កម្ពុជា នឹងប្រកួតនៅកាហ្សាក់ស្ថាន ដើម្បីស្វែងរកកៅអីទៅប្រកួតនៅប្រេស៊ីល

កីឡាជាតិ

ជាតិ

កម្ពុជា នឹងប្រកួតនៅកាហ្សាក់ស្ថាន ដើម្បីស្វែងរកកៅអីទៅប្រកួតនៅប្រេស៊ីល

17, Jan 2016 , 6:59 pm

រូបភាព

ដោយ:

សហព័ន្ធកីឡាចំបាប់កម្ពុជានឹងបញ្ជូនកីឡាការិនីចំបាប់ ២ រូបដើម្បីចូលរួមប្រកួតជម្រុះអូឡាំពិកនៅប្រទេស កាហ្សាក់ស្ថាន ដើម្បីស្វែងរកកៅអីក្នុងការឆ្ពោះទៅប្រកួតកីឡាអូឡាំពិកនៅទីក្រុង RIO ប្រទេសប្រេស៊ីល នៅចុងឆ្នាំនេះ។ ប៉ុន្តែមុននឹងឈានទៅដល់ការប្រកួតនៅ កាហ្សាក់ស្ថាន កីឡាការិនីទាំងនេះត្រូវហ្វឹកហាត់នៅសាធរណរដ្ឋកូរ៉េ រយៈពេល៣៤ថ្ងៃសិន។

កីឡាការិនីចំបាប់ ចូវ សុធារ៉ា ម្ចាស់មេដាយមាសស៊ីហ្គេមប្រចាំឆ្នាំ២០០៩ និង២០១៣ និងម្ចាស់មេដាយមាសស៊ីហ្គេមឆ្នាំ២០១៣ និងម្ចាស់មេដាយសំរិទ្ធកីឡាចំបាប់លើខ្សាច់អាស៊ីឆ្នាំ២០១៤ និ សំណាង នឹងធ្វើដំណើរឆ្លងដែនដើម្បីចូលរួមប្រកួតជម្រុះអូឡាំពិកនៅប្រទេស កាហ្សាក់ស្ថាន រយៈពេល៣ថ្ងៃចាប់ពីថ្ងៃទី១៨ ដល់ថ្ងៃទី២០ ខែមិនា ឆ្នាំ២០១៦ខាងមុខនេះ។ ការប្រកួតជម្រុះនេះមានប្រទេសនៅក្នុងតំបន់អាស៊ីជាច្រើនបានចូលរួមប្រកួតប្រជែង ហើយអ្នកដែលទទួលបានចំណាត់ថ្នាក់លេខ ១ និងលេខ ២ តាមប្រភេទវិញ្ញាសានីមួយៗ ទើបទទួលបានសិទ្ធិទៅប្រកួតកីឡាអូឡាំពិករដូវក្តៅនៅប្រទេសប្រេស៊ីល ខែសីហា ឆ្នាំ២០១៦។ នេះបើតាមការបញ្ជាក់របស់លោក ធិន វិចិត្រ អគ្គលេខាធិការសហព័ន្ធកីឡាចំបាប់កម្ពុជា។

លោក ធិន វិចិត្រ បានបញ្ជាក់ទៀតថា មុននឹងឈានដល់ការប្រកួតជម្រុះអូឡាំពិកនៅប្រទេសកាហ្សាក់ស្ថាន កីឡាការិនីទាំង២រូបនឹងហ្វឹកហាត់នៅប្រទេសកូរ៉េរយៈពេល៣៤ថ្ងៃចាប់ពីថ្ងៃទី៩ ខែកុម្ភៈ ដល់ថ្ងៃទី១៣ ខែមិនា ដើម្បីពង្រឹងសមត្ថភាព។ ការហ្វឹកហាត់នៅកូរ៉េនេះដែរ ចូវ សុធារ៉ា ទទួលរ៉ាប់រងការចំណាយគ្រប់បែបយ៉ាងដោយ IOC តាមរយៈ NOCC ព្រោះ កញ្ញា ទទួលបានអាហារូបករណ៍ពី NOCC។ ប៉ុន្តែសម្រាប់ និ សំណាង ដោយមានការជួយជ្រោមជ្រែងរបស់គ្រូបង្វឹកជម្រើសជាតិកម្ពុជា លោក Kim Soogil បន្ទាប់ពីលោកបានឃើញពីសក្តានុពល និងការខិតខំហាត់ពេលបោះជំរំហ្វឹកហាត់រយៈពេលមួយសប្តាហ៍នៅវៀតណាម កាលពីខែធ្នូ ឆ្នាំ២០១៥ កន្លងទៅនេះ។

គួរបញ្ជាក់ថា កីឡាការិនីម្ចាស់មេដាយមាសស៊ីហ្គេមឆ្នាំ២០០៩ និង២០១៣ ចូវ សុធារ៉ា ធ្លាប់ចូលរួមការប្រកួតជម្រុះអូឡាំពិកនៅប្រទេសកាហ្សាក់ស្ថាន ម្ដងហើយកាលពីឆ្នាំ២០១២ ដោយលទ្ធផលធ្លាក់ត្រឹមវគ្គជម្រុះលើកទី១ ។ ប៉ុន្តែវាជាលើកទីមួយហើយសម្រាប់ម្ចាស់មេដាយមាស និងម្ចាស់មេដាយសំរឹទ្ធកីឡាចំបាប់លើខ្សាច់ជើងឯកអាស៊ីឆ្នាំ២០១៤ ។ ហើយការចេញទៅហ្វឹកហាត់ និងការប្រកួតជម្រុះអូឡាំពិកនេះដែរ ក្នុងទិសដៅដើម្បីពង្រឹងសមត្ថភាព ដើម្បីចូលរួមប្រកួតលក្ខណៈអន្តរជាតិផ្សេងៗ ជាពិសេសការប្រកួតជើងឯកកីឡាឆ្នេរខ្សាច់ឆ្នាំ២០១៦ នៅវៀតណាម និងការប្រកួតកីឡាចំបាប់ជើងឯកអាស៊ាន ដែលកម្ពុជានឹងធ្វើជាម្ចាស់ផ្ទះនៅក្នុងខែវិច្ឆិកា ឆ្នាំ២០១៦ខាងមុន៕