ជាតិ
សិល្បះ
ភរិយាលោក គង្គ ប៊ុនឈឿន គ្រោងសុំអន្តរាគមន៍ពីសម្តេច ហ៊ុន សែន រឿងទីតាំងសង់សំណាកស្វាមី
×![]()
ភរិយាកវី គង្គ ប៊ុនឈឿន គឺអ្នកស្រី តាត គឹមលន កំពុងរៀបចំសរសេរលិខិតស្នើសុំអន្តរាគមន៍ពីសម្តេចនាយករដ្ឋមន្ត្រី ហ៊ុន សែន និងលោកអភិបាលខេត្តបាត់ដំបង ច័ន្ទ សុផល ដើម្បីអ្នកស្រីអាចទទួលបានទីកន្លែងដាក់តាំងរូបសំណាក លោក គង្គ ប៊ុនឈឿន ក្បែរស្ទឹងសង្កែ ក្នុងខេត្តបាត់ដំបង។ អ្នកស្រីនឹងនាំអដ្ឋិធាតុស្វាមីមកដល់ប្រទេសកម្ពុជានៅថ្ងៃទី២១ឧសភាខាងមុខនេះ។
សំឡេងអ្នកស្រី តាត គឹមលន
សំឡេងអ្នកស្រី តាត គឹមលន
អ្នកស្រី តាត គឹមលន ភរិយារបស់កវីម្ចាស់ស្ទឹងសង្កែកំពុងស្វែងរកអន្តរាគមន៍ពីប្រមុខរដ្ឋាភិបាលកម្ពុជា និងអាជ្ញាធរខេត្តបាត់ដំបង ដើម្បីអ្នកស្រីអាចបំពេញបំណងចុងក្រោយរបស់ស្វាមីអ្នកស្រី។ លោក គង្គ ប៊ុនឈឿន ដែលត្រូវបានមហាជនហៅថា ជាកវីម្ចាស់ស្ទឹងសង្កែ និងជាអ្នកនិពន្ធតាំងពីទស្សវត្សរ៍១៩៦០មកនោះ មានក្តីប្រាថ្នាចង់បានរូបសំណាករបស់លោក ប្រតិស្ឋាននៅក្បែរស្ទឹងសង្កែ ដែលលោកចាត់ទុកថាជាជីវិតរបស់លោក។ ហើយម្យ៉ាងទៀតខេត្តបាត់ដំបង គឺជាទីកន្លែងកំណើតរបស់លោកផង។
អ្នកស្រី តាត គឹមលន បានមានប្រសាសន៍ប្រាប់សារព័ត៌មានថ្មីៗតាមទូរសព្ទពីប្រទេសន័រវេមកថា៖«សូមឲ្យរដ្ឋាភិបាលបើកផ្លូវជួយ ឲ្យមានរូបសំណាករបស់គាត់ (លោក គង្គ ប៊ុនឈឿន)។ បើសិនជាអាចដាក់រូបសំណាកនៅក្បែរដើមដូងទី១០ ដូចលោកអភិបាលខេត្តមានប្រសាសន៍កន្លងមកនេះ គឺល្អណាស់។ ខ្ញុំគាំទ្រទាំងស្រុង»។
ទាក់ទងនឹងទីតាំងតម្កល់ធាតុរបស់លោក គង្គ ប៊ុនឈឿន វិញ បើតាមការបញ្ជាក់របស់អ្នកស្រី គឹមលន ដដែល ក្រុមគ្រួសារអ្នកស្រីក៏ចង់បានទីតាំងមួយដែលអាចសាងសង់ជាអាស្រមដែលអាចដាក់តម្កល់ធាតុផង និងអាចដាក់តាំងស្នាដៃរបស់លោក គង្គ ប៊ុនឈឿន សម្រាប់មនុស្សជំនាន់ក្រោយ។
ដើម្បីបានទទួលផ្លែផ្កាទាំងនេះ អ្នកស្រី តាត គឹមលន បានបញ្ជាក់ថា អ្នកស្រីកំពុងរៀបចំធ្វើលិខិតដើម្បីផ្ញើជូនសម្តេច ហ៊ុន សែន និងលោកអភិបាលខេត្តផងដែរ មុននឹងអ្នកស្រីនាំធាតុរបស់ស្វាមីមកដល់កម្ពុជានៅថ្ងៃទី២១ខែឧសភាខាងមុខនេះ៕
Tag:
គង្គ ប៊ុនឈឿន
តាត គឹមលន
© រក្សាសិទ្ធិដោយ thmeythmey.com
