ជាតិ
នយោបាយជាតិ
ACU ថា លោក ស៊ុត ឌីណា មានលុយជាង ៧ លានដុល្លារ និងមាស ៣៣៩ តម្លឹង
×
អង្គភាពប្រឆាំងអំពើពុករលួយ បានចេញសេចក្តីប្រកាសព័ត៌មាននៅមុននេះបន្តិចថា លោក ស៊ុត ឌីណា មានលុយក្រៅធនាគារចំនួន ៧,២ លានដុល្លារ និងមាសចំនួន ៣៣៩ តម្លឹង ស្មើនឹង ១២,៧៤ គីឡូក្រាម។ សេចក្តីប្រកាសព័ត៌មានរបសអង្គភាពនេះ ដើម្បីឆ្លើយតបនឹងអ្នកលេងហ្វេសប៊ុកមួយចំនួនដែលផ្សព្វផ្សាយថាលោក ស៊ុត ឌីណា ក្រីក្រណាស់។
លោក ស៊ុត ឌីណា ឯកអគ្គរាជទូតកម្ពុជាប្រចាំនៅសាធារណៈរដ្ឋកូរ៉េខាងត្បូង មានលុយក្រៅធនាគារចំនួន ៧,២ លានដុល្លារ និងមានមាសចំនួន ៣៣៩ តម្លឹង។ នេះជាដំណឹងដ៏គួរឲ្យភ្ញាក់ផ្អើល ដែលបានបញ្ចេញតាមរយៈសេចក្តីប្រកាសព័ត៌មានរបស់អង្គភាពប្រឆាំងអំពើពុករលួយនៅរសៀលនេះ។ អង្គភាពប្រឆាំងអំពើពុករលួយ(ACU) បានបញ្ជាក់ថា លោក ស៊ុត ឌីណា បានចាកចេញពីប្រទេសកម្ពុជាទៅធ្វើជាឯកអគ្គរាជទូតកម្ពុជាប្រចាំនៅប្រទេសកូរ៉េខាងត្បូង នៅថ្ងៃទី ៧ ខែកុម្ភៈ ឆ្នាំ ២០១៤ ដែលមកដល់ពេលនេះ មានរយៈពេល ២ ឆ្នាំ ១ ខែ ហើយក្នុងរយៈពេលនេះ លោក ស៊ុត ឌីណា បានជិះយន្តហោះមកភ្នំពេញចំនួន ២១ ដង។ បើតាមសេចក្តីប្រកាសដដែល មុននឹងទៅធ្វើជាឯកអគ្គរាជទូត ពោលនៅឆ្នាំ ២០១៣ លោក ស៊ុត ឌីណាមានលុយចំនួន ៤,២ លានដុល្លារអាមេរិក ហើយក្រោយពីលោក ស៊ុត ឌីណា កាន់តំណែងជាឯកអគ្គរាជទូត បាន ២ ឆ្នាំ សាច់ប្រាក់កើនឡើងចំនួន ៣ លានដុល្លារ។
អង្គភាពប្រឆាំងអំពើពុករលួយ ក៏ចោទប្រកាន់អ្នកលេងហ្វេសប៊ុកមួយចំនួន ដែលថតរូបភាពផ្ទះមិនល្អ និងយករូបថតលោក ស៊ុត ឌីណា ដែលហូបបាយកំសត់ក្រីក្រ យកមកផ្សព្វផ្សាយ ថាជាដៃជើង និងទទួលប្រាក់ខែពីលោក ស៊ុត ឌីណា។ ACU ចាត់ទុកសកម្មភាពនេះថា ជាការបំភ័ន្តមតិសាធារណៈ។ ជាមួយគ្នា អង្គភាពនេះ បានរកឃើញថា លោក ស៊ុត ឌីណា មានប្រវត្តិអាពាហ៍ពិពាហ៍អាថ៌កំបាំង ហើយលោក ស៊ុត ឌីណា ស្នើសុំACU មិនឲ្យផ្សព្វផ្សាយជាសាធារណៈ។
សេចក្តីប្រកាសព័ត៌មានរបស់អង្គភាពនេះ ធ្វើឡើងស្របពេលដែលលោក ស៊ុត ឌីណា ឯកអគ្គរាជទូតកម្ពុជាប្រចាំនៅប្រទេសកូរ៉េ កំពុងឆ្លើយបំភ្លឺនៅតុលាការតាំងពីព្រឹក ដែលមកដល់ពេលរសៀលថ្ងៃទី ៧ ខែមេសានេះ មិនទាន់ចប់នោះឡើយ។
នៅរសៀលម៉ោង ៣ នេះ លោក ឱម យ៉ិនទៀង ក៏ប្រកាសធ្វើសន្និសីទកាសែត បកស្រាយជុំវិញករណីលោក ស៊ុត ឌីណា នេះដែរ៕
© រក្សាសិទ្ធិដោយ thmeythmey.com