ឯកឧត្តម កឹម សុខា ស្រកគីឡូ!

ជាតិ

នយោបាយជាតិ

ឯកឧត្តម កឹម សុខា ស្រកគីឡូ!

03, Jun 2016 , 10:51 am

រូបភាព

ដោយ: រំដួល ចិត្រា (Romdoul Chetra)

ប្រធានស្តីទីគណបក្សសង្គ្រោះជាតិ ឯកឧត្តម កឹម សុខា កំពុងស្នាក់នៅទីស្នាក់ការគណបក្ស ។ នៅពេលនេះឯកឧត្តម កឹម សុខា មានសុខភាពល្អជាធម្មតាទេ ប៉ុន្ដែស្រកគីឡូ ស្គមជាងមុន។ នេះជាការបញ្ជាក់របស់លោក អេង ឆៃអ៊ាង មន្ត្រីជាន់ខ្ពស់គណបក្សសង្គ្រោះជាតិ។

លោក អេង ឆៃអ៊ាង បញ្ជាក់ប្រាប់សារព័ត៌មានថ្មីៗថា មូលហេតុដែលឯកឧត្តម កឹម សុខា ស្រកគីឡូស្គមជាមុន ដោយសារតែលោកមានការគិតច្រើនក្នុងការរកដំណោះស្រាយនយោបាយ ជាពិសេសមានការទទួលជួបសមាជិក សមាជិកា អ្នកគាំទ្រច្រើននៅទីស្នាក់ការគណបក្សទើបមិនសូវបានសម្រាក ។

បើនិយាយពីការទទួលទានវិញ លោក អេង ឆៃអ៊ាង អះអាងថា ឯកឧត្តម កឹម សុខា តែងតែទទួលបានការយកចិត្តទុកដាក់ពីគ្រួសារ និងមន្ត្រីបក្ស ដោយមានការរៀបចំចំណីម្ហូបអាហារតាមតម្រូវការ និងទម្លាប់ប្រចាំថ្ងៃរបស់ឯកឧត្តម កឹម សុខា។

ក្រោយពីរងបទចោទផ្ទួនៗពីតុលាការ និងរងការចាប់ខ្លួនពីសមត្ថកិច្ច ឯកឧត្តម កឹម សុខា កំពុងស្នាក់នៅទីស្នាក់ការគណបក្សសង្គ្រោះជាតិនៅឡើយទេ។ ឯកឧត្តម កឹម សុខា ត្រូវបានអយ្យការអមសាលាដំបូងរាជធានីភ្នំពេញ សម្រេចចោទប្រកាន់ពីបទ «បដិសេធក្នុងការចូលខ្លួន» ក្នុងនាមជាសាក្សីលើសំណុំរឿង សញ្ចារកម្ម តាមមាត្រា៥៣៨នៃក្រមព្រហ្មទណ្ឌ កាលពីថ្ងៃទី២៦ ឧសភា ដោយអយ្យការបញ្ជាក់ថា ជាបទល្មើសជាក់ស្តែង ។ កាលពីថ្ងៃទី០២ មិថុនា ចៅក្រមស៊ើបសួរ សាលាដំបូងរាជធានីភ្នំពេញ លោក ថាន់ ឡេង បានចេញដីកាបង្គាប់ឲ្យឯកឧត្តម កឹម សុខា ចូលខ្លួនបំភ្លឺនៅសាលាដំបូងនៅថ្ងៃទី ១៤ មិថុនា ដើម្បីសាកសួរពីដំណើររឿងពីបទ «បដិសេធក្នុងការចូលខ្លួន» ក្នុងនាមជាសាក្សីនេះ។

កន្លងមកអ្នកនាំពាក្យនៃក្រសួងយុត្តិធម៌ លោក គឹម សន្តិភាព អះអាងថា នីតិវិធីរបស់តុលាការលើករណីឯកឧត្តម កឹម សុខា ពេលនេះគឺត្រឹមត្រូវតាមច្បាប់ ហើយក្នុងករណីបទល្មើសជាក់ស្តែងនេះ អភ័យឯកសិទ្ធិសភារបស់ឯកឧត្តម កឹម សុខា មិនអាចរារាំងដំណើរការនីតិវិធីតុលាការឡើយ។

តែសម្រាប់លោក អេង ឆៃអ៊ាង នីតិវិធីតុលាការលើដំណើររឿងរបស់ឯកឧត្តម កឹម សុខា គឺមិនត្រឹមត្រូវនោះទេ ដោយផ្ទុយពីច្បាប់រដ្ឋធម្មនុញ្ញ មាត្រា ៨០ ស្តីពី អភ័យឯកសិទ្ធិតំណាងរាស្ត្រ។ លោកថា បញ្ហានេះគឺជារឿងនយោបាយ ដោយលោកទទូចឲ្យដៃគូរសន្ទនាខ្លួន ចូលតុចរចាជាមួយគ្នាដើម្បីបន្ថយភាពតានតឹងនយោបាយនេះ៕