ជាតិ
នយោបាយជាតិ
តំណាងរាស្ត្រ CNRP ២១នាក់ អវត្តមានប្រជុំសភាថ្ងៃនេះ
× ក្នុងចំណោមសមាជិកសភាគណបក្សប្រឆាំងចំនួន៥៥រូប មានតែសមាជិកសភា ៣៤ រូប ប៉ុណ្ណោះ ដែលបានចូលរួមប្រជុំពេញអង្គរដ្ឋសភាលើកទី ៥ នីតិកាលទី ៥ ដើម្បីពិភាក្សាពីសេចក្តីព្រាងច្បាប់សំខាន់ៗចំនួន ៣ ។ សមាជិកសភាគណបក្សសង្គ្រោះជាតិ ចំនួន២១រូប ដែលមិនបានចូលរួមក្នុងកិច្ចប្រជុំថ្ងៃនេះ ដោយសារតែតំណាងរាស្ត្រខ្លះជាប់បំពេញភារកិច្ចនៅក្រៅប្រទេស អ្នកខ្លះមានជំងឺ និងខ្លះទៀតមានបញ្ហាក្ដីក្ដាំដែលមិនអាចចូលមកកម្ពុជាវិញបាន។
លោក យ៉ែម បុញ្ញឫទ្ធិ អ្នកនាំពាក្យគណបក្សសង្គ្រោះជាតិ បានឲ្យដឹងថា ក្នុងចំណោមសមាជិកសភាបក្សប្រឆាំង២១រូប ដែលអវត្តមាននោះ ក្នុងនោះតំណាងរាស្ត្រ១២រូប មានលោក អេង ឆៃអ៊ាង លោក គង់ បូរ៉ា លោកស្រី មូ សុខហួរ និងលោកស្រី ជូឡុង សូមូរ៉ា ជាដើម កំពុងបំពេញបេសកម្មនៅក្រៅប្រទេស ដូចជា ប្រទេសកាណាដា និងអាមេរិក។
រីឯតំណាងរាស្ត្រចំនួន៩រូបទៀតកំពុងនៅក្នុងប្រទេស ដែលមិនបានចូលប្រជុំសភានោះ ដោយសារតែអ្នកខ្លះមានជំងឺដូចជាលោក គង់ សភា លោក ញ៉យ ចំរើន ត្រូវត្រៀមទៅព្យាបាលនៅក្រៅប្រទេស ហើយលោក ប៉ែន សុវណ្ណ កំពុងឈឺធ្ងន់១ឆ្នាំមកនេះ និងខ្លះទៀតត្រូវចុះជួបប្រជាពលរដ្ឋតាមមូលដ្ឋាន។ នេះបើតាមលោក យ៉ែម បុញ្ញឫទ្ធិ។
ជាការកត់សម្គាល់លោក អ៊ុំ សំអាន តំណាងរាស្ត្រគណបក្សប្រឆាំង ដែលបានរិះគន់ធ្ងន់ៗទៅកាន់រដ្ឋាភិបាលជុំវិញបញ្ហាព្រំដែននោះ កំពុងស្នាក់នៅក្រៅប្រទេសអស់រយៈពេលច្រើនខែមកហើយ ក៏មិនទាន់ចូលមកកម្ពុជាវិញ ដើម្បីបំពេញតួនាទីតំណាងរាស្ត្រដែរ ក្រោយពីរដ្ឋាភិបាលព្រមានចាប់ខ្លួន អ្នកដែលរិះគន់រដ្ឋាភិបាលលើបញ្ហាព្រំដែននេះ។ចំណែកលោក សម រង្ស៊ី ប្រធានគណបក្សប្រឆាំង មិនអាចចូលរួមប្រជុំសភាបាន ដោយសារលោកត្រូវបានរដ្ឋសភាដកអភ័យឯកសិទ្ធិតំណាងរាស្ត្រ ក្រោយពីបានជាប់ឈ្មោះជា «ទណ្ឌិត»ពាក់ព័ន្ធនឹងបញ្ហាក្ដីក្ដាំរវាងលោក ជាមួយលោក ហោ ណាំហុង និងបទចោទប្រកាន់ជាបន្ដបន្ទាប់ទៀត ពាក់ព័ន្ធនឹងករណីលោក ហុង សុខហួរ និងការបរិហាកេរ្តិ៍ប្រធានរដ្ឋសភាជាដើម៕
© រក្សាសិទ្ធិដោយ thmeythmey.com