ជាតិ
រដ្ឋាភិបាលគ្រោងសាងសង់ស្ពានឆ្លងទន្លេមេគង្គ ដែលតភ្ជាប់ខេត្តកំពង់ចាមនិងខេត្តត្បូងឃ្មុំ
× តាមគម្រោងរបស់រាជរដ្ឋាភិបាល ស្ពានឆ្លងកាត់ទន្លេមេគង្គថ្មីមួយទៀត នឹងត្រូវដាក់ឲ្យសាងសង់ បន្ទាប់ពីធ្វើការការសិក្សារួចរាល់។ នេះបើតាមការបញ្ជាក់របស់លោក ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន នៅថ្ងៃទី១៦ខែឧសភា ក្នុងឱកាសដែលលោកទៅត្រួតពិនិត្យផ្លូវថ្នល់ក្នុងខេត្តកំពង់ចាម, ត្បូងឃ្មុំ និងខេត្តព្រៃវែង។
ស្ពានឆ្លងទន្លេមេគង្គថ្មីនេះ នឹងតភ្ជាប់ផ្លូវ ៧១C ពីស្រុកស្ទឹងត្រង់ ខេត្តកំពង់ចាម ទៅស្រុកក្រូចឆ្មារ ខេត្តត្បួងឃ្មុំ។ ហើយថវិកាសាងសង់ស្ពាននេះ គឺជាប្រាក់កម្ចីពីរដ្ឋាភិបាលចិន។ នេះជាអះអាងរបស់លោក ស៊ុន ចាន់ថុល។ ប៉ុន្តែទោះយ៉ាងណា រដ្ឋមន្ត្រីក្រសួងសាធារណការ និងដឹកជញ្ជូនរូបនេះ មិនទាន់អាចបញ្ជាក់ពីប្រវែងស្ពាន និងចំនួនទឹកប្រាក់សាងសង់បានទេ ដោយលោកបញ្ជាក់ថា គម្រោងនេះស្ថិតក្នុងការសិក្សានៅឡើយ។
ក្រៅពីការសាងសង់ស្ពាន លោក ស៊ុន ចាន់ថុល ក៏បានលើកឡើងពីគម្រោងពង្រីកផ្លូវជាតិលេខ ៧១C ប្រវែង ១០៣ គីឡូម៉ែត្រ ដោយឆ្លងកាត់ស្រុកចំនួន៤គឺ ស្រុកចម្ការលើ និងស្រុកស្ទឹងស្រង់ ខេត្តកំពង់ចាម ដល់ស្រុកក្រូចឆ្មារ និងស្រុកត្បូងឃ្មុំ ខេត្តត្បូងឃ្មុំ។
ចំពោះផលប៉ះពាល់ពីគម្រោងអភិវឌ្ឍន៍ទាំងនេះ លោក ស៊ុន ចាន់ថុល អះអាងថា រាជរដ្ឋាភិបាល នឹងដោះស្រាយជូនប្រជាពលរដ្ឋ៕
© រក្សាសិទ្ធិដោយ thmeythmey.com