ពីនេះ ពីនោះ
នៅប្រទេសរំដួល បក្សកាន់អំណាច នៅបង្ខំមនុស្សឲ្យផ្តិតមេដៃទៀត
× ប៉ុន្មានថ្ងៃចុងក្រោយនេះ នៅប្រទេសរំដួល វាក៏បានកើតមានការតវ៉ាបណ្តេញមេគណបក្សប្រឆាំងចេញ ចេញពីតំណែងអនុប្រធានរដ្ឋសភាដូចនៅកម្ពុជាដែរ។ គ្រាន់តែថា នៅកម្ពុជាក្រោយពីសមាជិករដ្ឋសភាមកពីគណបក្សកាន់អំណាចបានបោះឆ្នោត ទម្លាក់អនុប្រធានរដ្ឋសភា ដែលជាអនុប្រធានគណបក្សប្រឆាំង បានជោគជ័យហើយនោះ វាក៏ស្ងាត់ទៅវិញ។
ប៉ុន្តែនៅប្រទេសរំដួលវិញ ប្រធានស្ថាប័នតូចធំ ថ្នាក់ជាតិ ថ្នាក់ខេត្ត ហើយក៏ជាអ្នកបម្រើនយោបាយបក្សកាន់អំណាចផងនោះ បានរៀបចំញត្តិគាំទ្រការបណ្តេញមេដឹកនាំបក្សប្រឆាំងចេញពីតួនាទី អនុប្រធានរដ្ឋសភា ដោយបង្ខំឲ្យមន្ត្រីក្រោមឱវាទផ្តិតមេដៃគាំទ្រ។
មន្ត្រីចាស់របស់បក្សកាន់អំណាចនៃប្រទេសរំដួលកំពុងរាំខុសចង្វាក់ រាំខុសពេលវេលា ហើយក៏កំពុងទម្លាក់ថ្មបាក់ទៅអ្នកបន្តវេនរបស់ខ្លួនដែរ។ នៅក្នុងដំណើរអភិវឌ្ឍប្រទេសរំដួលដ៏យឺតនោះ បក្សកាន់អំណាចនៃប្រទេសរំដួលក៏បានបើកទូលាយនូវលំហប្រជាធិបតេយ្យ ជារួមដែរ។ ពលរដ្ឋនៃប្រទេសរំដួលបានទទួលការអប់រំច្រើនដោយផ្ទាល់ និងដោយប្រយោលពីប្រទេសជឿនលឿន។ នៅក្នុងកំណែទម្រង់របស់ខ្លួន បក្សកាន់អំណាចនៃប្រទេសរំដួលបានជ្រើសរើសយុវជនសម័យទំនើបកាន់តែច្រើន ឲ្យបម្រើរាជការនៅតាមក្រសួងមន្ទីរ។
ផ្ទុយទៅវិញ ការបង្ខំឲ្យមន្ត្រីឲ្យផ្តិតមេដៃគាំទ្រគំនិតរបស់ខ្លួននោះ វាបានទទួលត្រឹមតែភាពស្អប់ និងភាពបរាជ័យនៅថ្ងៃបោះឆ្នោតនៅថ្ងៃខាងមុខតែប៉ុណ្ណោះ។ សកម្មភាពបង្ខំមនុស្សឲ្យគាំទ្រខ្លួនដែលផ្តួចផ្តើមដោយក្រុមមនុស្ស ចាស់ ក៏កំពុងតែដើរផ្ទុយពីសកម្មភាពរបស់ក្រុមមនុស្សជំនាន់ថ្មីរបស់បក្ស កាន់អំណាចនៃប្រទេសរំដួល ដែលកំពុងប្រមូលប្រជាប្រិយភាពតាមគោលការណ៍ស្ម័គ្រចិត្ត ស្មោះត្រង់ និងដោយសតិសម្បជញ្ញៈ៕
© រក្សាសិទ្ធិដោយ thmeythmey.com