ជាតិ
នយោបាយជាតិ
លោក ញ៉យ ចំរើន ស្បថឲ្យធ្លាក់យន្តហោះស្លាប់ បើលោកបានជេរជនដៃដល់ថា«អាយ៉ងយួន» រូបពីហ្វេសប៊ុកលោក ញ៉យ ចំរើន
× ប្រតិភូតំណាងរដ្ឋសភាកម្ពុជាដែលដឹកនាំដោយលោក ឈាង វុន បានសួរសុខទុក្ខលោក គង់ សភា និង លោក ញ៉យ ចំរើន ដែលកំពុងសម្រាកព្យាបាលនៅប្រទេសថៃ កាលពីថ្ងៃសៅរ៍ទី៧វិច្ឆិកា។ នៅចំពោះមុខលោក ឈាង វុន និងតំណាងរាស្ត្ររដ្ឋសភាមួយចំនួនទៀតនោះ លោក ញ៉យ ចំរើន បានអះអាងថា លោកមិនបានជេរពាក្យ«អាយ៉ងយួន» ទៅលើជនដៃដល់ដែលបានប្រើហិង្សាវាយដំលើរូបលោកនោះទេ។
លោក ញ៉យ ចំរើន ក៏បានស្បថចំពោះមុខប្រតិភូតំណាងរាស្ត្ររដ្ឋសភាទាំងនោះទៀតថា បើខ្លួនបានជេរពាក្យ«អាយ៉ងយួន»ទៅលើជនដៃដល់មែននោះ សូមឲ្យលោកធ្លាក់យន្ដហោះស្លាប់។
តំណាងរាស្ត្រដែលត្រូវជនដៃដល់វាយឲ្យរងរបួសដៃ និងភ្នែករូបនេះ បានសរសេរលើហ្វេសប៊ុកផ្ទាល់ខ្លួន កាលពីថ្ងៃទី៧ វិច្ឆិកាយ៉ាងដូច្នេះថា៖«ខ្ញុំក៏បានផ្តាំទៅតាមគណៈប្រតិភូវិញថា ខ្ញុំមិនបានជេរពាក្យ «អាយ៉ងយួន » ដល់អ្នកដៃដល់ដែលបានវាយដំលើរូបខ្ញុំនោះទេ។ ខ្ញុំបានស្បថចំពោះមុខប្រតិភូថា ឲ្យខ្ញុំធ្លាក់យន្តហោះស្លាប់បើខ្ញុំបាននិយាយមែន (អាយ៉ងយួន ) ។ ចុះអ្នកបំផ្លើស និង អ្នកចោទប្រកាន់ខ្ញុំដោយគ្មានការពិត តើហ៊ានស្បថដូចគ្នាឬអត់?»។
មុននឹងទៅជួបតំណាងរាស្ត្រគណបក្សប្រឆាំងដែលរងរបួសទាំងពីរនេះ លោក ឈាង វុន បានថ្លែងថា អំពើហិង្សាដែលត្រូវបានប្រព្រឹត្តិទៅលើអ្នកតំណាងរាស្ត្រទាំងពីររូបគឺជាអ្វីដែលគេមិនអាចអត់ឱនឲ្យបានឡើយ ព្រោះថា សម្រាប់លោក វាគឺជាការរំលោភទៅលើតំណាងរបស់ពលរដ្ឋ។
នៅថ្ងៃទី២៦តុលាកន្លងទៅ មនុស្សមួយក្រុមបានព្រួតវាយដំអ្នកតំណាងរាស្ត្រនៃគណបក្សប្រឆាំងរហូតដល់របួសធ្ងន់ធ្ងរ។ ប្រតិកម្មពីស្ថាប័នជាតិ និងអន្តរជាតិបានរិះគន់យ៉ាងខ្លាំងលើអំពើហិង្សានេះ។ មនុស្ស៣នាក់បានចេញមុខសារភាពហើយ ប៉ុន្តែក្រុមគណបក្សប្រឆាំងបានទាមទារឲ្យអាជ្ញាធរបន្តស្វែងរកអ្នកបញ្ជាក្រុមជនដៃដល់បន្ថែមទៀត៕
ចុចអានអត្ថបទទាក់ទង៖ ករណីវាយតំណាងរាស្ត្រ៖ លោក ហ៊ុន សែន លឺថា អ្នកវាយខឹងនឹងពាក្យជេរ«អាយ៉ងយួន»
© រក្សាសិទ្ធិដោយ thmeythmey.com