ជាតិ
សង្គមជាតិ
សមត្ថកិច្ចថា ក្រុមចោរកម្ម លួច ឆក់ ប្លន់ ចងក្រងជាបណ្ដាញច្រើន
×
អំពើលួច ឆក់ ប្លន់ ដែលបានផ្ទុះឡើងផ្ទួនៗគ្នាក្នុងរយៈពេលចុងក្រោយនេះ ត្រូវបានសមត្ថកិច្ចស្រាវជ្រាវឃើញថា កើតចេញពីក្រុមចោរកម្ម ដោយមានបក្សពួកនិងបណ្តាញច្រើន។ នេះជាការអះអាងរបស់លោក ម៉ត់ ជាតូ អគ្គស្នងការរងនគរបាលជាតិ ក្រោយពីបញ្ចប់កិច្ចប្រជុំរួមរវាង តុលាការ អយ្យការ និងនគរបាលយុត្តិធម៌ ដែលប្រព្រឹត្តទៅនៅទីស្តីការក្រសួងយុត្តិធម៌ នាថ្ងៃទី២២ ខែធ្នូ ឆ្នាំ២០១៥ ។
លោក ម៉ក់ ជីតូ អគ្គស្នងការរងនគរបាលជាតិ បានបញ្ជាក់ថា ជនល្មើសមួយចំនួនដែលត្រូវបានសមត្ថកិច្ចចាប់ខ្លួន បានសារភាពថា ពួកគេចេញមកពីក្រុមបក្សពួក ដែលចងក្រងជាបណ្ដាញតៗគ្នាជាបន្តបន្ទាប់ ក្នុងការធ្វើសកម្មភាពចោរកម្ម។ យ៉ាងណាក៏ដោយ លោក មិនអាចបញ្ជាក់ឲ្យលម្អិត ទាក់ទងនឹងមេខ្លោង ឬបណ្តាញចោរកម្មនោះទេ ដោយសារតែលោកអះអាងថា បញ្ហានេះកំពុងតែស្ថិតក្នុងការស៊ើបអង្កេតរបស់សមត្ថកិច្ច។
នៅចំពោះមុខក្រុមអ្នកសារព័ត៌មាន អគ្គស្នងការរងនគរបាលជាតិរូបនេះបានបញ្ជាក់ដូច្នេះថា៖«រហូតមកដល់ពេលនេះ យើងស្រាវជ្រាវឃើញថា ភាគច្រើនចោរលួច ចោរឆក់ ចោរប្លន់ ដែលយើងចាប់បាន គឺមានក្រុមបក្សរបស់ពួកគេ។ ម្យ៉ាងទៀត អ្នកដែលយើងកំពុងតែតាមចាប់ ក៏ឆ្លៀតទៅបង្កើតក្រុមថែមទៀត ដើម្បីធ្វើសកម្មភាពបន្ត»។
លោក ម៉ក់ ជីតូ បានប្តេជ្ញាចិត្តថា សមត្ថកិច្ចនឹងខិតខំបំពេញការងារ ដើម្បីបង្ការនិងបង្ក្រាបបទល្មើសព្រហ្មទណ្ឌ ក្នុងករណីលួច ឆក់ ប្លន់ ក្នុងគោលបំណងរក្សាសន្តិសុខ សណ្តាប់ធ្នាប់សាធារណៈដល់ប្រជាពលរដ្ឋ និងសង្គមជាតិ។
ជុំវិញបញ្ហាចោរកម្មនេះ មេបញ្ជាការរងកងរាជអាវុធហត្ថលើផ្ទៃប្រទេស ទទួលបន្ទុកព័ត៌មាន សន្តិសុខ និងបង្ក្រាបបទល្មើស លោក ហុង វិណុល បានបដិសេធថា ក្រុមជនល្មើសដែលមានអាវុធខុសច្បាប់ចេញ ឆក់ ប្លន់ ទាំងនោះ គឺមិនមានអ្វីជាប់ពាក់ព័ន្ធនឹងសមត្ថកិច្ច ដូចមតិរិះគន់មួយចំនួនឡើយ។ លោកបានអះអាងថា ការប្រើប្រាស់អាវុធរបស់ជនល្មើសទាំងនោះ គឺពួកគេមានប្រភពនៃអាវុធខុសច្បាប់ ដែលបានចែករំលែកអាវុធគ្នា ឬក៏ដោះដូរគ្នា ក្នុងការចេញប្រព្រឹត្តបទល្មើស។
មេបញ្ជាការរងកងរាជអាវុធហត្ថលើផ្ទៃប្រទេស បានបញ្ជាក់បែបនេះថា៖«រហូតមកដល់ថ្ងៃនេះ រាល់ជនល្មើសដែលសមត្ថកិច្ចចាប់បាន មិនទាន់ឃើញជនសង្ស័យណាម្នាក់សារភាពថា ទិញអាវុធពីឃ្លាំង ឬក្រសួងការពារជាតិនេះទេ។ ពួកគេអាចចែករំលែកគ្នា ឬក៏ដោះដូរគ្នាទៅវិញទៅមក តែបើថាឲ្យទិញពីឃ្លាំងអាវុធតែម្តង ដូចជាគ្មានទេ»។
សូមបញ្ជាក់ថា ក្នុងឆ្នាំ២០១៥នេះ បទល្មើសលួច មាន១០៣៨ បទល្មើសឆក់មាន ៩ករណី បទល្មើសប្លន់មាន ២៥០ករណី។ បើប្រៀបធៀបនឹឆ្នាំ២០១៤ បទល្មើសទទាំងអស់នេះ បានថយចុះប្រមាណ១៤ភាគរយ៕
© រក្សាសិទ្ធិដោយ thmeythmey.com