ជាតិ
លោក ទេព នីថា នឹងកាន់តំណែងអគ្គលេខាធិការ គជប ទៀត
× អ្នកវិភាគនយោបាយ យល់ឃើញថា លោក ទេព នីថា នឹងអាចទទួលបានតំណែងអគ្គលេខាធិការ នៃគណៈកម្មាធិការជាតិរៀបចំការបោះឆ្នោតទៀត ព្រោះស្ថាប័នបោះឆ្នោតនេះ អាចស្ថិតនៅក្រោមឥទ្ធិពលនយោបាយ និងមិនទាន់មានភាពឯករាជ្យពេញលេញ។ លោក ទេព នីថា ដែលកំពុងកាន់តួនាទីអគ្គលេខាធិការបច្ចុប្បន្ន បានដាក់ពាក្យប្រជែងតំណែងអគ្គលេខាធិការថ្មីនេះ ដោយអះអាងថា លោកមានបទពិសោធច្រើន និងមានសមត្ថភាពគ្រប់គ្រាន់ក្នុងការបំពេញតួនាទីនេះ។ នៅដើមខែ មករា ឆ្នាំ២០១៦ គ.ជ.ប នឹងប្រកាសឈ្មោះបេក្ខជន ដែលប្រឡងជាប់តំណែងអគ្គលេខាធិការ និងអគ្គលេខាធិការរង គ.ជ.ប ។
តំណែងអគ្គលេខាធិការ នៃគណៈកម្មាធិការជាតិរៀបចំការបោះឆ្នោតថ្មី គឺស្ថិតនៅក្រោមការសម្រេចបែបនយោបាយទាំងស្រុង ដូច្នេះលោក ទេព នីថា ដែលបានដាក់ពាក្យចូលកាន់តំណែងនេះ នឹងអាចទទួលបានតំណែងអគ្គលេខាធិការ គ.ជ.ប នេះទៀត។ នេះជាការសាកល្បងទាយរបស់លោក អ៊ូ វីរៈ ដែលបានមើលឃើញថា គ.ជ.ប មិនទាន់មានភាពឯករាជ្យពេញលេញនៅឡើយទេ។ អ្នកវិភាគរូបនេះ បានសម្លឹងឃើញថា ការដាក់ពាក្យចូលកាន់តំណែងអគ្គលេខាធិការ គជប នេះ គឺដោយសារលោក ទេព នីថា អាចទទួលបានការលើកទឹកចិត្ត និងការជំរុញពីខាងគណបក្សប្រជាជនកម្ពុជា។ លោកថា ប្រធានគណៈកម្មាធិការជាតិរៀបចំការបោះឆ្នោត លោក ស៊ិក ប៊ុនហុក ក៏ទំនងជាមិនចង់ដាក់អ្នកណាផ្សេងកាន់តំណែងអគ្គលេខាធិការនេះ ជំនួសលោក ទេព នីថា ដែរ។
ថ្លែងប្រាប់សារព័ត៌មានថ្មីៗ អ្នកវិភាគរូបនេះ បានបញ្ជាក់យ៉ាងដូច្នេះថា៖«ខ្ញុំយល់ថា ប្រហែលជាលោក ទេព នីថា នឹងកាន់តំណែងអគ្គលេខាធិការ គ.ជ.ប នេះដដែល ព្រោះការដាក់ពាក្យនេះគឺលោក ទេព នីថា អាចទទួលបានការជំរុញ ពីខាងគណបក្សប្រជាជនកម្ពុជា។ ហើយមើលទៅប្រធាន គ.ជ.ប ក៏ចង់ទុកលោក ទេព នីថា នៅក្នុងតួនាទីនេះបន្តទៀតដែរ ព្រោះ គ.ជ.ប គឺស្ថិតនៅក្រោមគណបក្សនយោបាយ មិនទាន់ឃ្លាតឆ្ងាយទេ »។
លោក សូ ចន្ថា ក៏បានមើលឃើញដូចលោក អ៊ូ វីរៈ ដែរ។ អ្នកវិភាគនយោបាយរូបនេះ យល់ឃើញថា ការប្រកាសជ្រើសរើស អគ្គលេខាធិការ គ.ជ.បជាសាធារណៈពេលនេះ គ្រាន់តែជាការបំភាន់ភ្នែកប្រជាពលរដ្ឋ កុំឲ្យចោទថា គ.ជ.ប មិនមានភាពឯករាជ្យប៉ុណ្ណោះ។ លោក ចន្ថា បន្ថែមថា តួនាទីអគ្គលេខាធិការ គជប ថ្មីនេះ ទំនងជាស្ថាប័ន គ.ជ.ប បានរៀបចំទុកតំណែងនេះរួចជាស្រេចហើយសម្រាប់លោក ទេព នីថា។«ខ្ញុំគិតថា ខាងគណបក្សប្រជាជន គេមិនផ្លាស់ប្ដូរលោក ទេព នីថា ទៅណាទេ។ ហើយប្រធាន គ.ជ.ប ក៏មកពីខាងគណបក្សប្រជាជនទៀត ដូចនេះគេនឹងទុកតំណែងនេះឲ្យលោក ទេព នីថា ព្រោះលោក ទេព នីថា ធ្លាប់ធ្វើការងារ ហើយពួកគេអាចទំនាក់ទំនងគ្នាបានស្រួល។ ហើយការជ្រើសរើសបេក្ខជនប្រឡងចូលកាន់តួនាទី អគ្គលេខាធិការនេះ គ្រាន់តែបំភាន់ភ្នែកប្រជាពលរដ្ឋទេ»។ នេះជាការមើលឃើញរបស់លោក សូ ចន្ថា។
តែយ៉ាងណាអ្នកនាំពាក្យគណៈកម្មាធិការជាតិរៀបចំការបោះឆ្នោត លោក ហង្ស ពុទ្ធា ធ្លាប់អះអាងប្រាប់សារព័ត៌មានថ្មីៗថា បើទោះជាលោក ទេព នីថា ដាក់ពាក្យកាន់តំណែងជាថ្មីក៏ដោយ តែការជ្រើសរើសតំណែងអគ្គលេខាធិការ និងអគ្គលេខាធិការរង គជប គឺអនុវត្តតាមរយៈការបោះឆ្នោតសម្រេចពីសមាជិកគ.ជ.បដោយសំឡេង ៥០ ភាគរយបូក ១ ។
ទោះជាមានការបោះឆ្នោតជ្រើសរើស ដោយសំឡេង៥០ ភាគរយបូក ១ក្ដី ក៏អ្នកវិភាគទាំងពីរនេះ នៅតែមើលឃើញថា លោក ទេព នីថា នឹងកាន់តួនាទីនេះដដែល។ ទាំងលោក អ៊ូ វីរៈ ទាំងលោក សូ ចន្ថា យល់ឃើញថា សន្លឹកឆ្នោតមួយសន្លឹក ចេញពីដៃលោក ហង្ស ពុទ្ធា សមាជិកឯករាជ្យទី៩ នៃ គ.ជ.ប អាចមិនឯករាជ្យដោយលម្អៀងបោះឆ្នោតគាំទ្រ លោក ទេព នីថា ដែរ។
អ្នកវិភាគទាំងពីរនេះ យល់ឃើញថា បើ គ.ជ.ប នៅតែទុកលោក ទេព នីថា នៅក្នុងតួនាទីនេះដដែល នោះ គ.ជ.ប នឹងមិនមានអ្វីផ្លាស់ប្ដូរល្អជាងមុនទេ ហើយក៏មិនមានភាពឯករាជ្យដែរ។ ទាំងលោក អ៊ូ វីរៈ ទាំងលោក សូ ចន្ថា មើលឃើញថា មានក្រុមអ្នកច្បាប់និងអង្គការសង្គមស៊ីវិល មួយចំនួនដែលអាចមានសមត្ថភាពកាន់តួនាទីនេះ ជំនួសលោក ទេព នីថា។ លោក អ៊ូ វីរៈ សម្លឹងឃើញលោក ហេង មណីចិន្តា នាយកអង្គការពុទ្ធសាសនាដើម្បីអភិវឌ្ឍន៍ដែលបានដាក់ពាក្យចូលកាន់តួនាទីអគ្គលេខាធិការនេះ គឺសាកសមទទួលតំណែងជំនួសលោក ទេព នីថា ពីព្រោះលោក ហេង មណីចិន្តា ជាបុគ្គលកណ្ដាល ដែលមិនមានជាប់ពាក់ព័ន្ធនឹងគណបក្សនយោបាយណាមួយឡើយ៕
© រក្សាសិទ្ធិដោយ thmeythmey.com