ជាតិ
កម្មវិធី «ស្រុកយើង» បង្ហាញពីម្ហូប១០តំបន់ក្នុងប្រទេសកម្ពុជា រូបភាពពីហ្វេសប៊ុក សមាជិកសមាគមចុងភៅកម្ពុជា
× សៀមរាប៖ កម្មវិធី ស្រុកយើង គឺជាកម្មវិធីមួយថ្មីនៅក្នុងព្រឹត្តិការណ៍អង្គរសង្ក្រាន្តឆ្នាំ២០១៦នេះ។ កម្មវិធីស្រុកយើង នឹងបង្ហាញពីមុខម្ហូបចំនួន១០តំបន់ ដែលមាននៅក្នុងប្រទេសកម្ពុជា។
សូមស្ដាប់ព័ត៌មានលម្អិត៖
ស្រុកយើង គឺជាកម្មវិធីថ្មីមួយនៃព្រឹត្តិការណ៍អង្គរសង្ក្រាន្តឆ្នាំ២០១៦ ។ តាមគម្រោង កម្មវិធីនេះនឹងរៀបចំធ្វើនៅទីលានជល់ដំរី លើផ្ទៃដីជាងមួយហិកតា។ គោលបំណងនៃកម្មវិធីស្រុកយើង គឺដើម្បីចូលរួមលើកតម្កើងលក្ខណៈពិសេសនៃអត្តសញ្ញាណភូមិសាស្ត្រ វប្បធម៌ នៃប្រទេសកម្ពុជា ដោយផ្តោតលើការកម្សាន្តជាមួយនឹងការរៀបចំអាហារទទួលទាន ការសម្រាកលំហែកាយ នៅលើទីលានជល់ដំរី ដោយផ្សារភ្ជាប់ទំនាក់ទំនងជាលក្ខណៈមហាគ្រួសារខ្មែរ។ ក្នុងនោះដែរ ក៏ដើម្បីបំពេញបន្ថែមដល់ការស្វែងយល់ពីអត្តសញ្ញាណភូមិសាស្ត្រ វប្បធម៌ និងធម្មជាតិខ្មែរផងដែរ។
កម្មវិធីស្រុកយើង នឹងធ្វើការបង្ហាញមុខម្ហូបចំនួន១០តំបន់ក្នុងប្រទេសកម្ពុជា សម្រាប់ជាការស្វែងយល់ និងអាចឲ្យប្រជាពលរដ្ឋអាចហូបអាហារទាំងនោះផង។ នេះបើតាមការឲ្យដឹងពីលោក ឡុង បូរ៉ា។ លោក បូរ៉ា ដែលជាប្រធានសមាគមចុងភៅកម្ពុជាបានបន្ថែមថា តំបន់ដែលជ្រើសរើសសម្រាប់ដាក់បង្ហាញមុខម្ហូបក្នុងព្រឹត្តិការណ៍អង្គរសង្ក្រាន្តរយៈពេល៤ថ្ងៃ រួមមាន តំបន់មាត់សមុទ្រ មានម្ហូបដូចជាមឹក ងាវ បង្កង និងទឹកត្រីកោះកុង។ តំបន់ភ្នំក្រវ៉ាញ ដែលមានដូចជា ឆាក្រវ៉ាញ ជ្រក់ត្រពាំង ត្រីងៀត ប្រហុកខ្ទិះ ។ល។ ចំណែកតំបន់ទំនាបពាយ័ព្យ មានសាច់ក្រក ណែម បុកអំពឹស សង្វាក់ និងមីកូឡា តំបន់បឹងទន្លេសាប មាន ផ្អក មុំា ។ល។ តំបន់ភ្នំដងរែក មានមាន់ដុត ប្រហុកអង្ក្រង មុំាឆៅត្រីរ៉ស់ និងចង្រិតបំពង តំបន់ទំនាបចតុមុខ មានទឹកគ្រឿង អាម៉ុក នំបញ្ចុក ម្ជូរគ្រឿង កកូរ ខ្នប់កូនត្រី។ ចំពោះតំបន់មេគង្គលើ មានក្រឡាន ឡាប និងសាច់គោងៀត តំបន់ទំនាបកណ្តាល មានខ្យងចំហុយ បង្កងអាំង ជ្រក់ផ្កាស្នោ ទឹកត្នោតជូរ។ល។ តំបន់ដីក្រហម មានអាពីង ត្រីឆ្អើរ បុកសណ្តែកកូរត្រីឆ្អើរ ក្រួចបំពង និងតំបន់ខ្ពង់រាបឦសាន មានស្រាឪទិន ភ្លាសាច់គោ មាន់បុក សំបុកឃ្មុំ និងសម្លបុក ឫសម្លប៉ង់ ដែលសុទ្ធសឹងជាម្ហូបប្រចាំតំបន់មួយៗក្នុងប្រទេសកម្ពុជា។
បើតាមលោក ឡុង បូរ៉ា ក្រៅពីការដាក់តាំងបង្ហាញម្ហូបប្រចាំតំបន់ទាំង១០ក្នុងប្រទេសហើយនោះ កម្មវិធីស្រុកយើង ក៏មានការដាក់លក់មុខម្ហូបខាងលើក្នុងតម្លៃសមរម្យផងដែរ។ លោក បូរ៉ាបញ្ជាក់ថា តម្លៃគឺចាប់ពី១ម៉ឺនរៀលឡើងទៅ ដែលប្រជាពលរដ្ឋខ្មែរគ្រប់រូបអាចចូលពិសាបានដោយក្តីសប្បាយរីករាយ និងដែលចម្អិតដោយចុងភៅចំណានៗក្នុងខេត្តសៀមរាប។
គួរបញ្ជាក់ថា ម្ហូបតំណាងតំបន់នីមួយៗ ត្រូវបានស្រាវជ្រាវដោយខាងសហភាពសហព័ន្ធយុវជនកម្ពុជា។ កម្មវិធីស្រុកយើង រៀបចំឡើងដោយខាងយុវជន និងមានកិច្ចសហការជាមួយសមាគមចុងភៅកម្ពុជា និងមានការគាំទ្រពីខាងសណ្ឋាគារ ភោជនីយដ្ឋានជាង១០នៅទីក្រុងសៀមរាប៕
Tag:
អង្គរសង្ក្រាន្តឆ្នាំ២០១៦
© រក្សាសិទ្ធិដោយ thmeythmey.com