ពីនេះ ពីនោះ
តើគោលនយោបាយពិតជាអាចអនុវត្តន៍បានភ្លាមៗ ឬយ៉ាងណាសម្រាប់បក្សមួយ?
× សកម្មភាពឃោសនា សកម្មភាពចុះជួបប្រជាពលរដ្ឋ គេតែងតែឃើញអ្នកនយោបាយបង្ហាញពីគោលនយោបាយ និងផ្ដល់ការសន្យាជូនប្រជាពលរដ្ឋថាខ្លួននឹងធ្វើឲ្យបាន នៅអ្វីដែលជាគោលនយោបាយសំខាន់ៗដែលបក្សខ្លួនបានកំណត់ ពេលដែលខ្លួនបានអំណាចទៅដឹកនាំប្រទេស។ ក៏ប៉ុន្តែនៅក្នុងក្រសែភ្នែកប្រជាពលរដ្ឋតែងតែមើលឃើញថា ការនិយាយ ការសន្យាទាំងនោះគឺគ្រាន់តែជាពាក្យកុហកបោកប្រាស់ ព្រោះមិនឃើញអនុវត្តន៍បានភ្លាមៗតាមអ្វីដែលពួកគាត់ត្រូវការ។
ក៏ប៉ុន្តែប្រជាពលរដ្ឋគឺត្រូវតែតាមដាន និងស្វែងយល់ពីភាពខុសគ្នារវាងគោលនយោបាយ និងការធ្វើនយោបាយឲ្យបានច្បាស់លាស់ ពេលនោះសាធារណជននឹងលែងមានចម្ងល់ និងលែងមានការវិនិច្ឆ័យខុសតទៅទៀត។ នៅពេលដែលគេនិយាយពីគោលនយោបាយគឺគេសម្ដៅដល់ផែនការ ឬចំនុចអត្ថិភាពដែលគណបក្សនយោបាយនីមួយៗរៀបចំឡើង ជាចំនុចគោលដែលត្រូវតែទៅដោះស្រាយនៅពេលដែលខ្លួនបានទៅកាន់អំណាចរដ្ឋ។ ចំណែកការធ្វើនយោបាយគឺផ្តោតទៅលើសកម្មភាពរបស់អ្នកនយោបាយ ថាត្រូវធ្វើដោយសកម្មភាពបែបណា មានព្រឹត្តិការណ៍បែបណា និងយុទ្ធសាស្ត្រក្នុងការធ្វើនយោបាយបែបណា។
ត្រលប់ទៅមើលពីការអនុវត្តគោលនយោបាយវិញ តើអាចធ្វើទៅបានដោយភ្លាមៗ បន្ទាប់ពីបុគ្គលណាមួយ បក្សណាមួយ ឬក្រុមអ្នកនយោបាយណាមួយ បានទៅកាន់អំណាច ឬមានអាសនៈនៅក្នុងសភាបានឬយ៉ាងណា? ប្រសិនបើសាធារណជនគិតថា ត្រឹមតែ១ឆ្នាំ ២ឆ្នាំ ឬក៏៣ឆ្នាំ អ្នកនយោបាយអាចអនុវត្តន៍ ឬមិនអនុវត្តន៍គោលនយោបាយបាននោះ ការគិតបែបនេះប្រហែលជាការគិតខុសឆ្គងមួយ។ ព្រោះថា ដើម្បីដោះស្រាយបញ្ហាជាតិគឺមិនមែនជារឿងសាមញ្ញដូចការពិភាក្សាក្រុមដោះស្រាយសំណួរចម្លើយគ្រូដាក់ឲ្យនោះឡើយ។ បញ្ហាជាតិគឺជាសំណុំរឿងដ៏ស្មុគស្មាញ ជាបណ្ដុំបញ្ហា ដែលមិនអាចដោះស្រាយបានដោយងាយ។ ហើយវាមិនមែនជារឿង ឬបញ្ហាដែលត្រូវដោះស្រាយចំពោះតែមនុស្សមួយក្រុមតូច តែជាបញ្ហាដែលត្រូវប្រឈមជាមួយមនុស្សគ្រប់ស្រទាប់វណ្ណៈ នៅក្នុងសង្គម។ ហើយបញ្ហា នីមួយៗសុទ្ធតែមានបែបផែនត្រូវដោះស្រាយ និងដំណាក់កាលនៃការដោះស្រាយ។ ដូចជា បញ្ហាសង្គមកិច្ចថាត្រូវដោះស្រាយបែបណា? ផ្នែកបរិស្ថានត្រូវដោះស្រាយបែបណា? សេដ្ឋកិច្ចដោះស្រាយបែបណា? នយោបាយត្រូវដោះស្រាយបែបណា? នយោបាយការបរទេសដោះស្រាយបែបណា? សន្តិសុខជាតិត្រូវដោះស្រាយបែបណា? យុត្តិធម៌ត្រូវដោះស្រាយបែបណា? ហើយត្រូវមានផែនការយុទ្ធសាស្ត្របែបណា?។ល។ ពេលនោះហើយដែលសាធារណជនគួរកុំរំពឹងថា ពេលអ្នកណាម្នាក់ទៅកាន់ការងារស្រុកទេសអាចដោះស្រាយបញ្ហាជាតិបានភ្លាមៗជាមួយគោលនយោបាយរបស់ពួកគេ។
ក៏ប៉ុន្តែសម្រាប់ករណីដែលមេដឹកនាំ កាន់អំណាចរាប់ឆ្នាំ តែនៅតែបន្តឲ្យបញ្ហាជាតិចេះតែរីករាលដាលកាន់តែធំ កាន់លំបាក នោះគឺវាស្ថិតនៅលើសមត្ថភាពរបស់បុគ្គលទាំងនោះ ចេតនា ឆន្ទៈ និងមនសិការដោះស្រាយបញ្ហាជាតិរបស់បុគ្គលនោះ ហើយក៏ជាពេលដែលសាធារណជនអាចពិចារណាបាន និងវាយតម្លៃបានពីមេដឹកនាំរបស់ខ្លួន៕
© រក្សាសិទ្ធិដោយ thmeythmey.com