បទយកការណ៍ / បទសម្ភាសន៍
កញ្ញា ឈន សម្ផស្ស លះបង់គ្រួសារស្តុកស្តម្ភ ដើម្បីអប់រំកុមារជនបទ
×
កំពង់ឆ្នាំង៖ មិនខុសពីគ្រូបង្រៀនដទៃទៀតនោះទេ កញ្ញា ឈន សម្ផស្ស ត្រូវបានក្រសួងអប់រំបញ្ជូនទៅបង្រៀននៅតំបន់ជនបទដាច់ស្រយាល បន្ទាប់ពីនាងទទួលបានការបណ្តុះបណ្តាល រយៈពេលពីរឆ្នាំ នៅសាលាគរុកោសល្យខេត្តកំពង់ឆ្នាំង។ ការរស់ឆ្ងាយពីផ្ទះ បានធ្វើឲ្យគ្រូបង្រៀនថ្មីថ្មោងរូបនេះ ជួបបញ្ហាលំបាកជាច្រើន។ តែយ៉ាងណា នាងសប្បាយចិត្តនឹងធ្វើការងារនេះ ពីព្រោះ នាងអាចអប់រំកុមារតូចៗនៅជនបទ ឲ្យមានចំណេះដឹង ដើម្បីធ្វើឲ្យជីវិតពួកគេមានពន្លឺ នៅថ្ងៃអនាគត។
មានស្រុកកំណើតនៅភូមិ កំពង់បឹង ឃុំកំពង់ហៅ ស្រុកកំពង់លែង ខេត្តកំពង់ឆ្នាំង កញ្ញា ឈន សម្ផស្ស បានបែកឆ្ងាយពីគ្រួសារ បន្ទាប់ពីបញ្ចប់ការបណ្តុះបណ្តាលផ្នែកគរុកោសល្យរយៈពេលពីរឆ្នាំ។ នាងបានក្លាយជាគ្រូបង្រៀន នៅសាលាបឋមសិក្សាត្បែងខ្ពស់ ដែលមានទីតាំងស្ថិតនៅភូមិរ៉ា ឃុំ ត្បែងខ្ពស់ ស្រុកសាមគ្គីមានជ័យ ខេត្តកំពង់ឆ្នាំង។ សាលានេះ ឆ្ងាយពីស្រុកកំណើតរបស់នាងប្រហែល៩០គីឡូម៉េត្រ។ ជីវិត ជាគ្រូបង្រៀននៅតំបន់ជនបទដាច់ស្រយាល កញ្ញា សម្ផស្ស ទើបតែចាប់ផ្តើមបង្រៀនក្មេងៗនាឆ្នាំសិក្សា២០១៥-២០១៦នេះ ហើយការរស់នៅឆ្ងាយពីស្រុកកំណើត បានធ្វើឲ្យនាងប្រឈមនឹងបញ្ហាលំបាកជាច្រើនផងដែរ។
តាមរយៈគោលការណ៍ចាប់ប៉ុស្តិ៍ កញ្ញា សម្ផស្ស បានចាប់បានប៉ុស្តិ៍ឆ្ងាយពីផ្ទះរបស់ខ្លួន ដែលធ្វើឲ្យជីវិតរបស់នាង ត្រូវរស់នៅបែកឆ្ងាយពីបងប្អូនឪពុកម្តាយ និងស្រុកកំណើតរបស់នាង។ លើសពីនេះ បញ្ហាសុវត្ថិភាព និងការចំណាយប្រាក់ច្រើន ក៏ជាបន្ទុកបន្ថែមទៀត ដែលធ្វើឲ្យអ្នកគ្រូថ្មីថ្មោងរូបនេះ មានការព្រួយបារម្ភ។ សក់វែងខ្មៅរលោង សម្បុរស កញ្ញា មាឌដំបងរូបនេះ បានបញ្ជាក់យ៉ាងដូច្នេះថា៖ «ខ្ញុំលំបាកណាស់ ពេលធ្វើដំណើរឆ្ងាយ ព្រោះត្រូវឆ្លងសាឡាងយូររាប់ម៉ោងទម្រាំឆ្លងដល់ខេត្ត ហើយដល់ខេត្តហើយ ត្រូវធ្វើបន្តដំណើរច្រើនម៉ោងទៀត»។
អង្គុយនិយាយបណ្តើរ ជើងយោកចុះយោកឡើងទំនងជាអៀនផង កញ្ញា សម្ផស្ស បានបញ្ជាក់ពីការលំបាករបស់នាងបន្តទៀតថា៖ «ខ្ញុំបារម្ភពីសុវត្ថិភាពផ្ទាល់ខ្លួនខ្លះដែរ ពីព្រោះខ្ញុំជាកូនស្រីចឹង មកឆ្ងាយមិនមែនស្រួលទេ ហើយកាលមកដំបូង ខ្ញុំមានអារម្មណ៍នឹកផ្ទះខ្លាំង បន់ឲ្យតែដល់សៅរ៍អាទិត្យ ទើបបានទៅផ្ទះ»។
មានឪពុកជាអតីតមន្ត្រីរបស់ក្រសួងវប្បធម៌ និងវិចិត្រសិល្បៈ និងម្តាយជាគ្រូបង្រៀន កញ្ញា ឈន សម្ផស្ស មិនចង់ក្លាយជាគ្រូបង្រៀននោះទេ នាងចង់ធ្វើការងារក្រុមហ៊ុន ឬការងារឯកជនផ្សេងទៀត ប៉ុន្តែ ដោយសារឪពុកម្តាយ បានណែនាំឲ្យធ្វើការងាររដ្ឋ ទើបនាងត្រូវធ្វើតាមបំណងរបស់គ្រួសារ។ ជាកូនទី៤ ក្នុងចំណោមបងប្អូន៦នាក់ កញ្ញា សម្ផស្ស រៀបរាប់ផង ដៃធ្វើកាយវិការផង យ៉ាងដូច្នេះថា៖ «ខ្ញុំមិនចង់ធ្វើគ្រូបង្រៀនប៉ុន្មានទេ តែខ្ញុំតាមម៉ាក់ខ្ញុំ ព្រោះខ្ញុំចង់ធ្វើការងារតាមក្រុមហ៊ុនឯកជនធំៗ តែបន្ទាប់ពីទទួលបានការបណ្តុះបណ្តាលគរុកោសល្យពីរឆ្នាំ ដល់ធ្វើគ្រូបង្រៀនយូរៗទៅ ខ្ញុំពេញចិត្តមុខរបរនេះដែរ ដោយសារខ្ញុំបានសាបព្រោះចំណេះដឹងដល់ក្មេងជំនាន់ក្រោយ»។
អាជីពជាគ្រូបង្រៀន ទោះបីជាត្រូវនៅឆ្ងាយពីស្រុកកំណើតក៏ដោយ ប៉ុន្តែ កញ្ញា សម្ផស្ស ត្រូវតែអនុវត្តន៍តាមតួនាទីរបស់ខ្លួន។ នាងមិនបានអាក់អន់ចិត្តនោះទេ ព្រោះនាងបានបន្សាំខ្លួនជាមួយអ្នកភូមិ និងក្រុមការងាររបស់នាងបាន។ សើចតិចៗ កញ្ញាវ័យ២២ឆ្នាំរូបនេះ បានពន្យល់ពីផលលំបាករបស់នាងបន្តថា៖ «គ្មាននរណាម្នាក់ចង់ទៅបង្រៀននៅឆ្ងាយពីស្រុកកំណើតនោះទេ គឺម្នាក់ៗចង់នៅធ្វើការងារជិតផ្ទះ ព្រោះបាននៅជិតឪពុកម្តាយ ជិតបងប្អូន និងសាច់ញាតិ»។
មិនសូវខុសគ្នាប៉ុន្មានពីគ្រូបង្រៀនទូទៅទេ ដែលក្រសួងអប់រំតម្រូវឲ្យទៅបង្រៀននៅតំបន់ជនបទចុងកាត់មាត់ញក និងឆ្ងាយពីស្រុកកំណើត កញ្ញា សម្ផស្ស ហាក់មានចំងល់ថា ហេតុអ្វីក្រសួងអប់រំ មិនដាក់អ្នកនៅស្រុកណា ឲ្យទៅបង្រៀននៅស្រុកនោះតែម្តងទៅ បែរជាឲ្យគ្រូទៅបង្រៀននៅទីតាំងដែលមិនមែនជាកន្លែងកំណើតទៅវិញ? មុខស្ងួត ដកដង្ហើមធំ អ្នកគ្រូវ័យក្មេងរូបនេះ បានសំណូមពរដល់ថ្នាក់ដឹកនាំក្រសួងអប់រំយ៉ាងដូច្នេះថា៖ «ខ្ញុំចង់ឲ្យគ្រូនៅភូមិណា ស្រុកណា ដាក់នៅស្រុកហ្នឹងទៅ ព្រោះ មិត្តភក្តិខ្ញុំ៦នាក់ នៅស្រុកគេបើកប៉ុស្តិ៍ដែរ តែហេតុអីមិនដាក់គេនៅហ្នឹង បែរជាដាក់គ្នាឲ្យទៅបង្រៀនស្រុកឆ្ងាយក្រៅពីស្រុកំណើត។ អ្នកខ្លះគេនៅស្រុកកំពង់លែង មានប៉ុស្តិ៍បើកដែរ តែអ្នកស្រុកកំពង់លែងហ្នឹង បែរជាទៅបង្ហាត់នៅស្រុកសាមគ្គីមានជ័យវិញ…»៕
© រក្សាសិទ្ធិដោយ thmeythmey.com