ជាតិ
ស.ស.យ.ក រកកិច្ចសហការនឹងអាជ្ញាធរអប្សរាសម្រាប់ព្រឹត្តិការណ៍អង្គរសង្ក្រាន្តឆ្នាំនេះ
× សៀមរាប៖ នៅសល់មិនដល់២ខែទៀតទេ ព្រឹត្តិការណ៍អង្គរសង្ក្រាន្តឆ្នាំ២០១៦ នឹងចាប់ផ្តើមរៀបចំសាជាថ្មីម្តងទៀត។ មិនខុសពីរាល់ឆ្នាំ ព្រឹត្តិការណ៍អង្គរសង្ក្រាន្ត ត្រូវបានរៀបចំនៅលើទឹកដីអង្គរ ខេត្តសៀមរាប។ ដើម្បីសម្រួលដល់ការរៀបចំព្រឹត្តិការណ៍សំខាន់នេះឲ្យរលូននោះ សហភាពសហព័ន្ធយុវជនកម្ពុជា (សសយក) បានស្វែងរកកិច្ចសហការជាមួយអាជ្ញាធរ ដើម្បីឲ្យដំណើរនៃការរៀបចំអង្គរសង្ក្រាន្ត ប្រព្រឹត្តិទៅភាពសប្បាយរីករាយ។
ប្រធានសហភាពសហព័ន្ធយុវជនកម្ពុជា លោក ហ៊ុន ម៉ានី បានជួបប្រជុំការងារជាមួយស្ថាប័នពីរនៅទីក្រុងសៀមរាប។ ទីមួយគឺសាលាខេត្តសៀមរាប លោក ហ៊ុន ម៉ានី បានជួបអភិបាលខេត្តសៀមរាប លោក ឃឹម ប៊ុនសុង។ ក្នុងជំនួបនេះ មិនខុសពីលើកមុនៗដែរ គឺលោក ហ៊ុន ម៉ានី ស្នើកិច្ចសហការពីអាជ្ញាធរដើម្បីរៀបចំសណ្តាប់ធ្នាប់ សន្តិសុខ ក្នុងអំឡុងពេលនៃព្រឹត្តិការណ៍អង្គរសង្ក្រាន្ត។ ជំនួបមួយទៀត គឺធ្វើឡើងនៅអាជ្ញាធរជាតិអប្សរា។ នៅអាជ្ញាធរជាតិអប្សរា លោក ហ៊ុន ម៉ានី ស្នើឲ្យស្ថាប័ននេះ ជួយសម្រួលរៀបចំទីតាំងមួយចំនួន ដើម្បីបង្កើតកម្មវិធីអង្គរសង្ក្រាន្ត។
ក្នុងបទបង្ហាញរបស់ស.ស.យ.ក នៅអាជ្ញាធរជាតិអប្សរា កាលពីថ្ងៃទី១៦ កុម្ភៈ មានកម្មវិធីចំនួន២៤ ដែលគ្រោងរៀបចំក្នុងព្រឹត្តិការណ៍អង្គរសង្ក្រាន្តឆ្នាំ២០១៦នេះ។ កម្មវិធីទាំងនោះ មានដូចជាកម្មវិធីសាសនា កម្មវិធីភូមិខ្ញុំ និម្មិតភូមិ របាំប្រពៃណី ល្បែងប្រជាប្រិយ គុនល្បុក្កតោ ពិព័រណ៍សិប្បកម្ម។ល។ អ្វីដែលពិសេស និងប្លែកជាងរាល់ឆ្នាំនោះ គឺការសម្តែងលោ្ខនបាសាក់រឿងនាងទិព្វសង្វារ និងកម្មវិធីសិល្បៈមួយចំនួនទៀត មានការតាំងពិព័រណ៍រូបគំនូរជាដើម។
លោក ហ៊ុន ម៉ានី មានសុទិដ្ឋិនិយមថា ព្រឹត្តិការណ៍អង្គរសង្ក្រាន្តនៅឆ្នាំនេះ នឹងពាំនាំនូវភាពសប្បាយរីករាយដល់ប្រជាពលរដ្ឋខ្មែរ ជាពិសេសឲ្យភ្ញៀវទេសចរកាន់តែច្រើនទៀត បានស្គាល់ និងចង់មកកម្សាន្តរមណីយដ្ឋានអង្គរ។ កាលពីឆ្នាំទៅ ព្រឹត្តិការណ៍អង្គរសង្ក្រាន្តទាក់ទាញភ្ញៀវទេសចរជាតិ និងអន្តរជាតិប្រមាណ១លាននាក់។ នេះបើតាមតួលេខរបស់ក្រសួងទេសចរណ៍។ «ព្រឹត្តិការណ៍អង្គរសង្ក្រាន្ត គឺធ្វើឡើងក្នុងបំណងផ្តល់ស្នាមញញឹម និងបង្កើតស្មារតីរួបរួមមហាគ្រួសារខ្មែរតែមួយ»។ នេះជាការបញ្ជាក់របស់លោក ហ៊ុន ម៉ានី។
អគ្គនាយកអាជ្ញាធរជាតិអប្សរា លោក ស៊ុំ ម៉ាប់ បានឲ្យដឹងថា អង្គរសង្ក្រាន្តជាផ្នែកមួយនៃការងារអភិរក្ស និងអភិវឌ្ឍន៍រមណីយដ្ឋានអង្គរ ហើយលោកគាំទ្រ និងសហការយ៉ាងពេញទំហឹងក្នុងការសម្រួល និងរៀបចំព្រឹត្តិការណ៍នេះក្នុងតំបន់អង្គរ។ ក្នុងនោះដែរ អាជ្ញាធរជាតិអប្សរា បានរៀបចំក្រុមការងាររួចរាល់ហើយដែរ ដើម្បីរៀបចំកម្មវិធីនិម្មិតភូមិ និងបានរៀបចំជួសជុលហេដ្ឋារចនាសម្ព័ន្ធមួយចំនួន ដើម្បីសម្រួលចរាចរណ៍ក្នុងកម្មវិធីអង្គរសង្ក្រាន្ត ដែលនឹងរៀបចំធ្វើក្នុងខែមេសាខាងមុខនេះ។
គួរបញ្ជាក់ថា ព្រឹត្តិការណ៍អង្គរសង្ក្រាន្ត បានរៀបចំចំនួន៣ដងរួចមកហើយ គឺចាប់ពីឆ្នាំ២០១៣មក។ ព្រឹត្តិការណ៍នេះបានទាក់ទាញភ្ញៀវទេសចរជាច្រើនឲ្យមកកម្សាន្តខេត្តសៀមរាប ក្នុងនោះនៅឆ្នាំ២០១៥ មានទេសចរប្រមាណ១លាននាក់ រកចំណូលបានប្រមាណ ៥០លានដុល្លារអាមេរិក ឆ្នាំ២០១៤ មានភ្ញៀវទេសចរប្រមាណ៣៨ម៉ឺននាក់ រកចំណូលបានជាង ៣០លានដុល្លារអាមេរិក ឆ្នាំ២០១៣ មានភ្ញៀវទេសចរប្រមាណ ១៨ម៉ឺននាក់៕
© រក្សាសិទ្ធិដោយ thmeythmey.com