ដូណាល់ត្រាំថា បើហ៊ីឡារី គ្លីនតុន ជាប្រុស គ្មានអ្នកបោះឆ្នោតឲ្យទេ

អន្តរជាតិ

នយោបាយអន្តរជាតិ

ដូណាល់ត្រាំថា បើហ៊ីឡារី គ្លីនតុន ជាប្រុស គ្មានអ្នកបោះឆ្នោតឲ្យទេ

29, Apr 2016 , 8:15 am

រូបភាព

ដោយ: ថ្មីៗ

បេក្ខជននាំមុខបក្សសាធារណរដ្ឋ ដូណាល់ ត្រាំ ចាប់ផ្តើមវាយប្រហារបេក្ខជនបក្សប្រជាធិបតេយ្យលោកស្រី ហ៊ីឡារី គ្លីនតុនកាន់តែខ្លាំងក្រោយជ័យជម្នះថ្ងៃអង្គារក្នុងការបោះឆ្នោតក្នុងរដ្ឋចំនួន ៥។ លោកថា ហ៊ីឡារី គ្លីនតុន បានទទួលការគាំទ្រច្រើនដោយសារតែគាត់ជាមនុស្សស្រី ហើយលោកស្រីនៅសល់ត្រឹមតែ «សន្លឹកបៀរស្ត្រី»ប៉ុណ្ណោះ។

ក្រោយទទួលបានជ័យជម្នះនៅរដ្ឋចំនួន ៥ កាលពីថ្ងៃអង្គារ លោក ដូណាល់ ត្រាំ បេក្ខជននាំមុខបក្សសាធារណរដ្ឋចាត់ទុកខ្លួនឯងជាអ្នកតំណាងបក្សដែលត្រូវប្រជែងជាមួយបេក្ខជនបក្សប្រជាធិបតេយ្យនៅថ្ងៃ ៨ខែវិច្ឆិកាឆ្នាំ ២០១៦ទៅហើយ។ លោកឈប់វាយប្រហារគូប្រជែងក្នុងបក្ស តែចាប់ផ្តើមងាកមកវាយប្រហារលោកស្រី ហ៊ីឡារី គ្លីនតុន ដែលទើបឈ្នះការបោះឆ្នោតសាកល្បងនៅរដ្ឋចំនួនបួននៅថ្ងៃអង្គារដែរនោះ។

សេដ្ឋីអចលនទ្រព្យ ដូណាល់ ត្រាំ នេះមើលឃើញថា លោកស្រី អតីតរដ្ឋមន្ត្រីការបរទេសនេះហើយជា គូប្រជែងរបស់ខ្លួនក្នុងសមរភូមិនយោបាយចុងក្រោយ។ តែអ្នកនយោបាយម្នាក់នេះកាន់តែក្អេងក្អាង និងមានជំនឿចិត្តថា លោកនឹងផ្តួលលោកស្រី គ្លីនតុន បាន។

យោងតាមទីភ្នាក់ងារព័ត៌មាន Reuters លោករិះគន់លោកស្រី ហ៊ីឡារី គ្លីនតុន ថា លោកស្រីបានទទួលជ័យជម្នះនិងការគាំទ្រច្រើនដោយសារតែលោកស្រីជាមនុស្សស្រីប៉ុណ្ណោះ។ «ខ្ញុំគិតថា ហ៊ីឡារី គ្លីនតុនមានត្រឹមសន្លឹកបៀរស្ត្រីប៉ុណ្ណោះ។ គាត់គ្មានអ្វីសម្រាប់ប្រាស់ទៀតទេ។ ហើយនិយាយតាមត្រង់ចុះ បើសិនហ៊ីឡារី គ្លីនតុន ជាមនុស្សប្រុសនោះ ខ្ញុំមិនគិតថា លោកស្រីអាចរកសំឡេងគាំទ្របានត្រឹម៥ភាគរយឡើយ»។

សម្រាប់លោក ដូណាល់ ត្រាំ ជ័យជម្នះរបស់លោកស្រី ហ៊ីឡារី គ្លីនតុនកន្លងមកបានដោយសារតែលោកស្រីជាស្ត្រីប៉ុណ្ណោះ ហើយគេផ្តល់តម្លៃឲ្យមនុស្សស្រី។ នេះមិនមែនមានន័យថា គេពេញចិត្តគោលនយោបាយឬក៏ការដឹកនាំរបស់លោកស្រីឡើយ។ បច្ចុប្បន្ននេះ សេដ្ឋីអចលនទ្រព្យរូបនេះកំពុងស្វែងរកចំណុចខ្វះខាតនិងបញ្ហានានារបស់លោកស្រី ហ៊ីឡារី គ្លីនតុន ដើម្បីត្រៀមវាយប្រហារលើលោកស្រីក្នុងពេលដែលលោកទទួលបានការតែងតាំងពីបក្សខាងមុខនោះ។

យ៉ាងណាក៏ដោយចុះ ចលនាប្រឆាំងលោកដូណាល់ត្រាំ ក្នុងបក្សកើនឡើងគួរឲ្យកត់សម្គាល់ ដែលវាមានន័យថា លោកមិនអាចត្រេកអរឡើយបើសិនជាលោកមិនទាន់បានជ័យជម្នះនិងការតែងតាំងពីបក្សជាផ្លូវការទេនោះ។ ចំណែកលោកស្រី ហ៊ីឡារីគ្លីនតុន ឯណោះវិញកំពុងទទួលបានការគាំទ្រច្រើនទាំងក្នុងនិងក្រៅប្រទេស ហើយលោកស្រីឈ្នះដាច់គូប្រជែងលោកស្រី លោក ប៊ែនី សេនដឺ (Bernie Sanders) រួចទៅហើយ។ ដែល នេះបង្ហាញថា លោកស្រីមានសង្ឃឹមច្រើន ហើយក៏នឹងអាចក្លាយជាប្រធានាធិបតីស្ត្រីរបស់អាមេរិកដំបូងបំផុតដែរ៕