អន្តរជាតិ
នយោបាយអន្តរជាតិ
លោក ជុងអ៊ុន បញ្ជាសមយុទ្ធយោធា សមការវាយកម្ទេចវិមានប្រធានាធិបតីលោកស្រីផាក
×
ប្រមុខដឹកនាំពូលកូរ៉េខាងជើង លោក គីម ជុងអ៊ុន មិនត្រឹមចេញការព្រមានដើម្បីកម្ទេចកូរ៉េខាងត្បូង ប៉ុណ្ណោះនោះទេ តែពេលនេះ មេដឹកនាំវ័យក្មេងរូបនេះ ចាប់ផ្តើមចេញសកម្មភាពយោធាជាបណ្តើរៗហើយ។ លោក គីម ជុងអ៊ុន បានបញ្ជា និងណែនាំយោធាធ្វើសមយុទ្ធដើម្បីសមដែលជាគម្រោងនៃការកម្ទេចវិមានប្រធានាធិបតីកូរ៉េខាងត្បូងលោកស្រី ផាក ហ្គឺនហេ។
លោកគីម ជុងអ៊ុន មេបញ្ជាការកំពូលនៃកងទ័ពប្រជាជនកូរ៉េ, អគ្គលេខាទី១នៃបក្សកម្មករកូរ៉េ និងជា ប្រមុខនៃគណៈកម្មាធិការការពារជាតិកូរ៉េខាងជើង នៅព្រឹកថ្ងៃទី២៥ ខែមីនា នេះ បានណែនាំ និងតាម ដានការធ្វើសមយុទ្ធយោធាបាញ់គ្រាប់ផ្លោងចម្ងាយឆ្ងាយដែលជាសមយុទ្ធទ្រង់ទ្រាយធំមួយប្រឆាំងកូរ៉េខាងត្បូង និងអាមេរិក។
សមយុទ្ធបាញ់គ្រាប់ផ្លោងកូរ៉េខាងជើងដែលត្រូវបានបញ្ជា និងតាមដានយ៉ាងស្វិតស្វាយដោយលោក គីម ជុងអ៊ុន គឺជាសមយុទ្ធមួយដែលរួមបញ្ចូលនូវប្រភេទអាវុធជាច្រើនដើម្បីឆ្លើយតបទៅនឹងសមយុទ្ធយោធារបស់អាមេរិក និងកូរ៉េខាងត្បូងនៅក្នុងឧបទ្វីបកូរ៉។ នេះបើយោងតាមភ្នាក់ងារព័ត៌មានកូរ៉េខាងជើង KCNA ដែលបានដកស្រង់សម្តី លោក គីម ជុងអ៊ុនដែលថា «ប្រសិនបើសត្រូវប្រជែងយើង គ្រាប់ផ្លោងដែលជាកម្លាំងវាយបករបស់យើង នឹងឆ្ពោះទៅរកក្រុងសេអ៊ូលឲ្យទៅស្ថិតនៅក្នុងអណ្តាតភ្លើងតែម្តង» ។
តាមពិតទៅសមយុទ្ធយោធា និងការចល័តយោធារបស់កូរ៉េខាងជើង មិនមែនជារឿងថ្មីនោះទេ ពោលគឺ កូរ៉េខាងជើងតែងតែបញ្ចេញសកម្មភាពទាំងនេះ ដែលស្ទើរតែក្លាយជាទម្លាប់មួយទៅហើយ។
សូមបញ្ជាក់ផងដែរថា កូរ៉េខាងត្បូង និងអាមេរិក បានចាប់ផ្តើមធ្វើសមយុទ្ធយោធាប្រចាំឆ្នាំរបស់ខ្លួនចាប់ពីថ្ងៃទី០៧ ខែមីនា ដល់ថ្ងៃទី៣០ ខែមេសា។ សមយុទ្ធទ្រង់ទ្រាយធំ ដែលបានធ្វើឡើងក្នុងសា្ថនភាពតានតឹងនេះ បានធ្វើឲ្យកូរ៉េខាងជើងប្រតិកម្មយ៉ាងខ្លាំង ដោយថែមទាំងព្រមានកម្ទេចវិមានប្រធានា ធិបតីកូរ៉េខាងត្បូង លោកផាក ហ្គឺនហេទៀតផង។
បើទោះជាការគំរាមរបស់កូរ៉េខាងជើង មិនមែនជារឿងថ្មីក៏ដោយ កូរ៉េខាងត្បូង ក៏មិនបានព្រងើយ កន្តើយជាមួយនឹងកូរ៉េខាងជើងដែរ។ ជាក់ស្តែងនោះ លោកស្រីប្រធានធិបតីកូរ៉េខាងត្បូង ផាក ហ្គឺនហេ នៅថ្ងៃទី២៤ ខែមីនា បានដាក់បញ្ជាឲ្យកងកម្លាំងជាតិកូរ៉េខាងត្បូងទាំងអស់ត្រូវតែរក្សាការត្រៀមខ្លួនជាស្រេចដើម្បីឆ្លើយតបនឹងសកម្មភាពបង្កហេតុរបស់កូរ៉េខាងជើង។ នេះបើយោងតាមភ្នាក់ព័ត៌មាន Xinhua ដែលបានបន្ថែមដែរថា លោកស្រីប្រធានាធិបតី ក៏បានស្នើឲ្យប្រជាជនមានការប្រុងប្រយ័ត្ន និង ត្រៀមខ្លួនចំពោះស្ថានបន្ទាន់បច្ចុប្បន្នណាមួយដែលអាចកើតឡើង។
សូមបញ្ជាក់ផងដែរថា ស្ថានភាពនៅក្នុងឧបទ្វីបកូរ៉េបច្ចុប្បន្ន គឺប្រៀបប្រដូចទៅនឹង«ច្រកចូលនៃសង្គ្រា ម» ពោលគឺសង្គ្រាមអាចកើតឡើងគ្រប់ពេល ដ្បិតភាគីទាំងសងខាង ហាក់ដូចជាត្រៀមខ្លួនរួចជាស្រេចទៅហើយសម្រាប់ការប្រយុទ្ធ។ ជាពិសេសនោះគឺ កូរ៉េខាងជើង ដែលតែងតែបង្អួតសាច់ដុំខ្លួន តាមរយៈការបាញ់មីស៊ីលជាបន្តបន្ទាប់ ដែលបានបំពាននឹងបម្រាមរបស់អង្គការសហប្រជាជាតិ៕
© រក្សាសិទ្ធិដោយ thmeythmey.com