អន្តរជាតិ
សិង្ហបុរី ដាក់ទីតាំងច្រើនជាង៤០០ ជាកន្លែងគ្មានផ្សែងបារី
×
សិង្ហបុរី បានប្រកាសដាក់ទៅតាំងច្រើនជាង៤០០កន្លែង ជាទីតាំងគ្មានផ្សែងបារី ដើម្បីរក្សាបរិស្ថាន លើកោះតូចនេះ។ ការដាក់ទីតាំងថ្មីៗនេះ ជាការបន្ថែមលើទីតាំងជាច្រើន ដែលមានស្រេច ក្នុងគោលដៅលើកកម្ពស់សោភ័ណភាពទីក្រុង ឲ្យកាន់តែស្រស់បំព្រង។
ចាប់ពីថ្ងៃទី០១ ខែមិថុនា អាជ្ញាធរសិង្ហបុរី បានដាក់កន្លែងស្តុកទឹក និងសួនច្បារច្រើនជាង៤០០ កន្លែង ដែលរួមទាំងទីតាំងឯកជន និងសាធារណៈ ទៅក្នុងបញ្ជីតំបន់ ដែលគ្មានផ្សែងបារី។ កាលពីមុន ការជក់បារី ត្រូវបានហាមឃាត់ ក្នុងទីតាំងចំនួនច្រើនជាងបីម៉ឺនកន្លែង ដែលរួមមាន ផ្សារទំនើប រោងកុន និងមន្ទីរពេទ្យ ជាដើម។
ការកំណត់ថ្មីនេះ មានរយៈពេលបីឆ្នាំ បន្ទាប់ពីការហាមជក់បារី ត្រូវបានពង្រីកវិសាលភាព លើតំបន់មួយចំនួន ដូចជា ដំបូលអាគារដែលទំនេរ ផ្លូវដើរ ស្ពាន ព្រមទាំងទីតាំង ដែលមានចម្ងាយ៥ម៉ែត ពីចំណតឡានក្រុង។
ទាក់ទិននឹងវិធានការថ្មីនេះ លោកស្រី Amy Khor មន្ត្រីជាន់ខ្ពស់រដ្ឋាភិបាល ទទួលបន្ទុកបរិស្ថាន និងធនធានទឹក បានថ្លែងទៅកាន់សភា កាលពីខែមេសា ថា គោលដៅវែងឆ្ងាយរបស់រដ្ឋាភិបាល គឺ បំបាត់ការជក់បារីឲ្យអស់ ពីទីសាធារណៈនានា។ ហើយវា នឹងជួយការពារអ្នកដែលមិនជក់បារី ចៀសផុតពីផលវិបាក បណ្ដាលមកពីការស្រូបផ្សែងបារី។
បើយោងតាមការស្ទាបស្ទង់សុខភាពថ្នាក់ជាតិ ១៤.៣ភាគរយ នៃប្រជាជនសិង្ហបុរី ដែលមានអាយុចន្លោះពី១៨ ទៅ៦៩ឆ្នាំ ជាអ្នកជក់បារី។ យ៉ាងណាមិញ ដើម្បីផ្ដល់ពេលវេលាឲ្យអ្នកជក់បារី សម្របខ្លួននឹងបទបញ្ជាថ្មី អ្នកដែលរកឃើញថា អុជបារី ក្នុងតំបន់ស្តុកទឹក ឬឧទ្យាន ក្នុងរយៈពេលបីខែដំបូង នឹងទទួលលការព្រមានសិនប៉ុណ្ណោះ។
ទីភ្នាក់ងារបរិស្ថានជាតិសិង្ហបុរី (NEA) បានឲ្យដឹងដែរថា ចំពោះអ្នកជក់បារី ដែលនៅតែប្រពឹត្តិដដែល បើទោះជារងការព្រមាននោះ នឹងត្រូវរងពិនន័យមិនខានឡើយ។ ការពិន័យ ចំពោះការជក់បារីក្នុងតំបន់ផ្ទះឯកជន ដែលនៅជិតឧទ្យាន NPark គឺមានដល់២ពាន់ដុល្លារឯណោះ ខណៈដែល ក្នុងតំបន់ហាមឃាត់ផ្សេងទៀត នឹងពិន័យដល់ទៅ១ពាន់ដុល្លារ។ កាលពីឆ្នាំមុន មានករណីពិន័យ រហូតដល់ទៅជិតពីរម៉ឺន។
លើសពីនេះ ទីតាំងជាច្រើនទៀត ក៏ត្រូវដាក់បញ្ចូលក្នុងបញ្ជីទីតាំង គ្មានផ្សែងបារីផងដែរ ដូចជា ទីតាំងដែលគ្រប់គ្រងដោយ JTC Corporation និងក្រុមប្រឹក្សាទីក្រុង ក៏ដូចជាសួន Yunnan ដែលស្ថិតក្នុ្ងតំបន់ Jurong West។ ចំណែកឯ ទីតាំងមួយចំនួនទៀត ដែលគ្រប់គ្រងដោយកងទ័ព និងក្រសួងមហាផ្ទៃ នឹងត្រូវដាក់ក្រោមច្បាប់ស្ដីពីការហាមជក់បារី។ ទីភ្នាក់ងារ NEA និយាយថា បទបញ្ញត្តិថ្មីនេះ មិនបានផ្លាស់ប្ដូរការពិន័យ ដែលស្ថាប័នទាំងពីរ បុគ្គល ដែលល្មើសនោះទេ។ មួយវិញទៀត NEA បញ្ជាក់ដែរថា ម្ចាស់នៃទីតាំង ដែលប៉ះពាល់ដោយបញ្ជាថ្មីនេះ អាចកំណត់កន្លែងជក់បារី ក្នុងទីតាំងខ្លួនឯងបាន៕
© រក្សាសិទ្ធិដោយ thmeythmey.com