ជាតិ
នយោបាយជាតិ
រដ្ឋាភិបាលនឹងបង្កើនប្រាក់បៀវត្សជូនភរិយានិងកូនរបស់មន្ត្រីរាជការ
× ប្រមុខរដ្ឋាភិបាលកម្ពុជា ប្រកាសដំឡើងប្រាក់ឧបត្ថម្ភជូនភរិយានិងកូនរបស់មន្ត្រីរាជការ ព្រមទាំងកងកម្លាំងប្រដាប់អាវុធ។ អ្នកតាមដានស្ថានការណ៍នយោបាយ បានសាទរចំពោះវិធានការនេះ។
ជាកាដូពិសេសរបស់រាជរដ្ឋាភិបាលកម្ពុជា ក្នុងទិវាសិទ្ធិនារីអន្តរជាតិ សម្តេច ហ៊ុន សែន បានប្រកាសបង្កើនប្រាក់បៀវត្សដល់ភរិយានិងកូន របស់មន្ត្រីរាជការ រួមទាំងកងកម្លាំងប្រដាប់អាវុធគ្រប់លំដាប់ថ្នាក់។ ប្រមុខរដ្ឋាភិបាល បានពិភាក្សាជាមួយរដ្ឋមន្ត្រីក្រសួងសេដ្ឋកិច្ចនិងរដ្ឋមន្ត្រីក្រសួងមុខងារសាធារណៈ រួចរាល់ហើយថា គម្រោងនេះ នឹងចាប់ផ្តើមអនុវត្ត ក្នុងឆ្នាំ២០១៦ ឬឆ្នាំ២០១៧ ។ ការថ្លែងរបស់នាយករដ្ឋមន្ត្រីបែបនេះ ធ្វើឡើងក្នុងពិធីប្រារព្ធខួបលើកទី១០៥ នៃទិវាសិទ្ធិនារីអន្តរជាតិ នៅវិមានសន្តិភាព នាពេលព្រឹកថ្ងៃទី៨ មីនានេះ។
សម្តេចបានបញ្ជាក់បែបនេះថា៖«បើមិនបានឆ្នាំនេះ នៅឆ្នាំ២០១៧ នឹងអាចដោះស្រាយបាន។ [.......] ហើយនៅឆ្នាំក្រោយនេះ ក្រសួងសេដ្ឋកិច្ច និងហិរញ្ញវត្ថុ ក៏ដូចជា សមាជិក សមាជិកានៃរាជរដ្ឋាភិបាល ត្រូវរៀបចំថវិកាយ៉ាងណាក៏ដោយ ដើម្បីបង្កើនឲ្យខានតែបាន ទោះតិចទោះច្រើន ចំពោះភរិយា និងកូនៗ របស់មន្ត្រីរាជការនិងកងកម្លាំងប្រដាប់អាវុធរបស់យើង»។
យ៉ាងណាក៏ដោយចុះ នាយករដ្ឋមន្ត្រីរូបនេះ មិនបានបញ្ជាក់ថា ប្រាក់ឧបត្ថម្ភសម្រាប់ភរិយានិងកូនរបស់មន្ត្រីរាជការនេះ នឹងត្រូវបង្កើនប៉ុន្មាននោះទេ តែលោកអះអាងថា រាជរដ្ឋាភិបាលនឹងបន្ថែមប្រាក់ឧបត្ថម្ភឲ្យបានសមរម្យ សម្រាប់ជីវភាពប្រចាំថ្ងៃ។
សាស្ត្រាចារ្យផ្នែកវិទ្យាសាស្ត្រនយោបាយ លោក សូ ចន្ថា បានសម្តែងការត្រេកអរ ដែលរាជរដ្ឋាភិបាលកម្ពុជា យកចិត្តទុកដាក់ចំពោះជីវភាពរបស់ភរិយានិងកូនមន្ត្រីរាជការ។ លោកថា ការបន្ថែមប្រាក់ឧបត្ថម្ភនេះ នឹងអាចធានានូវការចាយវាយប្រចាំថ្ងៃរបស់ពួកគេ ព្រមទាំងធ្វើឲ្យជីវភាពមានលំនឹង ផងដែរ។
ទន្ទឹមនឹងការស្វាគមន៍នេះ លោក សូ ចន្ថា ក៏បានស្នើឲ្យរាជរដ្ឋភិបាលពង្រឹងគណនេយ្យភាពនិងតម្លាភាពនៅគ្រប់ស្ថាប័នរបស់រដ្ឋ ដើម្បីធានាថា ការអនុវត្តគម្រោងនេះ នឹងដំណើរដោយរលូន។ អ្នកតាមដានស្ថានការណ៍នយោបាយរូបនេះ បានបន្ថែមថា ដើម្បីចៀសវាងការជួបបញ្ហា នៅពេលដំឡើងប្រាក់ឧបត្ថម្ភ រដ្ឋាភិបាលត្រូវព្យាយាមលុបបំបាត់នូវអំពើពុយរលួយឲ្យបាន ជាពិសេសទាក់ទងនឹងការប្រមូលពន្ធដារ តែម្តង៕
Tag:
ហ៊ុន សែន
ប្រាក់បៀវត្ស
© រក្សាសិទ្ធិដោយ thmeythmey.com