ជាតិ
លោក ឃួង ស្រេងថា មេបក្សដែលតវ៉ាឲ្យដោះលែងមន្ត្រីអាដហុកនិងគ.ជ.ប មិនយល់ពីច្បាប់
× ភ្នំពេញ៖ លោក ឃួង ស្រេង អភិបាលរងរាជធានីភ្នំពេញ បានលើកជាចម្ងល់ បែបសើចចំអកឲ្យប្រធានបក្សនយោបាយថ្មីមួយចំនួន ដែលចេញមុខទាមទារឲ្យដោះលែងមន្ត្រីអាដហុកនិងមន្ត្រីគ.ជ.ប ថាមិនយល់ពីច្បាប់ និងការបែងចែកអំណាចរវាងស្ថាប័នកំពូលទាំងបី ឬយ៉ាងណា។ លោកអះអាងថា សំណុំរឿងរបស់មន្ត្រីអាដហុកនិងមន្ត្រីគ.ជ.ប ស្ថិតនៅក្រោមអំណាចរបស់តុលាការ ដូច្នេះស្ថាប័នផ្សេងមិនអាចលូកដៃចូលបានទេ។ តែប្រធានបក្សក្រៅរដ្ឋសភា ដែលចេញមុខតវ៉ាក្នុងសំណុំរឿងនេះ មិនមានកង្វល់ចំពោះការលើកឡើងរបស់លោកអភិបាលរងនោះទេ ហើយនៅតែបន្តសុំព្រះរាជអន្តរាគមន៍ពីព្រះមហាក្សត្រ ជុំវិញការឃុំខ្លួនជនជាប់ចោទទាំង៥នាក់។
អភិបាលរងរាជធានីភ្នំពេញ លោក ឃួង ស្រេង បានចាត់ទុកការចេញមុខទាមទារឲ្យដោះលែងមន្ត្រីអាដហុកនិងមន្ត្រីគ.ជ.ប ពីសំណាក់ប្រធានគណបក្សក្រៅរដ្ឋសភា ថាមិនសមស្របទៅនឹងរដ្ឋធម្មនុញ្ញ ដែលផ្តល់អំណាចដាច់ដោយឡែកពីគ្នារវាង អង្គការនីតិបញ្ញត្តិ អង្គការនីតិប្រតិបត្តិ និងអង្គការនីតិវិនិច្ឆ័យ។ លោកលើកឡើងថា ក្នុងកាលៈទេសៈនេះ រឿងក្តីរបស់ជនជាប់ចោទទាំង៥រូប កំពុងស្ថិតក្នុងចំណាត់ការរបស់តុលាការនៅឡើយ ដូច្នេះមិនមានបុគ្គលណាមួយ មានសិទ្ធិជ្រៀតជ្រែកចូលក្នុងកិច្ចការនេះបានទេ។
ម្យ៉ាងទៀត លោក ឃួង ស្រេង យល់ថា ការតវ៉ាឲ្យដោះលែងជនជាប់ចោទទាំង៥នាក់ ដែលតុលាការកំពុងបន្តនីតិវិធីដូច្នេះ គឺបានន័យថា គាំទ្រឲ្យមាននិទណ្ឌភាព នៅកម្ពុជា។ លោកបកស្រាយថា មានតែនាយករដ្ឋមន្ត្រីម្នាក់គត់ ដែលមានសិទ្ធិស្នើទៅកាន់ព្រះមហាក្សត្រ ដើម្បីប្រទានការលើកលែងទោសឲ្យទណ្ឌិត។ លោកបន្ថែមថា ការដែលនាយករដ្ឋមន្ត្រី អាចស្នើទៅព្រះមហាក្សត្របាន លុះត្រាតែតុលាការសម្រេចចេញសាលក្រមស្ថាពរជាមុនសិន។
ថ្លែងប្រាប់សារព័ត៌មានថ្មីៗ លោកអភិបាលរងរូបនេះ បានលើកជាចម្ងល់របស់ខ្លួនដូច្នេះថា៖«ខ្ញុំចេះតែឆ្ងល់ថា ហេតុអ្វីបានជាប្រធានបក្សទាំងនោះ ចេញមុខស្នើទៅព្រះមហាក្សត្រ? មានតែនាយករដ្ឋមន្ត្រីទេ ទើបអាចស្នើបាន។ ពួកគាត់ មិនយល់ពីច្បាប់ឬយ៉ាងម៉េច?»
ការលើកឡើងរបស់លោក ឃួង ស្រេង ខាងលើ គឺដើម្បីឆ្លើយតបនឹងលោក ម៉ម សូណង់ដូ ប្រធានគណបក្សសំបុកឃ្មុំសង្គមប្រជាធិបតេយ្យ និងលោក ពេជ្រ ស្រស់ ប្រធានគណបក្សយុវជនកម្ពុជា ដែលមានបំណងទាមទារឲ្យដោះលែងមន្ត្រីអាដហុកនិងមន្ត្រីគ.ជ.ប។ លោក ម៉ម សូណង់ដូ បានដាក់លិខិតទៅកាន់សាលារាជធានីភ្នំពេញ ដើម្បីសុំធ្វើបាតុកម្ម នៅថ្ងៃទី៩ កក្កដា ឆ្នាំ២០១៦ ខាងមុខ ក្នុងគោលបំណងសុំឲ្យដោះលែងអ្នកទាំង៥រូប។ រីឯ លោក ពេជ្រ ស្រស់ បានស្នើសុំសាលារាជធានីភ្នំពេញ ដើម្បីដង្ហែញត្តិថ្វាយព្រះមហាក្សត្រ នៅថ្ងៃទី៣០ ខែឧសភា ដើម្បីសុំព្រះរាជអន្តរាគមន៍ ជុំវិញការឃុំខ្លួនមន្ត្រីអាដហុកនិងមន្ត្រីគ.ជ.ប។
យ៉ាងណាក៏ដោយ សាលារាជធានីភ្នំពេញ មិនទាន់សម្រេចថាអនុញ្ញាតឬមិនអនុញ្ញាត លើសំណើរបស់ប្រធានបក្សនយោបាយទាំងពីរ ដែលបានស្នើសុំធ្វើបាតុកម្មនិងដង្ហែញត្តិនោះទេ។ នេះបើតាមការបញ្ជាក់របស់លោក ឃួង ស្រេង។
ប្រធានគណបក្សយុវជនកម្ពុជា លោក ពេជ្រ ស្រស់ មិនកើតក្តីសៅហ្មងឬទោមនស្ស នឹងការលើកឡើងរបស់លោក ឃួង ស្រេង ឡើយ ដោយប្រធានបក្សវ័យក្មេងរូបនេះ ចាក់ទុកថា ជាសិទ្ធិបញ្ចេញមតិរបស់បុគ្គលម្នាក់ៗ ។ លោកបន្ថែមថា ព្រះមហាក្សត្រ គឺជាម្លប់និងជាទីពឹងរបស់ប្រជាពលរដ្ឋគ្រប់រូប ពេលមានភាពអយុត្តិធម៌ក្នុងសង្គម មិនមែនជាកម្មសិទ្ធិផ្តាច់មុខរបស់នាយករដ្ឋមន្ត្រីតែម្នាក់នោះទេ។
លោក ពេជ្រ ស្រស់ អះអាងថា លោកមិនមែនស្នើឲ្យព្រះមហាក្សត្រ ប្រទានការលើកលែងទោសដល់មន្ត្រីអាដហុកនិងមន្ត្រីគ.ជ.ប នោះទេ តែលោកគ្រាន់តែដង្ហែញត្តិថ្វាយព្រះមហាក្សត្រ ដើម្បីឲ្យព្រះមហាក្សត្រ ទ្រង់ជ្រាបពីករណីរបស់បុគ្គលទាំង៥នាក់។ លោក ពេជ្រ ស្រស់ បន្តថា ព្រះមហាក្សត្រ អាចកោះហៅនាយករដ្ឋមន្ត្រី និងឧត្តមក្រុមប្រឹក្សានៃអង្គចៅក្រម ដើម្បីពិភាក្សា ពីការបន្ធូរបន្ថយទោស និងការលើកលែងទោស ប្រសិនបើព្រះមហាក្សត្រ ព្រះតម្រិះ ថាគួរតែបន្ធូរបន្ថយទោសឬលើកលែកទោស មែននោះ។
ប្រធានបក្សរូបនេះ បានបញ្ជាក់ប្រាប់សារព័ត៌មានថ្មីៗបែបនេះថា៖«ខ្ញុំគ្មានសិទ្ធិឯណា ទៅស្នើ ឲ្យព្រះមហាក្សត្រលើកលែកទោស នោះទេ តែគ្រាន់តែចង់ថ្វាយដំណឹងដល់ព្រះមហាក្សត្រ ប៉ុណ្ណោះ។ បើព្រះមហាក្សត្រ ព្រះតម្រិះទៅថាគួរបន្ធូរបន្ថយទោសឬលើកទោស នោះព្រះមហាក្សត្រ អាចកោះហៅនាយករដ្ឋមន្ត្រី និងឧត្តមក្រុមប្រឹក្សានៃអង្គចៅក្រម ទៅពិភាក្សា។ [……]ហើយរឿងគេថា ខ្ញុំមិនយល់ពីច្បាប់ គឺជាសិទិ្ធបញ្ចេញមតិរបស់គេ»។
សូមរម្លឹកថា មន្ត្រីអាដហុក៤រូប រួមមាន លោក នី សុខា, លោក យី សុខសាន្ត, លោក ណៃ វង់ដា និងលោកស្រី លឹម មុន្នី ត្រូវបានបញ្ជូនទៅឃុំខ្លួននៅពន្ធនាគារព្រៃស បន្ទាប់ពីតុលាការក្រុងភ្នំពេញ ចោទពីបទ «សូកប៉ាន់សាក្សី» ពាក់ព័ន្ធនឹងរឿងរ៉ាវរបស់កញ្ញា ខុម ចាន់តារ៉ាទី ហៅស្រីមុំ។ រីឯ លោក នី ចរិយា អគ្គលេខាធិការរងរបស់គ.ជ.ប ត្រូវបានចោទពីបទ «សមគំនិតក្នុងរឿងសូកប៉ាន់សាក្សី» ហើយនាំខ្លួនទៅកាន់ពន្ធនាគារភ្នំពេញ (PJ) ជុំវិញករណីរបស់ស្រីមុំដូចគ្នា៕
© រក្សាសិទ្ធិដោយ thmeythmey.com