ពីនេះ ពីនោះ
បើគ្មានអ្នករុញគូថ ជីវិតអ្នកនឹងមិនរីកចម្រើនឡើយ
× សំណួររូបវិទ្យា ថ្នាក់ទី ៧ ៖ តើច្បាប់ចលនា របស់ញូតុន និយាយពីអ្វី? ទេ មិនដឹងទេ! (ប៉ុន្តែ កុំខ្វល់ច្រើនអី សាកបើកឯកសារមើលសិនទៅ ខ្ញុំក៏មិនចាំដែរ)។ ញូតុន បាននិយាយថា ៖ “គ្រប់វត្ថុទាំងអស់ មិនមានចលនានោះទេ ដរាបអ្នកមិនរុញ ប៉ះ ឬមានកម្លាំងអ្វីមួយ មករុញច្រានវា”។ ទោះបីជាលោកញូតុន កំពុងនិយាយប្រាប់អ្នក អំពីរូបវិទ្យា ប៉ុន្តែ បើអ្នកគិតបន្តិច អ្នកប្រហែលជាគិតឃើញផ្សេង អំពីការបង្រៀន ឬរៀបរាប់អំពីជីវិតរស់នៅ ប្រចាំថ្ងៃរបស់យើង។
ចំពោះខ្ញុំវិញ ខ្ញុំសូមចែករំលែកបទពិសោធន៍ផ្ទាល់ខ្លួន ដូចខាងក្រោមនេះ ៖
មនុស្សគ្រប់គ្នា នឹងធ្វើតាមអ្វី ដែលគេធ្លាប់ធ្វើ ហើយមិនចង់សាកល្បង នូវអ្វីដែលថ្មីនោះទេ ហេតុអ្វី? គឺដោយសារតែ គ្មានកម្លាំងជំរុញពីខាងក្រៅ។ ខ្ញុំមិនដឹងថា តើអ្នកយល់យ៉ាងណានោះទេ ប៉ុន្តែ សម្រាប់ខ្ញុំវិញ ខ្ញុំមិនចង់ឲ្យឆាកជីវិតរបស់ខ្ញុំ ដើរតាមផ្លូវចាស់ៗ ដែលខ្ញុំធ្លាប់ដើរនោះទេ ពោលគឺ ខ្ញុំត្រូវដើរទៅមុខ ដើរផ្លូវផ្សេងដែលគេធ្លាប់ដើរ ដើម្បីផ្លាស់ប្តូរ និងកែប្រែជីវិត ឲ្យបានល្អប្រសើរជាងមុន។ ដូច្នេះ ខ្ញុំត្រូវតែជម្នះវាឲ្យបាន។
តើអ្វីទៅ ដែលអាចជម្រុញចិត្តខ្ញុំ ឲ្យធ្វើដូច្នេះ? គឺ “អ្នករុញគូថ”។
ចាប់ពីពេលនេះទៅ ជីវិតខ្ញុំ ពោរពេញទៅដោយ កម្លាំងរុញច្រានពីខាងក្រៅ ដែលធ្វើឲ្យចំណង់តណ្ហារបស់ខ្ញុំ ពុះកញ្ជ្រោលឡើង ពោលគឺ ខ្ញុំចង់ផ្លាស់ប្តូរកម្រិតជីវភាពរស់នៅរបស់ខ្ញុំ។ ប្រាកដណាស់ រាល់ថ្ងៃនេះ ការងាររបស់ខ្ញុំ គឺស្រួលណាស់ ទៅធ្វើការរោងចក្រ ត្រឹមតែពីរម៉ោង បានប្រាក់ខែបីបួនរយ ត្រឡប់មកវិញ ធ្វើការងារ online តែពីរបីម៉ោង បានប្រាក់ខែបីបួនរយទៀត។ ហើយខ្ញុំតែងគិតថា គឺវាល្មម សម្រាប់ខ្ញុំចាយហើយ (comfort zone) ហើយខ្ញុំក៏មិនចង់សង្វាត ធ្វើអ្វីផ្សេងទៀតដែរ។
ប៉ុន្តែ គំនិតរបស់ខ្ញុំ បានប្រែប្រួលអស់ ក្រោយពីបានជួបបងប្អូន និងមិត្តភក្តិមួយចំនួន ដែលខានឃើញមុខគ្នា អស់រយៈពេលជាច្រើនឆ្នាំ។ អ្វីដែលប្លែកនោះគឺ កម្រិតជីវភាពរបស់ពួកគេ ម្នាក់ៗកាន់ iPhone 6s ជិះឡានទំនើបៗ មានផ្ទះ មានវីឡាផ្ទាល់ខ្លួន ... ពេលនោះទើបខ្ញុំភ្ញាក់ខ្លួនព្រើត ហើយដឹងថា អ្វីៗដែលខ្ញុំមានពីមុន គឺមិនគ្រប់គ្រាន់នោះ ដូច្នេះ ខ្ញុំត្រូវតែខំរកប្រាក់បន្ថែមទៀត ទើបលែងខ្មាស់គេ៕
ផ្តល់សិទ្ធិដោយ៖ www.health.com.kh
© រក្សាសិទ្ធិដោយ thmeythmey.com