ខ្មែរក្រហម
ជាតិ
សំណុំរឿង០០២/០២៖ អង្គសវនាការផ្តើមស្តាប់សក្ខីកម្ម លើការធ្វើទុក្ខបុកម្នេញជនជាតិវៀតណាម
× អង្គជំនុំជម្រះសាលាដំបូងនៃអង្គជំនុំជម្រះវិសាមញ្ញក្នុងតុលាការកម្ពុជា (អ.វ.ត.ក) នៅថ្ងៃទី២ ខែធ្នូ បានស្តាប់ភស្តុតាងទាក់ទង នឹងការចោទប្រកាន់ពីបទប្រល័យពូជសាសន៍ និង ឧក្រិដ្ឋកម្មផ្សេងទៀត ដែលត្រូវបានចោទប្រកាន់ថា បានអនុវត្តន៍ប្រឆាំងនឹងជនជាតិភាគតិចវៀតណាមនៅកម្ពុជា ក្នុងរបបកម្ពុជាប្រជាធិបតេយ្យ។
អង្គជំនុំជម្រះ បានស្តាប់ការផ្តល់សក្ខីកម្មដើមបណ្តឹងរដ្ឋប្បវេណីម្នាក់ ដែលបានបាត់បង់ក្រុមគ្រួសារដែលជាប់សែស្រឡាយជាជនចាតិវៀតណាម។ លោក ប្រាក់ ឌឿន ដែលបានរៀបការជាមួយស្ត្រីកូនកាត់ជនជាតិវៀតណាម បានថ្លែងថា ក្រុមគ្រួសាររបស់លោក ត្រូវបានខ្មែរក្រហមជម្លៀសដោយបង្ខំ ឱ្យចេញពីភូមិដែលខ្លួនធ្លាប់រស់នៅ។ លោកថា ខ្មែរក្រហមបានធ្វើបញ្ជីឈ្មោះជនជាតិវៀតណាម និងក្រុមគ្រួសារខ្មែរដែលបានរៀបការជាមួយជនជាតិវៀតណាម។
មានកូនចំនួន៦នាក់ និងមានស្រុកកំណើតក្នុងខេត្តកំពង់ឆ្នាំង សាក្សីរូបនេះ បានរៀបរាប់ថា ប្រពន្ធកូនរបស់គាត់ ត្រូវបានយកទៅសម្លាប់ នៅពេលដែលគេដឹងថាមានសែស្រឡាយវៀតណាម។ បើតាមសាក្សីរូបនេះ ខ្មែរក្រហមបានសម្លាប់កូនក្មេងដោយបោះឡើងលើ និងចាក់នឹងចំពុះទុងកាំភ្លើងរបស់ខ្លួន។
លោក ក៏បានឃើញជនជាតិវៀតណាមជាច្រើននាក់ ត្រូវបានខ្មែរក្រហមប្រមូលផ្តុំ និងបញ្ជូនទៅក្រៅតំបន់សហករណ៍។ លោកបានថ្លែងថាមានការប្រាប់ទៅជនជាតិវៀតណាម ដែលនៅកោះតាម៉ូវ ក្នុងខេត្តកំពង់ឆ្នាំថា កុំឱ្យនិយាយភាសាវៀតណាមបន្តទៅទៀត។
នៅចំពោះមុខអង្គសវនាការ ដើមបណ្តឹងរដ្ឋប្បវេណី ប្រាក់ ឌឿន បានថ្លែងថា គាត់បានលឺក្រុមខ្មែរក្រហមនិយាយគ្នាពីការ ប្រមូលជនជាតិវៀតណាមពីតាមសហករណ៍នានា។ លោកថា ក្រុមខ្មែរក្រហម ចាត់ទុកជនជាតិវៀតណាមថាជាខ្មាំងស៊ីរូងផ្ទៃក្នុង។ ក្រោយមកខ្មែរក្រហមបានចាប់ខ្លួនប្រពន្ធ និងម្តាយឪពុកក្មេកជាជនជាតិវៀតណាម។ ជនជាតិ វៀតណាមផ្សេងទៀតដែលមានចំណងអាពាហ៍ពិពាហ៍ជាមួយជនជាតិខ្មែរ ក៏ត្រូវបានចាប់ខ្លួនផងដែរ ហើយធ្វើការបែងចែកក្រុមជនជាតិខ្មែរម្ខាង និងក្រុមវៀតណាមម្ខាង។
បើតាមលោក នេត្យ ភក្ត្រា អ្នកនាំពាក្យសាលាក្តីខ្មែរក្រហម សាក្សី និង ដើមបណ្តឹងរដ្ឋប្បវេណីចំនួន១០រូប ត្រូវបានកំណត់កាលបរិច្ឆេទ សម្រាប់ការផ្តល់សក្ខីកម្មនៅក្នុងអំឡុងពេលសវនាការលើផ្នែកនេះ ក្នុងសំណុំរឿង ០០២/០២ ។ អង្គជំនុំជម្រះសាលាដំបូង ក៏កំពុងពិចារណាផងដែរ ថាតើត្រូវស្តាប់សក្ខីកម្មរបស់អ្នកជំនាញលើអង្គហេតុនេះដែរឬយ៉ាងណា។
បើតាម លោក នេត្យ ភក្ត្រាដដែល ក្នុងអំឡុងពេលសវនាការ ចំនួន១១៧ថ្ងៃ អង្គជំនុំជម្រះបានស្តាប់ សក្ខីកម្មរបស់សាក្សីចំនួន៤៩ រូប ដើមបណ្តឹងរដ្ឋប្បវេណីចំនួន៣០រូប និងអ្នកជំនាញមួយរូប។
បើយោងតាមដីកាដំណោះស្រាយគោលនយោបាយមួយ ក្នុងចំណោមគោលនយោបាយចំនួន៥ ដែលអនុវត្តដោយបក្សកុម្មុយនីស្តកម្ពុជា(ប.ក.ក) ដើម្បីការពារបដិវត្តន៍សង្គមនិយម គឺការដាក់ក្រុមជាក់លាក់ជាគោលដៅ តាមរយៈការប្រើប្រាស់មធ្យោបាយចាំបាច់នានា។ ទាក់ទងនឹងផ្នែកស្តីពីជនជាតិវៀតណាម ដីកាដំណោះស្រាយគូសបញ្ជាក់ថា គោលនយោបាយនេះ មានអត្ថិភាពនៅមុនឆ្នាំ១៩៧៥ និងរីករាលដាលពេញមួយរយៈកាល នៃរបបកម្ពុជាប្រជាធិបតេយ្យ យ៉ាងហោចណាស់រហូតដល់ថ្ងៃទី៦ ខែមករា ឆ្នាំ១៩៧៩ ។ កាលពីដំបូង ប.ក.ក ត្រូវបានចោទប្រកាន់ថា បានផ្តោតទៅលើការបណ្តេញជនជាតិវៀតណាមទាំងអស់ពីទឹកដីកម្ពុជា និងបញ្ជូនពួកគេទៅប្រទេសវៀតណាមវិញ។ ដីកាដំណោះស្រាយបានចោទប្រកាន់ថា នួន ជា និងខៀវ សំផន ជាអ្នកទទួលខុសត្រូវផ្នែកព្រហ្មទណ្ឌ ជាលក្ខណៈបុគ្គលចំពោះឧក្រិដ្ឋកម្មទាំងឡាយ ដែលបានប្រព្រឹត្តមកលើក្រុមជនជាតិវៀតណាម ក្នុងអំឡុងពេលខាងលើ តាមរយៈតួនាទីនានារបស់ពួកគាត់ ក្នុងជួរ ប.ក.ក ។
សូមបញ្ជាក់ថា សំណុំរឿង ០០២/០២ គឺជាការជំនុំជម្រះដំណាក់កាលទីពីរ ទៅលើ នួន ជា និង ខៀវ សំផន។ មូលដ្ឋានសម្រាប់ការជំនុំជម្រះនៃសំណុំរឿង ០០២ / ០២ នេះ ផ្អែកលើទីតាំង ឧក្រិដ្ឋកម្មដែលបានចោទប្រកាន់ និងការចោទប្រកាន់តាមអង្គហេតុ។ បទចោទទាំងនោះ រួមមាន បទប្រល័យពូជសាសន៍ចំពោះជនជាតិចាម និងវៀតណាម ការរៀបអាពាហ៍ពិពាហ៍ដោយបង្ខំ ការរំលោភផ្លូវភេទនៅក្នុងបរិបទនៃការរៀបអាពាហ៍ពិពាហ៍ដោយបង្ខំ ការបោសសម្អាតផ្ទៃក្នុង ឧក្រិដ្ឋកម្មដែលត្រូវបានចោទប្រកាន់ថាបានប្រព្រឹត្តទៅលើពុទ្ធសាសនិកនិងអតីតអ្នករដ្ឋការនៃរបបសាធារណរដ្ឋខ្មែរ ព្រមទាំងឧក្រិដ្ឋកម្ម ដែលត្រូវបានចោទប្រកាន់ថា បានប្រព្រឹត្តនៅមន្ទីរសន្តិសុខចំនួនបួន ការដ្ឋានការងារចំនួនបី និងសហករណ៍មួយ៕
© រក្សាសិទ្ធិដោយ thmeythmey.com