អន្តរជាតិ
នយោបាយអន្តរជាតិ
បក្សកាន់អំណាចមីយ៉ាន់ម៉ា ដាក់សំណើច្បាប់សុំតែងតាំងលោកស្រីស៊ូជី ជា«ទីប្រឹក្សាកំពូលរដ្ឋ» លោកស្រីស៊ូជី ប្រមុខបក្សកាន់អំណាច និងជាសមាជីកគណៈរដ្ឋមន្ត្រីថ្មីមីយ៉ាន់ម៉ា
×
ប្រមុខបក្សសម្ព័ន្ធជាតិដើម្បីប្រជាធិបតេយ្យលោកស្រី អ៊ុងសាន ស៊ូជី ក្លាយជារដ្ឋមន្ត្រីនៃក្រសួងបួននៃ គណៈរដ្ឋមន្ត្រីថ្មីរបស់លោកប្រធានាធិបតីមីយ៉ាន់ម៉ា ធិន ច។ តែរឿងគួរកត់សម្គាល់នោះ ក្រៅពីតួនាទី ទាំងនេះ បក្សកាន់អំណាចនេះ ក៏បានដាក់សំណើច្បាប់ថ្មីមួយទៀតដើម្បីសុំតែងតាំងលោកស្រីស៊ូជី ក្នុងតំណែងថ្មីខ្ពស់ជាងនេះទៀត ដែលនឹងត្រូវជជែកនៅថ្ងៃស្អែកនេះផងដែរ។
បក្សកាន់អំណាចសម្ព័ន្ធជាតិដើម្បីប្រជាធិបតេយ្យ បានដាក់សំណើ នៃសេចក្តីព្រាងច្បាប់ថ្មីមួយទៅ សភាសហភាពមីយ៉ាន់ម៉ាដើម្បីសុំតែងតាំងលោកស្រី អ៊ុងសាន ស៊ូជី ជា «ទីប្រឹក្សាកំពូល» ឬ «ទីប្រឹក្សារដ្ឋ»។ សំណើនេះ ត្រូវបានបង្ហាញឡើងក្នុងថ្ងៃព្រហស្បតិ៍ ទី៣១ ខែមីនានេះ ដែលជាថ្ងៃដំបូងហើយនៃការឡើងកាន់អំណាចរបស់រដ្ឋាភិបាលថ្មីបក្សសម្ព័ន្ធជាតិដើម្បីប្រជាធិបតេយ្យ។
ជាទីប្រឹក្សារដ្ឋ លោកស្រីស៊ូជី អាចផ្តល់យោបល់ទាក់ទងនឹងផលប្រយោជន៍របស់ប្រជាជន និងប្រទេស ជាតិ ដោយមិនផ្ទុយទៅនឹងរដ្ឋធម្មនុញ្ញឡើយ ហើយ លោកស្រី មានលទ្ធភាពសហការជាមួយគ្រប់ស្ថាប័នរបស់រដ្ឋាភិបាល និងគ្រប់រាល់បុគ្គលពាក់ព័ន្ធដើម្បីសម្រេចគោលដៅរបស់លោកស្រី។ នេះបើ យោងតាមសារព័ត៌មាន Irrawaddy ដែលបានដកស្រង់ខ្លឹមសារចេញពីសំណើនោះ ដែលបានបន្ថែម ដែរថាអាណត្តិនៃទីប្រឹក្សារដ្ឋនេះ គឺស្មើនឹងអាណត្តិប្រធានាធិបតីពោលគឺបើសេចក្តីព្រាងច្បាប់នោះ ត្រូវសភាអនុម័តនោះ អាណត្តិលោកស្រីស៊ូជី នឹងត្រូវបញ្ចប់នៅឆ្នាំ២០២១។
ជាមួយគ្នានេះ លោក Phyu Phyu Thin តំណាងរាស្ត្របក្សកាន់អំណាចសម្ព័ន្ធជាតិដើម្បីប្រជាធិបតេយ្យ ក៏បានអះអាងដែរថា ជាទីប្រឹក្សារដ្ឋ អាចជាតំណែងដែលខ្ពស់ជាងគេនៅក្នុងប្រទេស ហើយបើវាបង្ហាញដូច្នោះមែន នោះលោកស្រីស៊ូជី គឺជាប្រៀបដូចនឹងប្រមុខរដ្ឋ។ នេះបើយោងប្រភពព័ត៌មាន ដដែលដែលបានដកស្រង់សម្តីតំណាងនោះដែរថា ប្រសិនការបង្ហាញនោះ ពិតជាត្រឹមត្រូវមែននោះ ច្បាប់នោះ នឹងធ្វើឲ្យមានភាពចម្រូងចម្រាសនៃរដ្ឋធម្មនុញ្ញហើយ។
យោងតាមមាត្រា៥៨នៃរដ្ឋធម្មនុញ្ញមីយ៉ាន់ម៉ា ប្រធានាធិបតីនៃសាធារណរដ្ឋសហភាពមីយ៉ាន់ម៉ា មាន អំណាចអទិភាពលើគ្រប់បុគ្គលទូទាំងប្រទេសនៃសាធារណរដ្ឋសហភាពមីយ៉ាន់ម៉ា។
យ៉ាងណាក៏ដោយ សំណើច្បាប់នេះ ធ្វើឡើងក្រោយតែមួយថ្ងៃប៉ុណ្ណោះនៃការចូលកាន់តំណែងជាផ្លូវការរបស់លោកស្រីអ៊ុងសាន ស៊ូជី នៅក្នុងគណៈរដ្ឋមន្ត្រីថ្មីដែលលោកស្រី កាន់តំណែងជារដ្ឋមន្ត្រីនៃ ក្រសួងបួនរួមមានក្រសួងការបរទេស ក្រសួងអប់រំ ក្រសួងការិយាល័យប្រធានាធិបតីនិងក្រសួងអគ្គិសនី និងថាមពល។ នេះមានន័យថា ប្រសិនច្បាប់នេះ អាចត្រូវសភាអនុម័តមែននោះលោកស្រីស៊ូជី នឹងត្រូវទទួលបានតំណែងបន្ថែមពីរដ្ឋមន្ត្រីនៃក្រសួងបួន និងជាប្រមុខបក្សកាន់អំណាចទៀតផង។
អ្វីដែលគួរកត់សម្គាល់នោះ ការកាន់កាប់តួនាទីរបស់លោកស្រី ត្រូវបានគេផ្ទៀងផ្ទាត់ជាមួយនឹងការអះអាងរបស់លោកស្រីកន្លងមក ដែលថា បើទោះបីជាលោកស្រី មិនអាចឡើងកាន់តំណែងជាប្រធានាធិបតីមីយ៉ាន់ម៉ាក៏ដោយ លោកស្រី នឹងមាន«តំណែងខ្ពស់ជាងប្រធានាធិបតីទៅទៀត»។ លោកស្រី ស៊ូជី មិនអាចមានបេក្ខភាពជាប្រធានាធិបតីបានឡើយ ដ្បិតមានការហាមឃាត់ពីមាត្រា៥៩ នៃរដ្ឋធម្មនុ ញ្ញមីយ៉ាន់ម៉ា៕
© រក្សាសិទ្ធិដោយ thmeythmey.com