កងទ័ពអ៊ីរ៉ាក់ជួបការវាយបកពីក្រុម ISIS ក្នុងសមរភូមិ Fallujah

អន្តរជាតិ

កងទ័ពអ៊ីរ៉ាក់ជួបការវាយបកពីក្រុម ISIS ក្នុងសមរភូមិ Fallujah

01, Jun 2016 , 3:27 pm

រូបភាព

ដោយ: តន ចាន់រិទ្ធារ៉ា

កងកម្លាំងយោធាអ៊ីរ៉ាក់ ដែលប្រយុទ្ធរំដោះទីក្រុង Fallujah ពីដៃក្រុមរដ្ឋឥស្លាម កំពុងតែប្រឈមមុខនឹងការវាយបក ពីសំណាក់សកម្មជនជ្រុលនិយមដែលការពារទីក្រុងនេះ នៅតាមតំបន់ជាយក្រុង។ យ៉ាងណាក្ដី កងទ័ពអ៊ីរ៉ាក់ ក៏បានចូលទៅកាន់ផ្នែកខ្លះនៃទីក្រុងនេះរួចទៅហើយ ខណៈប្រជាជនជាច្រើន កំពុងតែជាប់ខ្លួនក្នុងការប្រយុទ្ធគ្នានេះ។

សូមស្ដាប់ព័ត៌មានលម្អិត៖

លោកឧត្តមសេនីយ៍ Abdelwahab al-Saadi ជាមេបញ្ជាការកងទ័ពអ៊ីរ៉ាក់ ក្នុងប្រតិបត្តិការរំដោះទីក្រុង Fallujah និយាយថា អ្នកប្រយុទ្ធនៃក្រុមជ្រុលនិយមរដ្ឋឥស្លាម (ISIS) បានបើកការវាយប្រហារយ៉ាងខ្លាំង មកលើកម្លាំងអ៊ីរ៉ាក់ ដែលកំពុងសម្រុកចូលទីក្រុងនេះ។ ការវាយ ប្រយុទ្ធគ្នាខ្លាំង កើតឡើងក្នុងតំបន់ Naimiyah ស្ថិតនៅភាគខាងត្បូងទីក្រុង Fallujah នៅថ្ងៃទី៣១ ខែឧសភា បើទោះជាតំបន់មួយចំនួន ត្រូវបានកងកម្លាំងអ៊ីរ៉ាក់ គ្រប់គ្រងក៏ដោយ។

មេបញ្ជាការកងទ័ពរូបនេះ បានប្រាប់ទីភ្នាក់ងារព័ត៌មាន AFP ថា ក្រុមសកម្មជន ដែលមានគ្នាប្រមាណមួយរយនាក់ បានបាញ់ប្រហារមកលើកងទ័ពអ៊ីរ៉ាក់។ ប៉ុន្តែពួកគេមិនប្រើរថយន្តបង្កប់គ្រាប់បែក ឬអ្នកបំផ្ទុះគ្រាប់បែកនោះទេ។ បើតាមលោក Saadi កងកម្លាំងអ៊ីរ៉ាក់ ដែលរួមមានប៉ូលិស និងយោធា បានរុញច្រានសកម្មជនទាំងនោះ ដោយសម្លាប់សកម្មជន ៧៥ នាក់ផងដែរ។ តែលោក Saadi មិនបានបង្ហាញពីតួលេខពិតប្រាកដ នៃចំនួនកងកម្លាំងអ៊ីរ៉ាក់ ដែលបាត់បង់ជីវិត ក្នុងការវាយប្រយុទ្ធនេះទេ។

យ៉ាងណាមិញ ការប្រយុទ្ធខ្លាំងក្លារវាងកងកម្លាំងអ៊ីរ៉ាក់ ជាមួយនឹងសកម្មជនរដ្ឋឥស្លាម ធ្វើឲ្យមនុស្សជាងប្រាំម៉ឺននាក់ ជាប់ខ្លួនក្នុងទីក្រុង Fallujah និងកំពុងតែជួបប្រទះកង្វះអាហារ និងទឹកទៀតផង។ ជាមួយគ្នានេះ ក៏មានរបាយការណ៍ដែរថា ប្រជាជនមួយចំនួនស្លាប់ ដោយសារអត់អាហារ និងខ្លះទៀត ត្រូវបានសម្លាប់ ព្រោះមិនព្រមចូលដៃប្រយុទ្ធ ជាមួយសកម្មជនរដ្ឋឥស្លាម។

តំណាងទីភ្នាក់ងារជនភៀសខ្លួន UN ប្រចាំអ៊ីរ៉ាក់ និយាយដែរថា ប្រជាជនដែលសម្រេចចិត្តភៀសខ្លួន គឺប្រឈមមុខខ្ពស់ នឹងសេចក្ដីស្លាប់។ បើពួកគេអាចភៀសខ្លួនបាន កងកម្លាំងអ៊ីរ៉ាក់អាចជួយពួកគេ ទៅកន្លែងសុវត្ថិភាពបាន។ ប៉ុន្តែ ប្រសិនបើ ពួកគេត្រូវបានចាប់ខ្លួនដោយក្រុមជ្រុលនិយមរដ្ឋឥស្លាម វាច្បាស់ណាស់ថា ពួកគេ នឹងត្រូវស្លាប់មិនខាន។

ទន្ទឹមនឹងនេះដែរ តម្លៃទំនិញក្នុងទីក្រុង បានឡើងខ្ពស់កប់ពពក ខណៈប្រជាជនសាមញ្ញខ្លះ មិនមានលទ្ធភាព ទិញទំនិញប្រើប្រាស់ប្រចាំថ្ងៃទេ។ ជាក់ស្ដែងនោះ អាហារ ជាមុខទំនិញ ដែលឡើងថ្លៃខ្លាំងជាងគេ ព្រោះអង្ករបានឡើងថ្លៃរហូតដល់៧០០ដុល្លារឯណោះ។ បញ្ហានេះ បានបង្ខំឲ្យប្រជាជនខ្លះ ត្រូវបរិភោគអាហាររលួយ ឬទឹកដោះគោជូរជំនួសវិញ។

សូមបញ្ជាក់ដែរថា បន្ទាប់ពីបើកប្រតិបត្តិការរំដោះ Fallujah កាលពីសប្ដាហ៍មុន កងកម្លាំងអ៊ីរ៉ាក់បានគ្រប់គ្រងផ្នែកជាច្រើន ក្នុងទីក្រុងដែលស្ថិតក្រោមការគ្រប់គ្រងរបស់ក្រុមជ្រុលនិយមរដ្ឋឥស្លាម តាំងពីឆ្នាំ២០១៤ មកម្លេះ។ Fallujah និង Mosul ជាទីក្រុងពីរ ដែលត្រូវ ត្រួតត្រាដោយសកម្មជនរដ្ឋឥស្លាមនៅអ៊ីរ៉ាក់ ខណក្រុមនេះ បានបាត់បង់ទឹកដីជាបន្តបន្ទាប់ ទាំងក្នុងអ៊ីរ៉ាក់ និងស៊ីរី ដោយសារតែកម្លាំងទ័ពប្រទេសទាំងពីរ ចាប់ផ្ដើមវាយដណ្ដើមកាន់កាប់មកវិញ ដោយមានជំនួយពីសម្ព័ន្ធមិត្តអាមេរិក ក៏ដូចជាកងកម្លាំងរុស្សីនៅស៊ីរី៕