លោក Jason Mohammad អ្នកអត្ថាធិប្បាយព័ត៌មាននៃកម្មវិធីសន្តិសុខសង្គម «Crime Watch» របស់ទូរទស្សន៍ BBC បានជួបរឿងដ៏ភ្ញាក់ផ្អើលមួយនាការផ្សាយផ្ទាល់កាលពីដើមសប្តាហ៍កន្លងមក។ លោក និង Sophie Jane Raworth ដែលជាគូក្នុងកម្មវិធី បានលើកយករឿងសន្តិសុខសង្គមមួយទាក់ទងនឹងករណីឃាតកម្ម ដោយឧក្រិដ្ឋជនមានមុខមាត់ដូចលោកបះបិទបំផុត។
កាលពីល្ងាចថ្ងៃចន្ទ កម្មវិធីសន្តិសុខសង្គម «Crime Watch» របស់ BBC បានលើកយកករណីឃាតកម្មមួយដែលបង្កឡើងដោយបុរសដើមកំណើតស្លូវ៉ាគី ឈ្មោះ Viktor Kakator ដែលត្រូវតុលាការផ្តន្ទាទោស១៨ឆ្នាំ ពីបទបង្ករបួសស្នាមលើស្ត្រីចំណាស់វ័យ៨៩ឆ្នាំម្នាក់រហូតដល់ស្លាប់។
អ្វីដែលគួរឲ្យកត់សម្គាល់នោះ មុខរបស់លោក Jason Mohammad ជនជាតិវេលស៍ និងមុខជនល្មើស Viktor Kakator គឺដូចគ្នាបះបិទ។ នៅពេលដែល Sophie Jane Raworth លើករឿងនេះមកអត្ថាធិប្បាយ លោក Jason ហាក់ដូចជាធ្វើជាមិនឃើញមុខជនល្មើស។ ទោះបីជាយ៉ាងណាក៏ដោយ លោក Jason បានអះអាងតាម Twitter ថា លោកបានមើលឃើញរូបនោះហើយ។