ជាតិ
លោក ម៉ុង ឬទ្ធី បើកកិច្ច «ប្រជុំគ្រួសារ» រាល់ខែដើម្បីរកវិធីឲ្យកូនចៅចេះស្រឡាញ់គ្នា
× លោក ម៉ុង ឫទ្ធី អ្នកជំនួញ និងជាសមាជិកព្រឹទ្ធសភា ចង់បង្ហាញឲ្យឃើញថា លោកមិនត្រឹមតែបានជោគជ័យក្នុងអាជីវកម្ម និងជីវិតនយោបាយប៉ុណ្ណោះនោះទេ លោកក៏មានសុភមង្គលផងដែរនៅក្នុងក្រុមគ្រួសារ។ តាមរយៈហ្វេសប៊ុក លោកបានបញ្ជាក់ថា លោក និងភរិយា តែងតែហៅកូនបង្កើត និងកូនប្រសារទៅជួបជុំគ្នា ដើម្បីរកគ្រប់វិធីឲ្យពួកគេចេះស្រឡាញ់រាប់អានគ្នា រួបរួមសាមគ្គីគ្នា។
«ចាប់ពីម៉ោង៩ ដល់ម៉ោង១២ ថ្ងៃទី១ ខែកុម្ភៈ ឆ្នាំ២០១៦ មួយខែម្តង ខ្ញុំនិងភរិយា តែងតែហៅកូនបង្កើត និងកូនប្រសារមកជួបជុំគ្នា [ប្រជុំគ្រួសារ] ដើម្បីរកគ្រប់វិធីឲ្យពួកគេចេះស្រឡាញ់រាប់អានគ្នា រួបរួមសាមគ្គីគ្នាជាបន្តបន្ទាប់ទាន់ឪពុកម្តាយនៅរស់អាចហៅមកប្រជុំបាន»។ លោក ម៉ុង ឫទ្ធី បានសរសេរយ៉ាងដូច្នេះ នៅលើហ្វេសប៊ុកផ្លូវការរបស់ខ្លួន [ឯកឧត្ដមបណ្ឌិត ម៉ុង ឫទ្ធី H.E Oknha Mong Reththy] អមដោយរូបថត៩សន្លឹកទាក់ទងនឹងសកម្មភាពប្រជុំគ្រួសារ។
កិច្ចប្រជុំគ្រួសារនេះ ត្រូវបានលោក ម៉ុង ឫទ្ធី អះអាងថា លោក និងភរិយា មានក្តីកង្វល់ខ្លាចក្រែងប្អូនមិនស្តាប់បង ហើយបងក៏មិនស្តាប់ប្អូន ដូច្នេះថ្ងៃក្រោយមិនដឹងទៅជាយ៉ាងណានោះទេ ជាពិសេសនៅពេលអត់ពីឪពុកម្តាយ។
ទោះបីជាយ៉ាងណាក៏ដោយ លោកបានបង្ហាញនូវក្តីសង្ឃឹមថា៖ «បុណ្យកុសល្យដែលខ្ញុំបានសាងទាំងអស់កន្លងមកប្រាកដជាជួយឱ្យកូនៗខ្ញុំទាំអស់បានដើរតាមគន្លងរបស់ខ្ញុំដូចបំណងប្រាថ្នាជាក់ជាមិនខានឡើយ»។
លោក ម៉ុង ឫទ្ធី ដែលនឹងឈានដល់ការប្រារព្ធខួប៦២ឆ្នាំនាថ្ងៃទី១១ ខែកក្កដា ខាងមុខ គឺជាអ្នកជំនួញដ៏ល្បីឈ្មោះម្នាក់នៅកម្ពុជា។ លោកមានកូនប្រុស៣នាក់ និងកូនស្រី២នាក់។ លោក និងលោកស្រី ម៉ែន ស៊ុន ដែលជាភរិយា តែងតែបង្ហាញពីសកម្មភាពសប្បុរសធម៌របស់ខ្លួន ជាមួយប្រជាពលរដ្ឋក្រីក្រ៕
© រក្សាសិទ្ធិដោយ thmeythmey.com