ពីនេះ ពីនោះ
ជម្លោះនយោបាយរវាង CPP និងCNRP ធ្វើឲ្យអ្នកជំនួញភ័យខ្លាច…
× ក្រោយការបោះឆ្នោតឆ្នាំ២០១៣ វិបត្តិនយោបាយជាប់គាំងជិត១ឆ្នាំ អ្នកជំនួញក្នុងប្រទេសមិនហ៊ានពង្រីកទុនវិនិយោគ ឬមិនហ៊ានបោះទុនវិនិយោគលើជំនួញថ្មីឡើយ។ ដូចគ្នាដែរសម្រាប់អ្នកវិនិយោគបរទេស ពួកគេរារែកមិនហ៊ានបោះទុនវិនិយោគនៅក្នុងប្រទេសកម្ពុជាទេកាលណោះ ពីព្រោះស្ថានភាពនយោបាយមិនអំណោយផល។
តែនៅពេលដែលវិបត្តិនយោបាយត្រូវបានបញ្ចប់ អ្នកវិនិយោគ ទាំងក្នុង និងក្រៅប្រទេសធូរទ្រូងបន្តិច ហើយក៏ចាប់ផ្តើមបោះទុនវិនិយោគឡើងវិញ។ គ្រាន់តែអ្នកវិនិយោគបង្ហាញក្តីសង្ឃឹមឡើងវិញបន្តិច ស្រាប់តែសង្គ្រាមពាក្យសម្តីរវាងគណបក្សប្រជាជនកម្ពុជា និងគណបក្សសង្គ្រោះជាតិកើតឡើងវិញ ហើយជំរុញឲ្យជនមិនស្គាល់មុខវាយដំច្រំទាក់តំណាងរាស្ត្របក្សប្រឆាំងពីរនាក់យ៉ាងដំណំ។
បញ្ហាចុងក្រោយនេះ រឹតតែធ្វើឲ្យអ្នកវិនិយោគពិបាកចិត្ត ហើយមិនដឹងថា តើស្ថានការនយោបាយនឹងប៉ះពាល់ដល់ដំណើរការសេដ្ឋកិច្ចដែរឬទេ? ទីផ្សារអលចនទ្រព្យអាចប៉ះពាល់មុនគេ ពីព្រោះ ទីផ្សារនេះ ទាក់ទងនឹងជំនឿលើផ្នែកអារម្មណ៍ខ្លាំងណាស់។ អតិថិជនមិនអាចបោះប្រាក់ទិញគេហដ្ឋាននៅក្នុងកាលៈទេសៈមិនច្បាស់លាស់នោះទេ។
នៅក្នុងប្រទេសកម្ពុជា អ្នកជំនួញត្អូញត្អែរថា ពួកគេប្រឈមនឹងបញ្ហាច្រើនយ៉ាងដូចជា៖ ទី១ បញ្ហាពុករលួយ។ មន្ត្រីចេះតែនាំគ្នាទារប្រាក់ពីអ្នកជំនួញយកទៅធ្វើនេះ ឬធ្វើនោះ មិនចេះចប់ មិនចេះហើយ។ ទី២ ច្បាប់ខ្មែរប្រែប្រួលលឿនពេក ដូចជាច្បាប់ដីសម្បទានសេដ្ឋកិច្ចត្រូវបានគេកាត់បន្ថយពី៩៩ឆ្នាំមកនៅត្រឹម៥០ឆ្នាំ និងទី៣ បញ្ហានយោបាយ។ ជម្លោះនយោបាយរវាងគណបក្សធំៗចេះតែកើតឡើងគ្មានទីបញ្ចប់។
អ្នកនយោបាយខ្មែរត្រូវបានគេមើលឃើញថា ចំណាយពេលវេលាឈ្លោះគ្នា ច្រើនជាងចំណាយពេលរួមគ្នាគិតដើម្បីអភិវឌ្ឍជាតិខ្មែរដ៏កម្សត់មួយនេះ៕
© រក្សាសិទ្ធិដោយ thmeythmey.com