ជាតិ
សង្គមជាតិ
លោក ស៊ុន ចាន់ថុល ស្នើក្រុមហ៊ុន Railway បង្កើនល្បឿនរថភ្លើង និងដឹករថយន្តអ្នកដំណើរ រូបថតក្រសួងសាធារណការ និងដឹកជញ្ជូន
× ភ្នំពេញ៖ រដ្ឋមន្ត្រីក្រសួងសាធារណការ និងដឹកជញ្ជូនលោក ស៊ុន ចាន់ថុល បានស្នើក្រុមហ៊ុន Royal Railway ដែលកំពុងគ្រប់គ្រងផ្លូវរថភ្លើងកម្ពុជា ឲ្យពិនិត្យបង្កើនល្បឿនរថភ្លើងមានសុវត្ថិភាព និងដឹករថយន្តអ្នកដំណើរផ្ទាល់ ដើម្បីកាត់បន្ថយចំណាយ និងពេលវេលាធ្វើដំណើរពីរាជធានីភ្នំពេញទៅខេត្តគោលដៅ។ នេះបើការផ្សាយលើតាមហ្វេសប៊ុកក្រសួងសាធារណការ។
បើការផ្សាយលើទំព័រហ្វេសប៊ុកក្រសួងសាធារណការ និងដឹកជញ្ជូន លោក ស៊ុន ចាន់ថុល បានស្នើលោក John Guiry នាយកប្រតិបត្តិក្រុមហ៊ុន រ៉ូយ៉ាល់ រេលវេ (Royal Railway) ឲ្យកំណត់បង្កើនល្បឿនរថភ្លើង ដើម្បីកាត់បន្ថយពេលវេលាធ្វើដំណើរ តាមរថភ្លើង បច្ចុប្បន្ន។ ជាងនេះទៀត រដ្ឋមន្ត្រីដឹកជញ្ជូនរូបនេះ បានស្នើក្រុមហ៊ុនឲ្យពិនិត្យផ្តល់សេវាដឹករថយន្តអ្នកធ្វើដំណើរតាមរថភ្លើងផងដែរ ដើម្បីឱ្យពួកគេអាចប្រើប្រាស់រថយន្តទាំងនោះ នៅពេលដល់គោលដៅ។
«ឯកឧត្តមទេសរដ្ឋមន្ត្រី ស៊ុន ចាន់ថុល បានស្នើឲ្យក្រុមហ៊ុន រ៉ូយ៉ាល់ រេលវេ (Royal Railway) ធ្វើការជាមួយក្រសួងក្នុងការកំណត់លទ្ធភាព នៃការបង្កើនល្បឿនមានសុវត្ថិភាពដើម្បីកាត់បន្ថយពេលវេលានៃការធ្វើដំណើរមកនៅត្រឹមប្រហែល ៥ ម៉ោង។ ជាមួយគ្នានេះផងដែរ ឯកឧត្តម ទេសរដ្ឋមន្ត្រីបានស្នើឱ្យក្រុមហ៊ុនវាយតម្លៃលទ្ធភាពនៃការផ្តល់សេវាដឹករថយន្តផ្ទាល់ខ្លួនរបស់អ្នកធ្វើដំណើរនៅលើរថភ្លើង ដើម្បីឱ្យអ្នកដំណើរអាចមានរថយន្តរបស់ពួកគេប្រើប្រាស់នៅពេលដល់គោលដៅ»។ នេះជាការសរសេរលើទំព័រហ្វេសប៊ុក ក្រសួងសាធារណការ។
លោក ស៊ុន ចាន់ថុល បានលើកសំណើរនេះ ឡើងក្នុងជួបពិភាក្សាការងារជាមួយលោកJohn Guiry ពាក់ព័ន្ធនឹងការផ្តល់សេវាផ្លូវដែកពីភ្នំពេញទៅខេត្តព្រះសីហនុ នៅរសៀលថ្ងៃទី២២ ខែមេសា ឆ្នាំ២០១៦នេះ។
បើតាមការផ្សាយរបស់ក្រសួងសាធារណការ ជាការឆ្លើយតប លោក Guiry បានស្វាគមន៍គំនិតរដ្ឋមន្ត្រី ស៊ុន ចាន់ថុលហើយ លោកនឹងបន្តពិនិត្យលទ្ធភាព តបតាមសំណើ។
គួរបញ្ជាក់ថា ក្រុមហ៊ុន Royal Railway បានដាក់ឲ្យដំណើរការរថភ្លើងសម្រាប់ដឹកអ្នកដំណើរពីភ្នំពេញទៅខេត្ត ព្រះសីហនុ និងពីខេត្តព្រះសីហនុមកភ្នំពេញវិញ កាលពីថ្ងៃទី ៩ ខែមេសា ។ លោក រតនា ភ្នាក់ងារសុវត្ថិភាពរបស់ក្រុមហ៊ុន Royal Railway បានបញ្ជាក់ថា រថភ្លើងរបស់ក្រុមហ៊ុននេះ មួយខ្សែ អាចផ្ទុកអ្នកដំណើរបានជាង ១០០ នាក់ និងមួយខ្សែទៀតផ្ទុកមនុស្សបានជាង ២០០ នាក់៕
Tag:
រថភ្លើង
Royal Railway
ស៊ុន ចាន់ថុល
© រក្សាសិទ្ធិដោយ thmeythmey.com