ប្លែកៗ
អន្តរជាតិ
ឥណ្ឌូនេស៊ីនឹងសាងសង់មន្ទីរឃុំឃាំងការពារដោយសត្វក្រពើ សម្រាប់ដាក់អ្នកទោសគ្រឿងញៀន
× ដើម្បីឃ្លាំមើលអ្នកទោសមិនឲ្យរត់ចេញពីមន្ទីរឃុំឃាំង គ្មានវិធីអ្វីដែលមានប្រសិទ្ធភាពជាងដាក់សត្វក្រពើឲ្យការពារជុំវិញគុកនោះទេ។ នេះជាការលើកឡើងរបស់លោក Budi Waseso ប្រធានទីភ្នាក់ងារឥណ្ឌូនេស៊ីប្រឆាំងនឹងគ្រឿងញៀន កាលពីថ្ងៃចន្ទកន្លងទៅនេះ។
លោក Budi Waseso បានស្នើឲ្យសាងសង់មន្ទីរឃុំឃាំងមួយដែលធានានូវសុវត្ថិភាពខ្ពស់ ដោយសាងសង់នៅលើកោះមួយដែលការពារដោយហ្វូងសត្វក្រពើ ដើម្បីដាក់អ្នកទោសជួញដូរគ្រឿងញៀន ដែលត្រូវជាប់ពន្ធនាគារអស់មួយជីវិត។ លោកបានបញ្ជាក់ថា៖ « យើងនឹងដាក់សត្វក្រពើឲ្យបានច្រើនជាទីបំផុត ហើយខ្ញុំនឹងរកប្រភេទសត្វក្រពើណាដែលកាចសាហាវ »។ ប្រធានទីភ្នាក់ងារប្រឆាំងនឹងគ្រឿងញៀនរូបនេះយល់ឃើញថា សត្វក្រពើធ្វើការល្អជាងមនុស្ស ព្រោះថាពួកវាមិនចេះប្រព្រឹត្តអំពើពុករលួយ ហើយក៏មិនអាចចរចាដើម្បីបានរត់ចេញពីមន្ទីរឃុំឃាំងបានដែរ។ សម្រាប់ពេលនេះ គម្រោងនេះស្ថិតក្នុងដំណាក់កាលបឋមនៅឡើយ គេមិនទាន់ធ្វើការកំណត់អំពីទីកន្លែង និងកាលបរិច្ឆេទនៃការសាងសង់នៅឡើយទេ។
បើទោះបីជាឥណ្ឌូនេស៊ីជាប្រទេសដែលមានច្បាប់ប្រឆាំងនឹងគ្រឿងញៀនដ៏តឹងរ៉ឹងបំផុតមួយក្នុងពិភពលោកក៏ដោយ ក៏គ្រឿងញៀននៅតែអាចចរាចរយ៉ាងទូលំទូលាយនៅក្នុងមន្ទីរឃុំឃាំងដែរ។ អ្នកទោស អ្នកយាម និងមន្ត្រីប៉ូលិសតែងតែត្រូវចាប់ខ្លួនជារឿយៗពីបទប្រព្រឹត្តបទល្មើស ជាពិសេសអំពើពុករលួយតែម្តង៕
Tag:
ឥណ្ឌូនេស៊ី
ក្រពើ
មន្ទីរឃុំឃាំង
© រក្សាសិទ្ធិដោយ thmeythmey.com