងអប់រំ នឹងពិចារណាលើសំណើដាក់បញ្ជូលកីឡាល្បុក្កតោ ក្នុងកម្មវិធីសិក្សា

05, Sep 2015 , 3:34 pm

រូបភាព

ដោយ: ថ្មីៗ

ក្រសួងអប់រំ យុវជន និងកីឡា នឹងពិចារណាលើសំណើដាក់បញ្ជូលកីឡាល្បុក្កតោ ក្នុងកម្មវិធីសិក្សាថា្នក់វិទ្យាល័យ សម្រាប់យុវជនក្រោយ របស់គណៈកម្មាធិការជាតិអូឡាំពិកកម្ពុជា ។ លោក សាន គឹមស៊ាន ប្រធានបណ្ឌិតសភាល្បុក្កតោកម្ពុជា យល់ថា ការដាក់បញ្ជូលកីឡាល្បុក្កតោក្នុងកម្មវិធីអប់រំ គឺជារឿងល្អមួយ ដែលអាចឲ្យយុវជនជំនាន់ក្រោយជួយផ្សព្វផ្សាយនឹងការពារអត្តសញ្ញាណជាតិ។

អនុរដ្ឋលេខាធិការក្រសួងអប់រំ លោក ប៊ូ ជុំសេរី បានបញ្ជាក់ថា ក្រសួងអប់រំនឹងពិភាក្សាគ្នាដើម្បីពិចារណាលើ សំណើរបស់គណៈកម្មាធិការជាតិអូឡាំពិកកម្ពុជា ក្នុងការដាក់បញ្ចូលកីឡាល្បុក្កតោ ក្នុងកម្មវិធីសិក្សានៃថ្នាក់វិទ្យាល័យ ដើម្បីឲ្យយុវជនជំនាន់ក្រោយជួយថែរក្សាវប្បធម៌និងមរតកក្បាច់គុនបុរាណមួយនេះ។ តែយ៉ាងណាអនុរដ្ឋលេខាធិការក្រសួងអប់រំរូបនេះ មិនទាន់អាចបញ្ជាក់ពីការសម្រេចនេះនៅពេលណាឡើយ។« ខ្ញុំបានឃើញសហព័ន្ធបានស្នើខ្ញុំ ប៉ុន្ដែមិនទាន់បានពិនិត្យពិចារណាគ្នានៅឡើយទេណា ចាំទាល់តែយើងធ្វើការប្រជុំពិភាក្សាគ្នាសិន។បើសិនជាយើងដាក់បញ្ជូល យើងនឹងដាក់ចូលក្នុងកម្មវិធីអប់រំ ក្នុងម៉ោងកីឡា»។ នេះជាការបញ្ជាក់របស់លោក ប៊ូ ជុំសេរី ដែលទទួលស្គាល់ថា កីឡាល្បុក្កតោកំពុងរីកចម្រើន។

លោក សាន គឹមស៊ាន ប្រធានបណ្ឌិតសភាល្បុក្កតោកម្ពុជា ដែលជាស្ថានិកក្នុងការរៀបចំក្បាច់គុនល្បុក្កតោ ឲ្យមានការរីកចម្រើននាពេលបច្ចុប្បន្ននេះ យល់ថា ការដាក់បញ្ចូលកីឡាល្បុក្កតោចូលក្នុងកម្មវិធីអប់រំ គឺជារឿងល្អមួយ ព្រោះការដាក់កីឡាល្បុក្កតោក្នុងកម្មវិធីអប់រំនេះ គឺអាចឲ្យយុវជនជំនាន់ក្រោយបានយល់ បានដឹងកាន់តែច្បាស់ ជាពិសេសជួយផ្សព្វផ្សាយនឹងការពារអត្តសញ្ញាណជាតិផង។ លោក សាន គឹមស៊ាន ជឿជាក់ថា បើសិនជាដាក់បញ្ចូលកីឡាល្បុក្កតោចូលក្នុងកម្មវិធីអប់រំមែននោះ កីឡាល្បុក្កតោនេះគឺមិនអាចបាត់បង់នោះឡើយ ។

ហើយលោក សន្យាថា នឹងខិតខំរៀបចំឯកសារល្បុក្កតោបន្ថែមទៀត ដើម្បីទុកឲ្យយុវជនជំនាន់ថែរក្សាមរតកដូនតាមួយនេះ។ ប្រធានបណ្ឌិតសភាល្បុក្កតោ ដែលតែងតែព្រួយបារម្ភខ្លាចបាត់បង់កេមរតកល្បុក្កតោនេះ បានបញ្ជាក់យ៉ាងដូច្នេះ៖«ដើម្បីថែរក្សាមរតកល្បុក្កតោនេះបាន ខ្ញុំជឿជាក់១០០ភាគរយ គឺមានតែដាក់បញ្ជូលក្នុងកម្មវិធីអប់រំទេ ព្រោះមានតែយុជនដែលអាចស្នងកេមរតកដូនតានេះ។ ហើយនៅពេលដែលពួកគេទទួលយល់ដឹងពីកីឡាល្បុកតោនេះ ពួកគេនឹងអាចការពារអត្តសញ្ញាណជាតិមួយនេះ នឹងអាចផ្សព្វផ្សាយកីឡាល្បុក្កតោនៅទូទាំងពិភពថាជារបស់ដូនតាខ្មែរ»។

កន្លងមកលោក ហ៊ុន ម៉ាណែត នាយរងសេនាធិការចម្រុះនៃកងយោធពលខេមរភូមិន្ទ ក៏បានផ្តួចផ្តើមគំនិតដើម្បីនាំយកក្បាច់គុនល្បុក្កតោខ្មែរទៅបង្ហាត់នៅក្នុងជួរកងទ័ព។ ហើយនៅពេលនេះលោកកំពុងធ្វើការងារនេះជាមួយសហព័ន្ធកីឡាល្បុក្កតោកម្ពុជា ដើម្បីរៀបចំកម្មវិធីហ្វឹកហាត់។

រដ្ឋាភិបាលកំពុងរៀបចំចងក្រងឯកសារកីឡាល្បុក្កតោនេះ ដើម្បីដាក់បញ្ចូលជាបេតិកភណ្ឌពិភពលោកដែរ ។ លើសពីនេះរដ្ឋាភិបាលក៏នឹងដាក់បញ្ចូលកីឡាល្បុក្កតោនេះ នៅក្នុងការប្រកួតស៊ីហ្គេមនៅឆ្នាំ២០២៣ខាងមុខ ជាពេលដែលកម្ពុជាធ្វើជាម្ចាស់ផ្ទះស៊ីហ្គេមនេះ។