អតីតសិស្សវិទ្យាល័យ ២៤ កញ្ញា បង្កើតកម្មវិធី«សង្ក្រាន្តភូមិយើង»នៅថ្ងៃចូលឆ្នាំ

ជាតិ

អតីតសិស្សវិទ្យាល័យ ២៤ កញ្ញា បង្កើតកម្មវិធី«សង្ក្រាន្តភូមិយើង»នៅថ្ងៃចូលឆ្នាំ

11, Apr 2016 , 9:19 pm

រូបភាព

ដោយ: ថ្មីៗ

អតីតសិស្សវិទ្យាល័យ ២៤ កញ្ញា នៅស្រុកបសេដ្ឋ ខេត្តកំពង់ស្ពឺមួយក្រុម ផ្តើមគំនិតរៀបំកម្មវិធីដែលពួកគេដាក់ឈ្មោះថា«សង្ក្រាន្តភូមិយើង» ដែលនឹងធ្វើឡើងរយៈពេលបីថ្ងៃ នៅវត្តក្រាងគងពិសី។ ការបង្កើតកម្មវិធីនេះឡើងក្នុងគោលបំណង បង្ហាញសារអប់រំដល់យុវជន កៀរគរយុវជនឲ្យសាមគ្គីគ្នា លេងល្បែងប្រជាប្រិយខ្មែរ និងការជួយជុំបណ្តាសិស្សវិទ្យាល័យរបស់ពួកគេ រួមទាំងស្វែងរកមូលនិធិជួយដល់កុមារផងដែរ។

កម្មវិធី«សង្ក្រាន្តភូមិយើង»លើកទីមួយ ដែលនឹងប្រព្រឹត្តទៅនៅថ្ងៃទី១៣-១៥ មេសា នៅវត្តក្រាងគងពិសី ហៅវត្ត២៤កញ្ញា ត្រូវបានកញ្ញា ហុក ធីដា ដែលជាអតីសិស្សវិទ្យាល័យ ២៤ កញ្ញា ម្នាក់ ក្នុងចំណោមសមាជិកជាង២០នាក់ដែលរៀបចំកម្មវិធីនេះ បានបញ្ជាក់ថា កម្មវិធី«សង្ក្រាន្តភូមិយើង» គឺរៀបចំក្នុងគោលបំណងបង្ហាញសារអប់រំដល់យុវជន តាមការសម្តែងរឿងខ្លីៗ, កៀរគរយុវជនឲ្យសាមគ្គីគ្នា តាមរយៈការលេងល្បែងប្រជាប្រិយ និងការរាំកម្សាន្ត រួមទាំងការជួបជុំមិត្តភក្តិនៅវិទ្យាល័យរបស់ពួកគេ។ល។

នៅក្នុងន័យមួយទៀត ការរៀបចំកម្មវិធីនេះឡើងក៏ដើម្បីរៃអង្គាស និងស្វែងរកថវិកាជួយដល់កុមារនៅសាលាបឋមសិក្សា ២៤ កញ្ញាផងដែរ។

សូមបញ្ជាក់ថា រយៈពេលពីរបីឆ្នាំចុងក្រោយនេះ ចាប់ផ្តើមមានចលនាក្រុមយុវជន ផ្តួចផ្តើមគំនិតរៀបចំកម្មវិធីតាមបែបប្រពៃណីខ្មែរ ដោយមានការលេងល្បែងប្រជាប្រិយខ្មែរ និងការរាំកម្សាន្តជាដើម នៅតាមសាលារៀន, ភូមិ-ឃុំ និងវត្តអារាមនៅតាមស្រុកកំណើតរបស់ពួកគេ៕