ជាតិ
កម្ពុជាមានរថយន្តពន្លត់អគ្គិភ័យជាង១០០គ្រឿង និងកងកម្លាំងពន្លត់ជិត៦០០នាក់ រូបពីហ្វេសប៊ុកការិយាល័យនគរបាលពន្លត់អគ្គិភ័យ រាជធានីភ្នំពេញ
× ពីមួយឆ្នាំទៅមួយឆ្នាំ រដ្ឋាភិបាលតែងបង្កើនទាំងចំនួនរថយន្តពន្លត់អគ្គិភ័យ និងកម្លាំងសមត្ថកិច្ច ដើម្បីបង្ការនិងពន្លត់ការឆាបឆេះ ឲ្យមានប្រសិទ្ធភាពខ្ពស់។ យ៉ាងណាក៏ដោយចុះ រដ្ឋាភិបាលខ្លួនឯង នៅតែទទួលស្គាល់ថា ចំនួននៃការឆាបឆេះ នៅតែបន្តកើនឡើងដោយឥតថយចុះ។
នាពេលបច្ចប្បន្ននេះ កម្ពុជាមានរថយន្តពន្លត់អគ្គិភ័យចំនួន១២៨គ្រឿង និងកម្លាំងសមត្ថកិច្ចចំនួន៥៩៦នាក់ នៅតាមស្ថានីយពន្លត់អគ្គិភ័យទូទាំងប្រទេស។ នេះបើតាមរបាយការណ៍ឆ្នាំ២០១៥ របស់អគ្គស្នងការដ្ឋាននគរបាលជាតិ។
ដើម្បីទប់ស្កាត់ និងពន្លត់ការឆាបឆេះឲ្យកាន់តែមានប្រសិទ្ធខ្ពស់ រដ្ឋាភិបាលគ្រោងបង្កើនរថយន្តពន្លត់អគ្គិភ័យឲ្យបាន២០០គ្រឿងបន្ថែមទៀត នៅពេលខាងមុខ។ ម្យ៉ាងទៀត អគ្គស្នងការដ្ឋាននគរបាលជាតិ ដែលជាសេនាធិការរបស់ក្រសួងមហាផ្ទៃ ក៏បន្តបណ្តុះបណ្តាលមន្ត្រីពន្លត់អគ្គិភ័យ បន្ថែមទៀតដែរ ដោយសារតែរដ្ឋាភិបាលយល់ថា ចំនួនកម្លាំងពន្លត់អគ្គិភ័យក្នុងពេលបច្ចុប្បន្ននេះ នៅមិនទាន់គ្រប់គ្រាន់នោះទេ។
បើទោះបីជារដ្ឋាភិបាល ខិតខំពង្រឹងជំនាញបច្ចេកទេសដល់កម្លាំងសមត្ថកិច្ ចនិងបង្កើនរថយន្តពន្លត់អគ្គិភ័យពីមួយឆ្នាំទៅមួយក៏ពិតមែន តែចំនួននៃការឆាបឆេះ មិនបានថយចុះ នោះទេ។ ការឆាបឆេះនេះ បណ្តាលមកពីមូលហេតុមួយចំនួន ដូចជាការឆ្លងចរន្តអគ្គិសនី និងការតអគ្គិសនីមិនត្រឹមត្រូវតាមបច្ចេកទេស ព្រមទាំងការធ្វេសប្រហែសរបស់ប្រជាពលរដ្ឋ ក្នុងការប្រើប្រាស់ ភ្លើងទាន ធូប ឬចង្ក្រាន។ លើសពីនេះទៅទៀតនោះ ឧបសគ្គមួយចំនួន ដែលរាំងស្ទះដល់ការពន្លត់អគ្គិភ័យ នៅតែកើតមាន។
ថ្លែងក្នុងទិវាជាតិបង្ការ និងពន្លត់អគ្គិភ័យ កាលពីថ្លៃទី២២ កុម្ភៈ លោក ប៉ា សុជាតិវង្ស អភិបាលរាជធានីភ្នពេញ បានលើកឡើងថា រាល់ពេលចេញប្រតិបត្តិការនៃការពន្លត់អគ្គិភ័យ សមត្ថកិច្ចតែងជួបប្រទះនូវឧបសគ្គមួយចំនួនធំ ហើយឧបសគ្គទាំងនោះ តែងបង្កផលប៉ះពាល់ដល់បេសកកម្មនៃការពន្លត់អគ្គិភ័យ។ បញ្ហាទី១គឺការកកស្ទះចរាចរណ៍ ដែលបណ្តាលឲ្យទៅដល់កន្លែងកើតហេតុយឺតយ៉ាវ។ បញ្ហាទី២ សម្ភារបច្ចេកទេស និងមធ្យោបាយនៃការពន្លត់អគ្គិភ័យ នៅមិនទាន់ឆ្លើយតបទៅនឹងតម្រូវការ ជាពិសេសការបង្ការ និងការពន្លត់អគ្គិភ័យចំពោះអគារខ្ពស់ៗ។ បញ្ហាទី៣ ផ្លូវមួយចំនួនមានលក្ខណៈតូចចង្អៀត ដែលពិបាកដល់រថយន្តពន្លត់អគ្គិភ័យ ធ្វើដំណើរចេញចូល ដើម្បីធ្វើអន្តរាគមន៍ពន្លត់អគ្គិភ័យ ជាពិសេសតំបន់ដែលមានសំណង់មិនរៀបរយជាដើម។
សូមបញ្ជាក់ថា ក្នុងឆ្នាំ២០១៥ គ្រោះមហន្តរាយអគ្គិភ័យ បានកើតឡើងចំនួន ៥៩០ លើក កើនឡើងច្រើនជាង ឆ្នាំ២០១៤ ដោយឆ្នាំ២០១៤ បានកើតឡើងចំនួន ៥១៤ លើក និងបណ្តាលឲ្យមនុស្សសា្លប់ ៣៥នាក់, របួសធ្ងន់ស្រាល ២៨នាក់, ឆេះផ្ទះ៩៥៩ខ្នង, ឆេះតូបក្នុងផ្សារ ៤២១តូប, ឆេះឃ្លាំងស្តុកសម្ភារ ២, ឆេះយានដ្ឋាន ២៨, ឆេះក្លឹបកម្សាន្ត ១, ឆេះរថយន្ត១៨គ្រឿង, ឆេះគោយន្ត១០គ្រឿង ព្រមទាំងបំផ្លាញសម្ភារផ្សេងៗជាច្រើនទៀត។ នៅក្នុងរយៈពេលជិត២ខែ ដើមឆ្នាំ២០១៦នេះ អគ្គិភ័យបានកើតឡើងចំនួន ២លើក ដែលបណ្តាលឲ្យ មនុស្សរងរបួស២នាក់ ឆេះផ្ទះ៧៧ខ្នង, ឆេះឃ្លាំង១, ឆេះរថយន្ត៥គ្រឿង, ឆេះម៉ូតូ៤គ្រឿង៕
© រក្សាសិទ្ធិដោយ thmeythmey.com