ពីនេះ ពីនោះ
វប្បធម៌«មនុស្សពីរនាក់ដណ្ដើមគ្នាដេកកណ្ដាលគួរតែត្រូវបញ្ចប់ហើយ»
× ភ្នំពេញ៖ និយាយពីមនុស្សពីរនាក់ដេកទន្ទឹមគ្នាហើយឈ្លោះគ្នា ប្រកែកគ្នាដើម្បីបានដេកកណ្ដាល គឺពិតជារឿងមួយដែលមិនគួរឲ្យនឹកដល់ថាល្ងង់បែបនោះ។ វាពិតជាគ្មានទេចំនុចកណ្ដាលសម្រាប់ពួកគេទាំងពីរនាក់។ បើនិយាយបែបនេះគេនឹងសួរថា ហេតុអីចាំបាច់និយាយមកធ្វើអីព្រោះគ្មានអ្វីដែលចំលែកនោះទេ។
រឿងដេករកចំណុចកណ្ដាល រវាងមនុស្សពីរនាក់គឺជារឿងដែលសាមញ្ញ មិនគួរនិយាយមែន។ ប៉ុន្តែ ចំណុចកណ្ដាលកន្លែងនេះ គឺចង់សំដៅដល់មនុស្សជាទូទៅតែងតែតាំងខ្លួនជាអ្នកត្រូវ រៀងៗខ្លួន ហើយមិនសូវចូលចិត្តជជែករកហេតុផលដើម្បីរកចំណុចកណ្ដាលនៃបញ្ហាឡើយ។ ចំណែកនៅក្នុងសង្គមបច្ចុប្បន្ននេះគឺ ពិតជាមានទិដ្ឋភាពបែបនេះ ទាំងនៅក្នុងទំនាស់រវាងបុគ្គលនិងបុគ្គល ប្ដីនិងប្រពន្ធ ជាពិសេសគឺនៅក្នុងឆាកនយោបាយជាដើម។ ពួកគេទាំងនោះតែងតែទាមទារថាខ្លួនជាអ្នកត្រូវ ហើយភាគីជម្លោះរបស់ខ្លួនជាអ្នកខុស។ រីឯវិស័យនយោបាយវិញបក្សនេះថាខ្លួនឯងត្រូវ គោលនយោបាយខ្លួនល្អ ហើយបក្សផ្សេងៗគោលនយោបាយមិនល្អ ដូចបក្សខ្លួនជាដើម។ នៅពេលនោះហើយដែលជម្លោះរវាងមនុស្សពីរនាក់តែងតែកើតមាន ស្ថាប័នពីរតែងតែកើតមានមិនចប់ហើយ នៅតែមានគំនុំនិងគ្នា។ ហើយពិបាកទាញទៅរកការវិនិច្ឆ័យមួយដើម្បីកែតម្រូវគ្នាណាស់។
ជាការពិតណាស់មនុស្សទូទៅ តែងតែសូត្រពាក្យមួយឃ្លាថា «គ្មានអ្នកណាម្នាក់ដែលល្អឥតខ្ចោះនោះទេ» គឺត្រូវតែមានខុសនៅក្នុងជីវិត។ ក៏ប៉ុន្តែឃ្លានេះហាក់មិនត្រូវបានយកមកអនុវត្តន៍បានពេញនៅឡើយ ព្រោះថាស្ទើរតែគ្រប់គ្នាគឺតែងតែចាត់ទុកថាខ្លួនឯងត្រូវ ខ្លួនឯងល្អ ទាំងដឹងថាខ្លួនខុសក៏ដោយ នេះជាសារជាតិមនុស្សមួយចំនួនធំ។ ពេលនោះហើយដែលគេអាចនិយាយថាវាពិតជាគ្មានទេចំណុចកណ្ដាលនោះ។ ផ្ទុយទៅវិញអ្នកទាំងនោះត្រូវតែអនុវត្តន៍ឲ្យបានវប្បធម៌ជជែកគ្នារកហេតុផលដើម្បីស្វែងរកតុល្យភាពនៃបញ្ហាឲ្យឃើញក្នុងទិសដៅរស់នៅជាមួយគ្នាដោយសុខសាន្ត ស្វែងរកចំណុចកណ្ដាលធ្វើយ៉ាងណាឲ្យភាគីទាំងសងខាងអាចទទួលយកបាន និងមើលមុខគ្នាប្រកបដោយមនសិការស្រឡាញ់ និងជួយគ្នាជំនួសការឃើញមុខបង្ករកំហឹង៕
© រក្សាសិទ្ធិដោយ thmeythmey.com