ជាតិ
មន្ត្រីទីស្តីការគណៈរដ្ឋមន្ត្រីម្នាក់អះអាងថា ខ្លួនត្រូវបានដកតំណែងដោយអយុត្តិធម៌
× ភ្នំពេញ៖ មន្ត្រីបម្រើការងារនៅទីស្តីការគណៈរដ្ឋមន្ត្រីម្នាក់ ឈ្មោះលោក សាត់ សាម៉ឺឌី បានអះអាងប្រាប់សារព័ត៌មានថ្មីៗថា ខ្លួនបានរងនូវភាពអយុត្តិធម៌ ដោយសារលោកត្រូវបានដកតំណែង និងត្រូវបានដកប្រាក់ខែអស់រយៈពេលជាង ២ឆ្នាំ។
លោក សាត់ សាម៉ឺឌី បាននិយាយថា លោកមានតួនាទីជាអនុប្រធាននាយកដ្ឋាន នៃទីស្តីការគណៈរដ្ឋមន្ត្រី និងជាអតីតអនុប្រធាននាយកដ្ឋានជួយសង្គ្រោះជាតិជនពិការដោយមីន នៅអាជ្ញាធរជាតិមីន ហើយលោកត្រូវបាននាយកដ្ឋានបុគ្គលិកសម្រេចទម្លាក់តំណែង និងដកប្រាក់ខែឲ្យបម្រើការងារជាមន្ត្រីសាមញ្ញ ដោយទទួលបានប្រាក់ខែតែជាង ៨០ម៉ឺនរៀលក្នុងមួយខែ ពីទីស្តីការគណៈរដ្ឋមន្ត្រី។
មន្ត្រីដែលអះអាងខ្លួនបញ្ចប់ការសិក្សាថ្នាក់បរិញ្ញាបត្រជាន់ខ្ពស់ ផ្នែករដ្ឋបាលសាធារណៈ ក្នុងឆ្នាំ ២០០៣ នៅសាកលវិទ្យាល័យភូមិន្ទនីតិសាស្ត្ររូបនេះ បាននិយាយថា អស់រយៈ ពេលជាង ២ឆ្នាំ មកទល់ពេលនេះ លោកត្រូវបានប្រធាននាយកដ្ឋានបុគ្គលិកកាត់ប្រាក់ខែ និងដកតំណែងយ៉ាងយុត្តិធម៌ដែលនាំឲ្យគ្រួសារលោករស់នៅក្នុងជីវភាព ខ្វះខាតពុំមានចំណូលផ្គត់ផ្គង់ជីវភាពរស់នៅ និងការសិក្សារបស់កូនប្រចាំថ្ងៃ។
លោកនិយាយយ៉ាងដូច្នេះថា៖«ខ្ញុំបាទត្រូវបានកាត់ប្រាក់ខែ និងត្រូវបានដកតំណែង យ៉ាងអយុត្តិធម៌។ គ្រួសារខ្ញុំរស់នៅក្នុងជីវភាពខ្វះខាតបំផុត គ្មានប្រាក់ផ្គត់ផ្គង់ម្ហួបអាហារ និងកូនសិក្សារៀនសូត្រ ដោយជាប់បំណុលធនាគារតូម៉ាតូចំនួន ៦ពាន់ដុល្លារ និងកំណើនការប្រាក់ចំនួន ៣ពាន់ដុល្លារទៀត។ អស់រយៈពេល ៥ឆ្នាំហើយ ខ្ញុំបាទគ្មានប្រាក់សងបំណុលធនាគារនៅឡើយ ហើយបច្ចុប្បន្ននេះ ធនាគារកំពុងប្តឹងតុលាការទាមទាររឹបអូសផ្ទះឡៃឡុងយកបំណុលទៀត»។
លោក សាត់ សាម៉ឺឌី បន្ថែមទៀតថា លោកបានស្វះស្វែងរកការអន្តរាគមន៍ពីថ្នាក់ដឹកនាំស្ថាប័នគណៈរដ្ឋមន្ត្រី ក្រសួងមុខងារសាធារណៈ និងភាគីពាក់ព័ន្ធរួចអស់ហើយ ប៉ុន្តែលោក ពុំទទួលបានការជួយអន្តរាគមន៍នៅឡើយ។
មន្ត្រីទីស្តីការគណៈរដ្ឋមន្ត្រីរូបនេះ បានអំពាវនាវនាយករដ្ឋមន្ត្រី ហ៊ុន សែន ជួយអន្តរាគមន៍រកយុត្តិធម៌ ដោយលោកស្នើសុំប្រាក់ខែ និងតួនាទីដែលត្រូវបានដកចេញ កាលពីកន្លងទៅ មកវិញ។ លោកសង្ឃឹមថា លោកនាយករដ្ឋមន្ត្រីនឹងជួយអន្តរាគមន៍ស្វែងរកភាពយុត្តិធម៌ដល់រូបលោក។
ទាក់ទិននឹងករណីនេះ លោក សាត់ សាម៉ឺឌី អះអាងថា លោកក៏បានដល់លិខិតស្វែងរកការជួយអន្តរាគមន៍ពីអ្នកនាំពាក្យទីស្តីការគណៈរដ្ឋមន្ត្រី លោក ផៃ ស៊ីផាន ផងដែរ។ តែយ៉ាងណា លោក ផៃ ស៊ីផាន អះអាងបដិសេធថា លោកពុំដឹងរឿងនេះ នោះទេ៕
© រក្សាសិទ្ធិដោយ thmeythmey.com