អន្តរជាតិ
នយោបាយអន្តរជាតិ
រុស្ស៊ីបារម្ភពេល ក្រុមរដ្ឋ ISបង្កើនកម្លាំងច្រើននៅអាហ្វហ្កានីស្ថាន
×![]()
ដោយ: ថ្មីៗ
មន្ត្រីជាន់ខ្ពស់រុស្ស៊ីបានអះអាងថា ក្រុមរដ្ឋឥស្លម ឬក្រុមដែស្ហ (Daesh) បង្កើនកម្លាំងកាន់តែច្រើននៅក្នុងប្រទេសអាហ្វហ្កានីស្ថាន។ក្រុមនេះកាន់កាប់ខេត្ត ២៥ ក្នុងចំណោមខេត្តទាំងអស់ ៣៤ ចាប់តាំងពីឆ្នាំ ២០១៥ មកម្ល៉េះ។ ទឹកដីដែលធ្លាប់ស្ថិតក្រោមការកាន់កាប់ដោយក្រុមតាលីបង់នោះបានក្លាយជាឋានសួគ៌សម្រាប់ក្រុមដែស្ហ ហើយវានឹងក្លាយជាទីតាំងយុទ្ធសាស្ត្រសម្រាប់ក្រុមនេះពង្រីកបណ្តាញខ្លួនទៅតំបន់ផ្សេងទៀតដែរ។
ក្នុងបទសម្ភាសន៍ជាមួយសារព័ត៌មានកាហ្សាក់ស្ថានថ្ងៃព្រហស្បតិ៍ទី ៧ មេសា ម្សិលមិញ លោក Grigory Karasin អនុរដ្ឋមន្ត្រីការបរទេសរុស្ស៊ីបានលើកឡើងថាក្រុមភេរវជនរដ្ឋឥស្លាមឬក្រុមដែស្ហ កំពុងបន្តប្រមែរប្រមូលក្រុមអ្នកគាំទ្រខ្លួនពីតំបន់អាស៊ីកណ្តាលមកចូលរួមជាមួយខ្លួននៅប្រទេសអាហ្វហ្កានីស្ថាន។
បើតាមមន្ត្រីជាន់ខ្ពស់រុស្ស៊ីនេះ ក្រុមអ្នកគាំទ្ររបស់ភេរវជនដែស្ហនេះត្រូវបានគេរកឃើញនៅក្នុងខេត្តចំនួន ២៥ ក្នុងចំណោមខេត្តទាំង ៣៤របស់អាហ្វហ្កានីស្ថាន ដែលមានន័យថា ក្រុមនេះមានបណ្តាញស្ទើរតែទូរទាំងប្រទេសអាហ្វហ្កានីស្ថានទៅហើយ។ កាលពីដើមឆ្នាំ ២០១៥ កន្លងទៅ មានរបាយការណ៍មួយបង្ហាញថា ក្រុមដែស្ហនេះប្រកាសបង្កើតរដ្ឋឥស្លាម Khorasan ដែលស្ថិតលើទឹកដីប៉ាគីស្ថាននិងអាហ្វហ្កានីស្ថាន ហើយក្រុមនេះតែតាំង Hafiz Saeed Khan ជាមេដឹកនាំក្រុមប្រចាំអាស៊ីកណ្តាល។
ក្រុមសកម្មយុទ្ធភាគច្រើនដែលចូលរួមជាមួយក្រុមនេះ ជាប្រជាជនដែលរស់នៅក្នុងតំបន់អាស៊ីកណ្តាល ក្នុងនោះមានប្រទេសកៀហ្ស៊ីស្ថាន, អ៊ូសបេគីស្ថាន, តាហ្ស៊ីគីស្ថាន, និងទឹកដី Caucus ភាគខាងជើងរបស់រុស្ស៊ីផងដែរ។
អ្នកការទូតរុស្ស៊ីរូបនេះក៏កត់សម្គាល់ផងដែរថា ក្រុមតាលីបង់ក៏នៅតែមានលទ្ធភាពប្រយុទ្ធប្រឆាំងទាហានរដ្ឋាភិបាលក្រុងកាប៊ុល និងអាចដណ្តើមកាន់កាប់ទឹកដីបានច្រើផងដែរ។ នៅចុងឆ្នាំ ២០១៥ ក្រុមនេះបានដណ្តើមកាន់កាប់ទីក្រុង Kunduz ថែមទៀត។
អាហ្វហ្កានីស្ថានទីកន្លែងសំខាន់សម្រាប់ក្រុមភេរវជននេះ ដ្បិតថា ប្រទេសនេះមិនទាន់ស្គាល់សន្តិភាពពេញលេញទេ។ ការចរចារវាងរដ្ឋាភិបាលក្រុងកាប៊ុលជាមួយក្រុមតាលីបង់ ក៏នៅជាប់ទ្រឹង ហើយកងទ័ពអាមេរិកនិងសម្ព័ន្ធមិត្តចាកចេញពីទឹកដីនេះបន្តិចម្តងៗជិតអស់ដែរ។ បើក្រុមនេះពង្រឹងកម្លាំងរបស់ខ្លួនបានជោគជ័យ វានឹងឈានទៅពង្រីកបណ្តាញរបស់ខ្លួននៅតំបន់ជិតខាង ហើយបញ្ហានឹងកាន់តែស្មុគស្មាញ ហើយគ្រោះថ្នាក់កាន់តែខ្លាំង។
ពាក់ព័ន្ធការកើនឡើងនៃគ្រោះថ្នាក់បង្កឲ្យក្រុមភេរវជនរដ្ឋឥស្លាមនេះ អនុរដ្ឋមន្ត្រីរុស្ស៊ីខាងលើក៏បានអំពាវនាវឲ្យមានការប្រឹងប្រែងកាត់ផ្តាច់ឲ្យបាននូវលំហូរហិរញ្ញវត្ថុរបស់ក្រុមភេរវជនដែលអនុលោមតាមដំណោះស្រាយក្រុមប្រឹក្សាសន្តិសុខអង្គការសហប្រជាជាតិ។ ការប្រឆាំងភេរវកម្មមិនអាចសម្រេចបានឡើយបើគ្មានការកាត់ផ្តាច់ចំណូលរបស់ក្រុមនេះ។ លោក Grigory Karasin ក៏ស្នើឲ្យប្រទេសពាក់ព័ន្ធដាក់ចេញវិធានការប្រឆាំងភេរវកម្មបន្ថែមលើវិធានការដែលត្រូវបានបង្កើតឡើងក្រោមក្របខណ្ឌ អង្គការតំបន់មានដូចជាអង្គការសហប្រតិបត្តិការសៀងហៃ(CSO) អង្គការសន្ធិសញ្ញាសន្តិសុខសមូហភាព (CSTO) ជាដើម៕
© រក្សាសិទ្ធិដោយ thmeythmey.com
«ប្រទានកម្ម»មានន័យដូចម្តេច?
10 ម៉ោង
