ជាតិ
នយោបាយជាតិ
លោក កឹម សុខា ៖ខ្ញុំអត់មានធ្វើអ្វីខុសដូចជាគេមួលបង្កាច់ខ្ញុំទេ
× អនុប្រធានគណបក្សសង្គ្រោះជាតិ លោក កឹម សុខា អះអាងថា លោកមិនមានធ្វើអ្វីខុសដូចការលើកឡើងរបស់រដ្ឋសភានោះទេ។ហើយសារនយោបាយទៅកាន់ប្រជាពលរដ្ឋរបស់លោកកន្លងមក គឺមិនដែលញុះញង់ អុចអាលឲ្យមានសង្គ្រាម ឬអំពើហិង្សាកើតឡើងនោះឡើយ។ ការលើកឡើងរបស់លោក កឹម សុខា នេះគឺឆ្លើយតបទៅនឹងសមាជិករដ្ឋសភាមកពីគណបក្សប្រជាជនកម្ពុជា ដែលបានបោះឆ្នោតដករូបលោកចេញពីតួនាទីអនុប្រធានទី១ ក្រោយហេតុផលថា សារនយោបាយរបស់លោក កឹម សុខា ជារូបភាពញុះញង់ និងធ្វើខុសពីតួនាទីអនុប្រធានទី១នៃរដ្ឋសភា។
ឆ្លើយតបទៅកាន់រដ្ឋសភាទៀតនោះ លោក កឹម សុខា បន្ថែមថា រាល់ពេលដែលលោកចុះតាមមូលដ្ឋាននិងថ្លែងសារនយោបាយជាមួយប្រជាពលរដ្ឋ គឺលោកប្រើតួនាទីជាតំណាងរាស្ត្រ និងតំណាងមតិភាគតិចក្នុងរដ្ឋសភាតែប៉ុណ្ណោះ ពោលគឺមិនមែនជាតួនាទីអនុប្រធានទី១រដ្ឋសភានោះទេ។
ថ្លែងនៅក្នុងកិច្ចសម្ភាសជាមួយវិទ្យុអាស៊ីសេរីកាលពីថ្ងៃទី៣០ តុលា អនុប្រធានគណបក្សសង្គ្រោះជាតិរូបនេះបានបញ្ជាក់យ៉ាងដូច្នេះថា៖មូលហេតុដែលគណបក្សប្រជាជនលើកឡើងនេះគឺអត់ត្រឹមត្រូវទាល់តែសោះ ពីព្រោះខ្ញុំអត់មានធ្វើអ្វីខុសដូចជាគេមូលបង្កាច់ខ្ញុំទេ។ខ្ញុំនិយាយអ្វីតែដើម្បីប្រយោជន៍ជាតិ ប្រយោជន៍ប្រជាពលរដ្ឋក្នុងក្របខណ្ឌជាសង្គមប្រជាធិបតេយ្យ ក្នុងតួនាទីខ្ញុំជាតំណាងរាស្ត្រ ក្នុងតួនាទីខ្ញុំជាគណបក្សដែលមានសំឡេងភាគតិចក្នុងរដ្ឋសភា។ ខ្ញុំមិនដែលប្រើអំពើហិង្សា ខ្ញុំមិនដែលញុះញង់ ខ្ញុំមិនដែលបំផ្លាញទ្រព្យសម្បត្តិជាតិ ហើយខ្ញុំក៏មិនដែលប្រើពាក្យឲ្យមានសង្គ្រាម ឲ្យមានហិង្សាទាល់តែសោះ»។
គណបក្សសង្គ្រោះជាតិ បានបញ្ជាក់ថា ការដកតំណែងលោក កឹម សុខា គឺបង្ហាញអំពីការរំលោភលើកិច្ចព្រមព្រៀងនយោបាយថ្ងៃទី២២កក្ដដា ឆ្នាំ២០១៤ រវាងគណបក្សប្រជាជនកម្ពុជា និងគណបក្សសង្គ្រោះជាតិដែលជាគណបក្សមានអាសនៈក្នុងរដ្ឋសភា។ហើយការដកជារំលោភរដ្ឋធម្មនុញ្ញ ត្រង់ មាត្រា៨៧រដ្ឋធម្មនុញ្ញ។ប៉ុន្ដែរដ្ឋសភាអះអាងវិញថាមាត្រា ៨៧ នេះ ពុំបានហាមឃាត់រដ្ឋសភាកម្ពុជា ក្នុងការផ្លាស់ប្តូរមុខតំណែងប្រធាន ឬអនុប្រធាននៃរដ្ឋសភាឡើយ៕
© រក្សាសិទ្ធិដោយ thmeythmey.com