អ្នកជំនាញផ្នែកចិត្តសាស្ត្របាននិយាយថា ក្នុងពេលដែលយើងគេងលក់ ភាសាកាយវិការនៃដងខ្លួនអាចបញ្ជាក់ប្រាប់ពីអារម្មណ៍របស់យើងបាន។ ទីតាំងនៃដំណេកគ្រប់រូបភាពក្នុងពេលដែលអ្នក និងគូស្នេហ៍ដេកលង់លក់ឆ្លុះបញ្ចាំងពីស្ថានភាពនៃទំនាក់ទំនងរបស់អ្នកទាំងពីរ។ គេហទំព័រ Littlethings.com បានលើកយកមកបង្ហាញពីទីតាំងដំណេកចំនួន ១០ របស់គូស្នេហ៍ជាទូទៅ។
1. គេងស្របគ្នា ដោយម្នាក់ឱបម្នាក់ទៀតពីក្រោយ
លោក Patti Wood អ្នកឯកទេសខាងភាសានៃដងខ្លួនបញ្ជាក់ថា ដំណេកទម្រង់នេះធ្វើឲ្យឈឺខ្លួនប្រាណ តែវាជាភាសាប្រាប់ពីភាពផ្អែមល្អែមនៃទំនាក់ទំនងស្នេហា និងការជឿទុកចិត្តគ្នា។
2. គេងក្បែរគ្នា ដោយម្នាក់យកដៃប៉ះម្នាក់ទៀតពីក្រោយ
វាស្រដៀងនឹងទម្រង់ទី ១ ដែរ តែខុសគ្នាត្រង់ទម្រង់នេះម្នាក់ៗមានគម្លាតឆ្ងាយពីគ្នាបន្តិច។ នេះជាទម្រង់ដែលអាចឲ្យគូស្នេហ៍ម្នាក់ៗគេងលក់យ៉ាងស្រួល។ ពិតមែនតែវាមិនសូវស្និទ្ធដូចទម្រង់ទី១ តែការយកដៃប៉ះដៃគូរបស់ខ្លួនពីក្រោយជាសញ្ញាបញ្ជាក់ប្រាប់ថា « ខ្ញុំនៅពីក្រោយអ្នកហើយ សូមកុំភ័យខ្លាចអ្វីទាំងអស់ »។
3. ទម្រង់ដេញតាម
ទម្រង់ដេញចាប់នេះគឺ មនុស្សម្នាក់គេងខិតទៅបបះមាត់គ្រែ ហើយម្នាក់ទៀតគេងខិតទៅតាម។ ទម្រង់នេះក៏ស្រដៀងគ្នានឹងទម្រង់ទី ១ ដែរ។ តែវាមានអត្ថន័យមិនដូចគ្នាទេ។ ទម្រង់ដេញតាមមានន័យពីរយ៉ាង ទី១ អ្នកដែលខិតទៅបបះមាត់គ្រែចង់ឲ្យម្នាក់ទៀតមានការលំបាកបន្តិចក្នុងការតាមខ្លួន។ ទី២ គឺអ្នកដែលដកថយទៅក្រោយនោះ ចង់ឲ្យមានគម្លាតបន្តិចពីដៃគូរបស់ខ្លួន។
4. ឱបជាប់ប្រទាក់គ្នា
ដៃឱបគ្នាទៅវិញទៅមក ឯជើងទាំងពីររបស់គូស្នេហ៍ប្រទាក់គ្នា។ នេះជាទម្រង់ដ៏ស្និទ្ធស្នាលជាទីបំផុត ហើយវាក៏កម្រនឹងមានអ្នកគេងក្នុងទម្រង់របៀបនេះដែរ។ ទម្រង់នៃដំណេករបៀបនេះច្រើនតែធ្វើបន្ទាប់ពីការរួមភេទរួច ឬនៅគ្រាដំបូងនៃទំនាក់ទំនងស្នេហាដ៏ផ្អែមល្អែម។ ប៉ុន្តែដំណេករបៀបនេះបញ្ជាក់ថា គូស្នេហ៍ទាំងពីរត្រូវការគ្នាយ៉ាងខ្លាំង ហើយមិនអាចគេងឆ្ងាយពីគ្នាបានទេ។
5. ឱបជាប់គ្នា រួចព្រលែងវិញ
ជាដំបូងគូស្នេហ៍គេងឱបជាប់ប្រទាក់គ្នាក្នុងទម្រង់ដំណេកទី ៤ តែបន្ទាប់ពីដេកលក់ ក៏ព្រលែងគ្នាវិញ។ ដំណេករបៀបនេះឆ្លុះបញ្ចាំងពីទំនាក់ទំនងដ៏រឹងមាំ។ អ្នកឯកទេសបាននិយាយថា ទម្រង់នៃដំណេកនេះសបញ្ជាក់ពីភាពស្និទ្ធស្នាល និងឯករាជ្យភាព ហើយវាធ្វើឲ្យអ្នកទាំងពីរមានសេចក្តីសុខ។
6. បែរខ្នងដាក់គ្នា ដោយរក្សាគម្លាត
គេងបែរខ្នងដាក់គ្នា ហើយឃ្លាតពីគ្នាបន្តិច។ ដំណេករបៀបនេះមិនមែនជាសញ្ញាអវិជ្ជមានទេ វាបញ្ជាក់ពីភាពស្និទ្ធស្នាល និងឯករាជ្យភាពក្នុងទំនាក់ទំនងស្នេហា។ ប្តីប្រពន្ធប្រមាណ ១/៣ ចូលចិត្តទម្រង់នេះណាស់។
7. បែរខ្នងដាក់គ្នា ខ្នងប៉ះគ្នា
វាដូចគ្នានឹងទម្រង់ទី ៦ ដែរ ខុសគ្នាត្រង់ខ្នងប៉ះគ្នា។ អ្នកឯកទេសនៃទំនាក់ទំនងស្នេហាបាននិយាយថា ដំណេករបៀបនេះបញ្ជាក់ថា ប្តីប្រពន្ធទាំងពីរមានអារម្មណ៍ធូរស្រាលក្នុងចិត្ត និងកក់ក្តៅរវាងគ្នា។ ទម្រង់ដំណេកនេះច្រើនកើតមានចំពោះប្តីប្រពន្ធថ្មីថ្មោង ឬគូស្នេហ៍ដែលនៅជាមួយគ្នាតិចជាងមួយឆ្នាំ។
8. គេងលើដើមទ្រូង
ភាគច្រើនគឺស្ត្រីគេងលើដើមទ្រូងបុរស ហើយយកជើងគងបុរស។ អ្នកឯកទេសផ្នែកចិត្តសាស្ត្រមួយរូបអះអាងថា ទម្រង់នៃដំណេកនេះបញ្ជាក់ពីការផ្តល់ទំនុកចិត្ត និងការការពារខ្ពស់បំផុតដល់ដៃគូ។
9. ជើងគងលើអ្នក
ម្នាក់យកជើងគងលើម្នាក់ទៀត ដំណេករបៀបនេះបញ្ជាក់ថា អ្នកដែលយកជើងគងគេនោះត្រូវការការតភ្ជាប់ផ្នែកអារម្មណ៍ ឬទំនាក់ទំនងផ្លូវភេទ ហើយវាក៏ឆ្លុះបញ្ចាំងថា អ្នកនោះមិនបានទទួលរបស់ទាំងពីរយ៉ាងនេះគ្រប់គ្រាន់ទេ។
10. គេងត្រដាងដៃត្រដាងជើង
អ្នកដែលចូលចិត្តគេងត្រដាងដៃត្រដាងជើងបញ្ជាក់ថា អ្នកនោះជាមនុស្សអត្មានិយម ព្រោះគេនឹងធ្វើឲ្យម្នាក់ទៀតត្រូវធ្លាក់ពីលើគ្រែ។ អ្នកឯកទេសបាននិយាយថា ដំណេករបៀបនេះបញ្ជាក់ពីអសមភាពនៃការប្រើប្រាស់អំណាចនៅក្នុងទំនាក់ទំនងស្នេហា។
បើប្តីប្រពន្ធគេងដោយដាក់ក្បាលស្មើគ្នា បញ្ជាក់ថា ពួកគេប្រើប្រាស់សិទ្ធិអំណាចស្មើគ្នា។ ចំពោះទម្រង់ដំណេកទី ១០ នេះ អ្នកដែលគេងជិតក្បាលគ្រែច្រើនតែជាមនុស្សចូលចិត្តគ្រប់គ្រងគេ និងមានជំនឿចិត្តលើខ្លួនឯង ឯអ្នកដេលគេងឆ្ងាយពីក្បាលគ្រែ ជាមនុស្សមិនសូវទុកចិត្តខ្លួនឯងប៉ុន្មានទេ៕