លោក ហ៊ុន ម៉ានី ទាមទារឲ្យបុគ្គលដែលភ្ជាប់លោកទៅនឹងករណីហិង្សាវាយតំណាងរាស្ត្រ សុំទោស

ជាតិ

លោក ហ៊ុន ម៉ានី ទាមទារឲ្យបុគ្គលដែលភ្ជាប់លោកទៅនឹងករណីហិង្សាវាយតំណាងរាស្ត្រ សុំទោស

07, Nov 2015 , 4:24 pm

រូបភាព

ដោយ: ថ្មីៗ

អ្នកតំណាងរាស្ត្រ ហ៊ុន ម៉ានី បានផ្សព្វផ្សាយលិខិតចំហមួយនៅថ្ងៃនេះ ច្រានចោលរាល់ការចោទប្រកាន់ និងការព្យាយាមភ្ជាប់រូបលោកទៅនឹងហេតុការណ៍វាយដំអ្នកតំណាងរាស្ត្រគណបក្សសង្គ្រោះជាតិកាលពីថ្ងៃទី២៦តុលា។ តំណាងរាស្ត្រមណ្ឌលកំពង់ស្ពឺ ថ្លែងថា លោកត្រូវបានគេភ្ជាប់ទៅនឹងករណីហិង្សានោះ ដោយគ្មានមូលដ្ឋាន និងភស្តុតាងច្បាស់លាស់ឡើយ។

នៅក្នុងលិខិតចំហដែលត្រូវបានបង្ហោះផ្សាយនៅលើទំព័រហ្វ៊េសប៊ុករបស់លោកនោះ លោក ហ៊ុន ម៉ានី បានសរសេរថា លោកមិនទាន់បានឃើញមានភស្តុតាងជាក់លាក់ និងមានលក្ខណៈគតិយុត្តិ ដែលអាចភ្ជាប់រូបលោកទៅនឹងអំពើហិង្សានោះឡើយ។

«តើអ្វីដែលជាមូលហេតុ និងជាគោលដៅនៃការភ្ជាប់ខ្ញុំយ៉ាងដូច្នេះ? ការចោទប្រកាន់ និងមតិលើកឡើងទាំងអម្បាលម៉ាននេះ គឺជាការបំផ្លើស ឬជាការទម្លាក់កំហុសដោយអសុទ្ធចិត្ត ដែលធ្វើឲ្យប៉ះពាល់ផ្ទាល់ដល់កិត្តិយស និងកិត្តិសព្ទរបស់ខ្ញុំ»។ នេះជាការអះអាងរបស់លោក ហ៊ុន ម៉ានី មុននឹងលោកអត្ថាធិប្បាយបន្ថែមយ៉ាងដូច្នេះ៖«ក្រុមការងារយើងខ្ញុំ សម្រេចពិគ្រោះយោបល់ ដើម្បីជ្រើសរើសវិធានការសមស្របណាមួយ ក្នុងគោលដៅការពារកិត្តិយស និងសចក្តីថ្លៃថ្នូររបស់ខ្ញុំបាទ ដោយទាមទារដាច់ខាតឲ្យមានការសុំទោសជាសាធារណៈពីបុគ្គលដែលបានប្រព្រឹត្តិ និងឲ្យមានការអនុវត្តច្បាប់ពីស្ថាប័នមានសមត្ថកិច្ច ក្នុងនាមខ្ញុំជាតំណាងរាស្ត្រ ដែលស្អប់ខ្ពើមការរំលោភច្បាប់»។