អគ្គនាយកដ្ឋានគយ និងរដ្ឋាករកម្ពុជា ប្រាប់ឲ្យពលរដ្ឋប្រយ័ត្នមុនទិញរថយន្តទៅប្រើប្រាស់

ជាតិ

សេដ្ឋកិច្ច

អគ្គនាយកដ្ឋានគយ និងរដ្ឋាករកម្ពុជា ប្រាប់ឲ្យពលរដ្ឋប្រយ័ត្នមុនទិញរថយន្តទៅប្រើប្រាស់

17, Oct 2015 , 11:40 am

រូបភាព

រូបភាពពីនាយកដ្ឋានគយ និងរដ្ឋាករកម្ពុជា

ដោយ: ខន ចំប៉ា

អគ្គនាយកដ្ឋានគយ និងរដ្ឋាករកម្ពុជា បានចេញសេចក្តីជូនដំណឹងមួយកាលពីថ្ងៃទី១៦ខែតុលា ដោយបានប្រាប់ឲ្យប្រជាពលរដ្ឋគ្រប់រូប ឲ្យពិនិត្យលក្ខណៈបច្ចេកទេសឲ្យបានច្បាស់លាស់ មុននឹងសម្រេចចិត្តទិញរថយន្តមុននឹងសម្រេចទិញរថយន្តមកប្រើប្រាស់។

ការដាសតឿនរបស់អគ្គនាយកដ្ឋានគយ និងរដ្ឋាករកម្ពុជា គឺដើម្បីចៀសវាងការទិញប៉ះចំរថយន្តកាត់ត។ រថយន្តកាត់ត ដែលអាចបង្កឲ្យអ្នកប្រើប្រាស់ប្រឈមនឹងគ្រោះថ្នាក់ជាយថាហេតុ និងអ្នកធ្វើចរាចរណ៍តាមដងផ្លូវជាមួយគ្នា ព្រមទាំងធ្វើឲ្យខូចខាតហេដ្ឋារចនាសម្ព័ន្ធសាធារណៈ ។ មិនត្រឹមតែប៉ុណ្ណោះការទិញរថយន្តកាត់ត ក៏ធ្វើឲ្យប៉ះពាល់ដល់យុទ្ធសាស្ត្រកៀងគរចំណូលរបស់ក្រសួងសេដ្ឋកិច្ច និងហិរញ្ញវត្ថុផងដែរ។

បើតាមអគ្គនាយកដ្ឋានគយ និងរដ្ឋាករកម្ពុជា ការប្រាប់ឲ្យប្រជាពលរដ្ឋប្រយ័ត្នប្រយែងនេះ គឺព្រោះតែកន្លងមកមានជនខិលខូចមួយចំនួនបានលួចនាំចូលរថយន្តកាត់ជាកំណាត់ៗ ដោយបន្លំថាជាគ្រឿងបន្លាស់រថយន្ត រួចយកមកផ្គំដំឡើងក្នុងស្រុកខុសលក្ខណៈបច្ចេកទេសនៅតាមបណ្តាយានដ្ឋានក្នុងរាជធានីភ្នំពេញ និងខេត្តក្រុងមួយចំនួន។

អគ្គនាយកដ្ឋានគយ និងរដ្ឋាករកម្ពុជាបានបញ្ជាក់នៅក្នុងសេចក្តីជូនដំណឹងថា រថយន្តទាំងអស់នោះត្រូវបានលក់ឲ្យអ្នកប្រើប្រាស់ដោយមិនបានបំពេញកាតព្វកិច្ចពន្ធ និងអាករ ព្រមទាំងគ្មានស្លាកលេខសម្គាល់ ពាក់ស្លាកលេខក្លែងក្លាយ ឬបន្លំស្លាកលេខដែលល្មើសទៅនឹងច្បាប់ស្តីពីគយ ច្បាប់ស្តីពីចរាចរណ៍ផ្លូវគោក និងក្រមព្រហ្មទណ្ឌ។ ជាមួយគ្នានេះដែរ កាលពីពេលថ្មីៗនេះ សមត្ថកិច្ចបានរកឃើញបទល្មើសប្រភេទនេះ ហើយបានធ្វើការបំផ្លាញចោលផងដែរ៕