កូរ៉េខាងត្បូង នឹងបើកស្ថានកុងស៊ុលនៅខេត្តសៀមរាប

ជាតិ

កូរ៉េខាងត្បូង នឹងបើកស្ថានកុងស៊ុលនៅខេត្តសៀមរាប

23, Nov 2015 , 8:59 pm

រូបភាព

ដោយ: ខន ចំប៉ា

សាធារណរដ្ឋកូរ៉េ គ្រោងនឹងបើកស្ថានកុងស៊ុលរបស់ខ្លួនប្រចាំខេត្តសៀមរាប នៃប្រទេសកម្ពុជា។ សំណើសុំបើកស្ថានកុងស៊ុលនេះ បានទទួលការយល់ព្រមពីក្រសួងការបរទេស និងសហប្រតិបត្តិការកម្ពុជាហើយ។

ស្ថានកុងស៊ុលនេះនឹងគ្របដណ្តប់លើបណ្តាខេត្តចំនួន៦ រួមមានខេត្តសៀមរាប បាត់បំបង ប៉ៃលិន បន្ទាយមានជ័យ ឧត្តរមានជ័យ និងខេត្តព្រះវិហារ។ មួយឆ្នាំ ឬពីរឆ្នាំក្រោយ រដ្ឋាភិបាលនៃសាធារណរដ្ឋកូរ៉េ នឹងស្នើតម្លើងទៅជាស្ថានអគ្គកុងស៊ុលវិញ។ នេះបើតាមក្រសួងការបរទេសកម្ពុជា។

ក្រសួងការបរទេសកម្ពុជា បានបញ្ជាក់ទៀតថា ការបើកស្ថានកុងស៊ុលរបស់ខ្លួនប្រចាំខេត្តសៀមរាបរបស់សាធារណរដ្ឋកូរ៉េនេះ គឺដើម្បីដើម្បីពង្រឹង និងពង្រីកបន្ថែមតៀតនូវទំនាក់ទំនងមិត្តភាព និងសហប្រតិបត្តិការណ៍ដ៏ល្អរវាងប្រទេសទាំងពីរ។

លោក គីម វ៉ុនជីន ឯកអគ្គរដ្ឋទូតនៃសាធារដ្ឋកូរ៉េប្រចាំនៅកម្ពុជាបានបញ្ជាក់ថា «មិត្តភាព»គឺជាទ្រព្យសម្បតិ្តដែលមានតម្លៃបំផុត ក្នុងទំនាក់ទំនងរវាងប្រជាជនកម្ពុជា និងកូរ៉េ ហើយវាបានកើនឡើងជាបន្តបន្ទាប់។

សូមបញ្ជាក់ថា កាលពីឆ្នាំ២០១៤ កន្លងទៅភ្ញៀវទេសចរជនជាតិកូរ៉េខាងត្បូងបានមកទស្សនានៅកម្ពុជាមានជាង៤សែននាក់ ខណៈរយៈពេល៦ខែ ក្នុងឆ្នាំ២០១៥នេះ មានភ្ញៀវទេសចរកូរ៉េខាងត្បូងប្រមាណ២សែននាក់ បានមកទស្សនានៅកម្ពុជា។ ដោយឡែកទំហំពាណិជ្ជកម្មរវាងកម្ពុជា-និងកូរ៉េមានជាង១ពាន់លានដុល្លារអាមេរិក៕