វាសនាជនភៀសខ្លួនក្លាយជាយ៉ាងណា បើអឺរ៉ុបដាក់របងលួសពេញព្រំដែន?

វិបត្តិជនភៀសខ្លួនហាក់ដូចជាមានភាពធូរស្រាលក្នុងរយៈពេលខ្លី ក្រោយពីប្រទេសនៅអឺរ៉ុបភាគច្រើន បានប្រកាសទទួលយកនិងផ្តល់សិទ្ធិជ្រកកោន។ យ៉ាងណាមិញវិបត្តិនេះ បានផ្ទុះសារជាថ្មី និង កំពុងក្លាយជាប្រធានបទចម្រូងចម្រាសក្រោយពីរដ្ឋមន្ត្រីសហភាពអឺរ៉ុប បានបរាជ័យក្នុងការអនុម័តលើកិច្ច ព្រមព្រៀងដើម្បីជួយសម្រាលបន្ទុកគ្នាក្នុងការទទួលជនភៀសខ្លួន។ ពេលនេះ ជនភៀសខ្លួន កំពុងឈរ កកស្ទះនៅតាមបណ្តោយព្រំដែនប្រទេសអឺរ៉ុបមួយចំនួន ដ្បិតព្រំដែនដែលធ្លាប់តែចូលដោយសេរី ត្រូវបានឡោមពទ្ធ័ទៅដោយបន្លាលួសជ្រោងច្រោះ។ ជាពិសេសនោះ រដ្ឋនៅសហភាពអឺរ៉ុប កំពុងតែរុញច្រានគ្នាទទួលយកជនភៀសខ្លួនទៅវិញទៅមក។

លោក មុំ ពិទូរ្យ លម្អិតព័ត៌មាននេះ

មកទល់ពីនេះ ច្រកព្រំដែនប្រទេសអឺរ៉ុបមួយចំនួនកំពុងតែកកស្ទះដោយសារតែមានជនភៀសខ្លួន ជាច្រើនកំពុងតែព្យាយាមលួចចូលទៅក្នុងតំបនអឺរ៉ុប ដែលបច្ចុប្បន្នកំពុងតែដាក់បន្លាលួសពាសពេញ ព្រំដែន។ ក្នុងនោះ ហុងគ្រី បានចាប់ផ្តើមមុនគេក្នុងការបង្កើតច្បាប់ថ្មី និងថែមទាំងប្រកាសតំបន់ដែលមានជនភៀសខ្លួនច្រើនក្នុងភាពអាសន្ន ដើម្បីរឹតត្បិតទៅលើជនភៀសខ្លួននិង ជាពិសេសដើម្បីកាត់ទោសទៅលើជនភៀសខ្លួនដែលចូលប្រទេសហុងគ្រីដោយខុសច្បាប់។

បញ្ហាជនភៀសខ្លួន មិនមែនទើបកើតឡើងកាលពីពេលថ្មីៗនេះទេ តែវាបានកើតឡើងក្នុងរយៈពេល ប៉ុន្មានឆ្នាំចុងក្រោយនេះ ពោលគឺវាបានផ្តើមនៅពេលដែលប្រទេសនៅតំបន់មជ្ឈឹមបូព៌ា មួយចំនួនបាន ធ្លាក់ចូលក្នុងសង្គ្រាមហើយបង្កើតឲ្យមានសង្គ្រាមស៊ីវិលក្នុងស្រុក។ ចុងក្រោយប្រជាជនក្នុងតំបន់ត្រូវ ផ្សងព្រេងដើម្បីស្វែងរកទីសម្រាប់ជ្រកកោន។ ប្រជាជនជាច្រើនបានស្លាប់តាមទូកនៅក្នុង សមុទ្រ មីឌីទែរ៉ាណេ ហើយអ្នកមានជីវិត អាចបន្តដំណើរមកកាន់អឺរ៉ុបដើម្បីសុំសិទ្ធិជ្រកកោន។ យោងតាម របាយការណ៍របស់ភា្នក់ងារជនភៀសខ្លួនអង្គការសហប្រជាជាតិ (UNHCR) ជនភៀសខ្លួន ដែលកំពុង មកកាន់អឺរ៉ុបភាគច្រើនគឺមកពីតំបន់សង្គ្រាមដែលរួមមានស៊ីរី អឺរ៉ាក់ និង អាហ្វហ្គានីស្ថាន។

តាមពិតទៅសភាពអឺរ៉ុប មិនសូវសប្បាយចិត្តប៉ុន្មាននោះទេនៅពេលដែលឃើញមានជនភៀសខ្លួន រាប់ម៉ឺននាក់ បាននាំគ្នាសម្រុកចូលទៅកាន់តំបន់អឺរ៉ុបនោះ។ ជាក់ស្តែង កាលពីប៉ុន្មានខែមុននេះ សហភាពអឺរ៉ុប បានអនុម័តលើបទបញ្ញត្តិមួយដោយបញ្ឈប់នូវទូកដែលដឹកជនភៀសខ្លួន និងបញ្ជូន ពួកគេទៅកាន់ប្រភពដើមវិញទៀត។ ជាពិសេសនោះ សហភាពអឺរ៉ុប បានចាត់វិធានការដើម្បីតាមកម្ចេចទូកដែលដឹកជនភៀសខ្លួនផងដែរ។ យ៉ាងណាក៏ដោយ ក្រោយពីវិបត្តិជនភៀសខ្លួនបានផ្ទុះឡើងខ្លាំងជាថ្មីកាលពីចុងខែសីហា និង ដើមខែកញ្ញានេះ សហភាពអឺរ៉ុប បានរងនូវការរិះគន់ និង បន្ទោស ច្រើនពីសហគមន៍អន្តរជាតិ។ ហើយ ចង់ ឬ មិនចង់ បណ្តុំនៃប្រទេសអ្នកមានទាំង២៨ ត្រូវតែបង្ខំចិត្ត ដើម្បីទទួលយកជនភៀសខ្លួន ព្រោះនេះជាកាតព្វកិច្ចអន្តរជាតិ។ យោងតាម UNCHR ប្រទេសអឺរ៉ុបប្រាំដែលបានទទួលជនភៀសខ្លួនច្រើនជាងគេរួមមាន អាល្លឹម៉ង់ បារាំង អង់គ្លេស អ៊ីតាលី និង ស៊ុយអែត។

ដើម្បីជាការជួយសម្រាលបន្ទុកលើការទទួលយកជនភៀសខ្លួន រដ្ឋមន្ត្រីសហភាពអឺរ៉ុប បានបើកកិច្ច ប្រជុំដើម្បីកំណត់កូតាជនភៀសប្រមាណ១២០០០០នាក់ ដែលបានមកដល់អ៊ីតាលី ក្រិក និង ហុងគ្រី កាលពីថ្ងៃចន្ទ័កន្លងទៅនេះ។ យ៉ាងណាក៏ដោយ កិច្ចព្រមព្រៀងនោះ បានបរាជ័យ ពីព្រោះមានការជំទាស់ពីរដ្ឋមួយចំនួនរួមមាន ហុងគ្រី សាធារណៈរដ្ឋឆែក ស្លូវ៉ាគី និង ប៉ូឡូញ។ ក្តីព្រួយបារម្ភរបស់រដ្ឋទាំងនេះ គឺពួកគេនឹងត្រូវចង់ភ្ជាប់កាតព្វកិច្ចនៃការកំណត់កូតាជនភៀសដែលអាចលើសពីលទ្ធភាពដែលគេអាចធ្វើបាន។ ជាលទ្ធផល ហុងគ្រី បានចាប់ផ្តើមមុនគេក្នុងការបង្កើតច្បាប់អន្តោប្រវេសន៍ដើម្បី រឹតត្បិត ទៅលើជនភៀសខ្លួនដោយដាក់ពន្ធនាគារ និង ចាប់បញ្ជូនទៅវិញចំពោះជនភៀសខ្លួន។ កាន់តែធ្ងន់ធ្ងរនោះ គឺតាមព្រំដែនដែលតែងតែចេញចូលដោយសេរី ត្រូវបានបំពាក់ទៅដោយបន្លាលួសជាច្រើន។ លើសពីនេះទៅទៀត ប៉ូលីសហុងគ្រី បានចាប់ផ្តើមប្រើផ្សែងឧស្ម័ន និង បាញ់ទឹកទៅលើជនភៀសខ្លួនដើម្បីឲ្យចាកចេញពីតំបន់ព្រំដែន។

ក្នុងនោះ ហុងគ្រី ក៏បានបិទព្រំដែនជាប់នឹងសើបប៊ីផងដែរ ហើយថែមទាំងបញ្ជាក់ទៅកាន់ក្រុមជនភៀសខ្លួនទាំងនោះ ថាគួរតែទៅរស់នៅក្នុងប្រទេសសើបប៊ីដែលមានសន្តិសុខពេញលេញសម្រាប់ពួកគេ។ ជុំវិញបញ្ហានេះ ប៉ូឡូញ និង ហូឡង់ ក៏កំពុងតែ រៀបចំវិធានការដូចទៅនឹងហុងគ្រីដែរ។ យ៉ាងណាក៏ដោយ ចំណាត់ការទាំងអស់ខាងលើ ត្រូវសមាជិកអឺរ៉ុបមួយចំនួន ផ្សេងទៀតរិះគន់ថាខុសទៅនឹងចក្ខុវិស័យរបស់អឺរ៉ុប ហើយ លោកស្រីអធិកាបតី Angela Merkel បាន កោះប្រជុំកំពូលបន្ទាន់នៅសហភាពអឺរ៉ុបដើម្បីពិភាក្សាលើបញ្ហានេះជាថ្មី។ សម្រាប់ជនភៀសខ្លួនវិញ ក្រោយពីហុងគ្រី បិទព្រំដែន ពួកគេត្រូវស្វែងរកច្រកផ្សេងទៀតរបស់ប្រទេសអឺរ៉ុបដែលមិនទាន់ មានការរឹតត្បិត៕