ប៉ូឡូញ៖ ទ័ពណាតូមួយវរសេនាតូចល្មម អាចទប់ទល់ការឈ្លានពានរបស់រុស្សីបាន

អន្តរជាតិ

ប៉ូឡូញ៖ ទ័ពណាតូមួយវរសេនាតូចល្មម អាចទប់ទល់ការឈ្លានពានរបស់រុស្សីបាន

02, Jun 2016 , 3:00 pm

រូបភាព

ដោយ: តន ចាន់រិទ្ធារ៉ា

រដ្ឋមន្ត្រីការពារជាតិប៉ូឡូញ បង្ហាញការជឿជាក់ថា កងទ័ពណាតូតែមួយវរសេនាតូច គឺគ្រប់គ្រាន់សម្រាប់ទប់ទល់ នឹងសកម្មភាពឈ្លានពានរបស់រុស្សី មកលើប៉ូឡូញ។ ការលើកឡើងនេះ គឺស្របពេលណាតូ នឹងបញ្ជូនកងកម្លាំងបន្ថែមដល់ប៉ូឡូញ និងរដ្ឋនៅសមុទ្របាល់ទិកដទៃទៀត ដើម្បីការពារខ្លួន ពីការឈ្លានពានរបស់រុស្សី។

សូមស្ដាប់ព័ត៌មានលម្អិត៖

ក្នុងកិច្ចសម្ភាសជាមួយកាសែត Defense News រដ្ឋមន្ត្រីការពារជាតិប៉ូឡូញ លោក Antoni Macierewicz អះអាងថា ប្រសិនបើរុស្សី ប្រុងលុកលុយប៉ូឡូញ ទ័ពរបស់ណាតូមួយវរសេនាតូច មានលទ្ធភាពជួយការពារប៉ូឡូញបានមួយគ្រាដែរ។ ការអះអាងរបស់រដ្ឋមន្ត្រីការពារជាតិប៉ូឡូញ ធ្វើឡើងបន្ទាប់ពីអគ្គលេខាធិការណាតូ លោក Jens Stoltenberg បញ្ជាក់ថា ណាតូនឹងបញ្ជូនកងកម្លាំងបួនវរសេនាតូច ទៅតំបន់នេះ។

នៅថ្ងៃទី៣០ ខែឧសភា ក្នុងដំណើរទៅកាន់ប៉ូឡូញ លោក Stoltenberg និយាយថា កងទ័ពណាតូ នឹងត្រូវបន្ថែមទៅប៉ូឡូញ នៅក្រោយជំនួបកំពូលណាតូក្នុងក្រុងវ៉ាសូវី នៅខែកក្កដា។ ថ្លែងបន្ទាប់ពីជំនួបជាមួយ លោក Andrzej Duda ប្រមុខរដ្ឋប៉ូឡូញ អគ្គលេខាធិការរូបនេះបន្តថា ការបញ្ជូនទ័ពទៅកាន់ប៉ូឡូញ និងប្រទេសតំបន់បាល់ទិក ជាសញ្ញាបង្ហាញពីជំហរច្បាស់លាស់របស់ណាតូ គឺការឈ្លានពានប៉ូឡូញ ជាការឈ្លានពានសម្ព័ន្ធយោធាណាតូទាំងមូល។

យ៉ាងណាមិញ គេមិនទាន់ដឹងច្បាស់ ពីចំនួនកងទ័ពណាតូ ដែលនឹងត្រូវបញ្ជូនមកកាន់ប៉ូឡូញនោះទេ។ បើតាមលោក Macierewicz ចំនួននៃកងកម្លាំងដែលត្រូវបន្ថែម កំពុងតែត្រូវពិភាក្សា។ ប៉ុន្តែ យោងតាមរចនាសម្ព័ន្ធយោធារបស់អាមេរិក មួយកងវរសេនាតូច មានទាហាន ចាប់ពី៣០០នាក់ ដល់៨០០នាក់។ ជាមួយនឹងការបញ្ជូនទ័ពនេះ លោក Macierewicz បានឲ្យដឹងដែរថា កងទ័ពដែលនឹងត្រូវបន្ថែម រួមជាមួយនឹងកងទ័ពរដ្ឋម្ចាស់ផ្ទះ គួរតែអាចទប់ទល់ការឈ្លានពានបាន ហើយវានឹងទុកពេលឲ្យសមស្រប ដល់សម្ព័ន្ធណាតូ ដើម្បីរៀបចំកងទ័ពជំនួយ សម្រាប់ការពាររដ្ឋជាសមាជិករបស់ខ្លួន។

អ្វីដែលគួរឲ្យចាប់អារម្មណ៍នោះ ការអធិប្បាយរបស់រដ្ឋមន្ត្រីការពារជាតិប៉ូឡូញ ទំនងជាការឆ្លើយតបនឹងការគំរាមរបស់ប្រធានាធិបតីរុស្សី លោក វ្ល៉ាឌីមៀ ពូទីន ដែលគំរាមវាយប្រហារប៉ូឡូញ និងរ៉ូមានី។ បើតាមសារព័ត៌មាន RT ក្នុងដំណើរទស្សនកិច្ចទៅកាន់ក្រិក លោក ពូទីន ប្រកាសថា រុស្សីគ្មានជម្រើសអ្វីទេ ក្រៅដាក់គោលដៅលើរ៉ូមានី ដែលមានប្រព័ន្ធការពារមីស៊ីលនៅទីនោះ ហើយប៉ូឡូញ ក៏ស្ថិតក្នុងស្ថានភាពដូចគ្នាដែរ។

ការលេបយកតំបន់គ្រីមេរបស់អ៊ុយក្រែន ពីសំណាក់រុស្សី ធ្វើប្រទេសដែលជាសម្ព័ន្ធមិត្តរបស់ណាតូ មានព្រំដែននៅកៀករុស្សី ភ័យយ៉ាងខ្លាំង។ ប្រទសទាំងនោះ បារម្ភថា ថ្ងៃណាមួយ នឹងដល់វេនពួកគេម្ដងមិនខានឡើយ ដែលរឿងនេះ ធ្វើឲ្យពួកគេ ងាករកជំនួយពីសម្ព័ន្ធយោធាណាតូ ដើម្បីទប់ទល់ការឈ្លានពានណាមួយ។ ជាមួយនឹងសំណើបែបនេះ ណាតូ ក៏សម្លឹងឃើញការពង្រឹងសមត្ថភាពការពារប្រទេសទាំងនោះ។

ទន្ទឹមនឹងនេះ ណាតូ នឹងពង្រាយកងទ័ពចំនួនបួនវរសេនាតូច នៅប្រទស អេស្តូនី ឡាត់វី លេតូនី និងប៉ូឡូញ។ កាលពីខែឧសភា កន្លងទៅ ណាតូ ក៏បានបំពាក់ប្រព័ន្ធមីស៊ីលការពារអាកាសរួចហើយនៅ រ៉ូមានី និងត្រៀមដាក់នៅប៉ូឡូញបន្ថែមទៀត ដែលរឿងនេះហើយ ធ្វើរុស្សីមិនសប្បាយចិត្ត និងចោទណាតូថា ប្រព័ន្ធមីស៊ីលទាំងនោះ គឺដាក់សំដៅលើរុស្សី។ រុស្សី ក៏ឆ្លើយតបវិញ ដោយការបង្កើតកងឯកភាពកងទ័ពថ្មីៗ ក៏ដូចជាគំរាមវាយប្រហារ រ៉ូមានី និងប៉ូឡូញ ជាដើម៕