អន្តរជាតិ
នយោបាយអន្តរជាតិ
ការតវ៉ារបស់កម្មករផ្លូវដែកបារាំងបង្កការព្រួយបារម្ភចំពោះព្រឹត្តិការណ៍ Euro 2016
×
បាតុកម្មរបស់កម្មករផ្លូវដែកបារាំង កំពុងតែបង្កើនការព្រួយបារម្ភ ដល់ការប្រកួតកីឡាបាល់ទាត់ពានរង្វាន់ទ្វីបអឺរ៉ុបប្រចាំឆ្នាំ២០១៦ ដែលបារាំងធ្វើជាម្ចាស់ផ្ទះ។ ការធ្វើបាតុកម្មនេះ បានក្លាយជាសម្ពាធថ្មីមួយទៀត លើរដ្ឋាភិបាលសង្គមនិយម ដែលប្រឈមមុខនឹងការប្រឆាំងក្នុងករណីច្បាប់ការងារថ្មី ដ៏ចម្រូងចម្រាស់។
កម្មករផ្លូវដែកបារាំង នៅថ្ងៃទី៣១ ខែឧសភា បានចេញមកធ្វើបាតុកម្មប្រឆាំងលើច្បាប់ការងារថ្មី ខណៈសល់តែដប់ថ្ងៃទៀតប៉ុណ្ណោះ ការប្រគួតកីឡាបាល់ទាត់ពាន់រង្វាន់ទ្វីបអឺរ៉ុបឆ្នាំ២០១៦ នឹងមកដល់។ គេព្រួយបារម្ភថា ប្រសិនបើការតវ៉ាចេះតែបន្ត វាអាចនឹងប៉ះពាល់ដល់ការប្រកួតពានរង្វាន់ដ៏ធំនេះ។
បាតុកម្មតវ៉ា ដែលធ្វើនៅល្ងាចថ្ងៃទី៣១ ខែឧសភា បានប៉ះពាល់ដល់សេវាកម្មរថភ្លើងមួយចំនួនតូច ប៉ុន្តែគេរំពឹងថា បាតុកម្មនេះ នឹងប៉ះពាល់ដល់ចំនួនពាក់កណ្ដាល នៃសេវាកម្មរថភ្លើង នៅទូទាំងប្រទេស និងតំបន់ នៅពេលដែលបាតុកម្ម នឹងចាប់ផ្ដើមពេញបន្ទុកនៅថ្ងៃទី០១ ខែមិថុនា។ ទន្ទឹមនឹងនេះ ប្រតិបត្តិករផ្លូវដែកជាតិ SNCF និយាយថា មួយផ្នែកតូចប៉ុណ្ណោះនៃសេវាកម្មទៅកាន់អ៊ីតាលី និងអេស្ប៉ាញ នឹងត្រូវដំណើរការធម្មតា អំឡុងពេលសេវាកម្មទាំងអស់ទៅកាន់អង់គ្លេស និងអាល្លឺម៉ង់ នឹងដំណើរការជាប្រក្រតី។
ជាមួយគ្នានេះដែរ បើតាមទីភ្នាក់ងារ Reuters ក្រៅពីកម្មករផ្លូវដែក បុគ្គលិកម៉េត្រូក្នុងក្រុងប៉ារីស ក៏មានគម្រោងដើរចេញពីការងារ នៅថ្ងៃទី០២ ខែមិថុនា ស្របពេលដែល អាកាសយានិកក្រុមហ៊ុនអាកាសចរណ៍ Air France ក៏មានផែនការធ្វើបាតុកម្មរយៈពេលវែង។ បាតុកម្មនេះ បង្កការព្រួយបារម្ភលើ ព្រឹត្តិការណ៍ពានរង្វាន់ទ្វីបអឺរ៉ុប ដែលនឹងចាប់ផ្ដើមនៅថ្ងៃទី១០ ខែមិថុនា។
សូមរម្លឹកថា អស់រយៈពេលបីខែមកហើយ ដែលក្រុមបាតុករចេញមក ប្រឆាំងនឹងច្បាប់ការងារថ្មី ដែលពេលខ្លះឈានដល់អំពើហិង្សាផងដែរ។ ប៉ុន្តែ លោកប្រធានាធិបតី ហ្វ្រង់ស្វ័រ ហូឡង់ បានទាត់ចោលការទាមទាររបស់សហជីព ដែលចង់ឲ្យរដ្ឋាភិបាលបារាំងទមា្លក់ចោលច្បាប់ការងារថ្មី។ លោក ហូឡង់ ប្រាប់កាសែត Sud Ouest ថា វិធានការថ្មី ដែលបង្កការងាយស្រួយក្នុងការជួល ឬដេញ បុគ្គលិក នឹងមិនត្រូវបោះចោលទេ។
ទាក់ទិននឹងការគំរាមកំហែង ប្រធានាធិបតីបារាំង បញ្ជាក់ថា បាតុកម្មមិនមែនជារឿងសំខាន់ទេ តែការគំរាមពិតប្រាកដចំពោះការប្រកួត គឺសកម្មភាពភេរវកម្មឯណោះទេ។ ជាមួយនឹងបញ្ហានេះ កងកម្លាំងបារាំង៥០០នាក់ បានហាត់សមសកម្មភាពវាយប្រហារនៅឯកីឡដ្ឋាន Stade de France ជាទីដែលមានកម្មវិធីប្រកួតទីមួយ និងវគ្គផ្ដាច់ព្រ័ត្រ។
ស្របគ្នានេះដែរ លោក Philippe Martinez ដែលជាប្រធានសហជីព CGT ដ៏មានឥទ្ធិពលអះអាងថា អ្វីៗស្ថិតក្នុងដៃរបស់រដ្ឋាភិបាលទាំងស្រុង។ លោកបញ្ជាក់ថា យើងមិនមែនរារាំងមនុស្ស ទស្សនាការប្រកួតនោះទេ ប៉ុន្តែរដ្ឋាភិបាលត្រូវតែរៀបចំ ឲ្យមានការពិភាក្សាមួយ។ អ្វីៗ ស្ថិតក្នុងដៃពួកគេ៕
© រក្សាសិទ្ធិដោយ thmeythmey.com