អន្តរជាតិ
នយោបាយអន្តរជាតិ
លោក អូបាម៉ា ប្រាប់ព្រឹទ្ធសភាផ្ដល់សច្ចាប័នលើច្បាប់សមុទ្រអន្តរជាតិ
×
ប្រធានាធិបតីអាមេរិក បានស្នើឲ្យព្រឹទ្ធសភា ផ្ដល់សច្ចាប័នលើច្បាប់សមុទ្រអន្តរជាតិឆ្នាំ១៩៨២ (UNCLOS) ក្នុងក្ដីសង្ឃឹមថា នឹងជួយពង្រឹងអំណាចលោក ប្រឈមមុខជាមួយចិន លើជម្លោះនៅសមុទ្រចិនខាងត្បូង។ អាមេរិក ដែលជារដ្ឋខាងក្រៅ នៃជម្លោះបានលូកដៃចូលក្នុងជម្លោះនេះ ខណៈសម្ព័ន្ធមិត្តរបស់ខ្លួន ជាភាគីពាក់ព័ន្ធ ដោយផ្ទាល់ក្នុងរឿងនេះ។
ប្រមុខរដ្ឋអាមេរិក លោក បារ៉ាក់ អូបាម៉ា បានទទូចទៅព្រឹទ្ធសភាអាមេរិក ឲ្យអនុម័តលើច្បាប់សមុទ្រអន្តរជាតិ ដែលជាគោលការណ៍ដោះស្រាយជម្លោះដែនសមុទ្រនៅលើពិភពលោក ខណៈអាមេរិក នៅមិនទាន់ផ្ដល់សច្ចាប័នលើច្បាប់អន្តរជាតិនេះ នៅឡើយទេ។ ការទទូចរបស់លោក អូបាម៉ា ធ្វើឡើងចំពេលដែល អាមេរិក កំពុងលូកដៃជ្រៅ ក្នុងជម្លោះសមុទ្រចិនខាងត្បូង ដែលមានចិន ជាមហាអំណាច ទាមទារទឹកដីនៅទីនោះ។
ថ្លែងពីសាលាទ័ពជើងអាកាស នៅថ្ងៃទី០២ ខែមិថុនា ប្រធានាធិបតីអាមេរិក និយាយថា ព្រឹទ្ធសភា គួរតែយល់ព្រម លើច្បាប់សមុទ្រនេះ ដែលមានលទ្ធភាពដោះស្រាយរាល់បញ្ហាដែនសមុទ្រទាំងអស់។ ការស្នើដូចនេះ ក៏ដោយសារតែ ក្នុងអាណត្តិរបស់លោក មានការកើនឡើងយ៉ាងខ្លាំង ទាំងសកម្មភាពយោធា និងការទូត លើការទាមទាររបស់ក្រុងប៉េកាំង លើដែនអធិបតេយ្យក្នុងសមុទ្រចិនខាងត្បូង។
«ប្រសិនយើងពិតជាព្រួយបារម្ភ សកម្មភាពរបស់ចិនក្នុងសមុទ្រចិនខាងត្បូង ព្រឹទ្ធសភា គួរតែជួយក្នុងករណីនេះ ដោយយល់ព្រមផ្ដល់សច្ចាប័ន លើអនុសញ្ញាស្ដីពីច្បាប់សមុទ្រ»។ នេះជាការលើកឡើងរបស់លោក អូបាម៉ា ដែលផ្សាយដោយកាសែត Bangkok Post។
តំបន់សមុទ្រចិនខាងត្បូង ត្រូវបានទទួលស្គាល់ថា ជាតំបន់ធ្វើនាវាចរន៍ដ៏សំខាន់ ក្នុងតំបន់។ មិនតែប៉ុណ្ណោះ គេជឿថា តំបន់នេះ ពោរពេញទៅដោយធនធានរ៉ែ និងថាមពល យ៉ាងច្រើន។ ប៉ុន្តែ តំបន់នេះ ក៏ជាទីតាំងប្រទាញប្រទង់ រវាងមហាយក្សចិន និងប្រទេសមួយចំនួនទៀត ដែលទាមទារការគ្រប់គ្រងលើតំបន់នេះដូចគ្នាដែរ។
ទន្ទឹមនឹងការទាមទារតាមផ្លូវការទូត ចិន ដែលជាមហាយក្សពិភពលោក ក៏ពង្រីកសកម្មភាពយោធា ទៅកាន់តំបន់ជម្លោះនេះផងដែរ។ ការពង្រាយនេះ ធ្វើឲ្យប្រទេសទាមទារដទៃទៀត ព្រួយបារម្ភយ៉ាងខ្លាំង និងបានងាកទៅចាប់ដៃក្រុង វ៉ាស៊ីនតោន ដើម្បីទប់ទល់នឹងឥទ្ធិពលរបស់ចិន។
ជាមួយនឹងសកម្មភាពយោធារបស់ចិនក្នុងតំបន់សមុទ្រចិនខាងត្បូង ប្រធានាធិបតី អូបាម៉ា បានបញ្ជាឲ្យបញ្ជូន នាវាអាមេរិកទៅកាន់កន្លែងមានជម្លោះ ដោយអះអាងថា ជាសិទ្ធិសេរីភាពនាវាចរណ៍។ មួយវិញទៀត ក្រុងវ៉ាស៊ីនតោន ជឿថា ការមិនទាន់ផ្ដល់សច្ចាប័នលើច្បាប់សមុទ្រអន្តរជាតិ ជាការបង្អាប់ជំហររបស់អាមេរិក ដែលតែងតែចង់ដោះស្រាយជម្លោះ ដោយសន្តិវិធី៕
Tag:
បារ៉ាក់អូបាម៉ា
អាមេរិក
សមុទ្រចិនខាងត្បូង
© រក្សាសិទ្ធិដោយ thmeythmey.com