កីឡាជាតិ
ជាតិ
Asian Cup៖ កម្ពុជាឡើងទៅកាន់ជុំទីបីក្រោយឈ្នះឆាយនីស តៃប៉ិ សរុប ៤-២
× ក្រុមកីឡាបាល់ទាត់ជម្រើសជាតិកម្ពុជាបានផ្តល់ក្តីរំភើបដល់ក្រុមអ្នកគាំទ្ររបស់ខ្លួនជាមួយនឹងជ័យជម្នះ ២-០ លើភ្ញៀវឆាយនីស តៃប៉ិ នៅពហុកីឡដ្ឋានជាតិក្នុងជំនួបជើងទីពីរវគ្គ Play-Off ពានរង្វាន់ AFC Asian Cup 2019 នាល្ងាចថ្ងៃអង្គារនេះ។ ជ័យជម្នះនេះ នាំឲ្យកម្ពុជាឈានទៅកាន់ជុំទីបី ជាមួយនឹងលទ្ធផលសរុប ៤-២ ក្រោយក្រុមទាំងពីរស្មើគ្នា ២-២ នៅទឹកដីឆាយនីស តៃប៉ិ។
ការប្រកួតបានត្រឹម៦នាទី ចាន់ វឌ្ឍនាកា មានឱកាសទាត់បាល់ហ្វ្រីឃីតពីមុំខាងស្តាំ នាំឲ្យខ្សែការពារ ហុង ផេង ដែលជាមិត្តរួមក្រុមបឹងកេតអង្គររបស់ខ្លួន តែតបាល់បញ្ចូលទីនាំមុខ ១-០ ។ ឈានដល់នាទី ៥៨ ប្រាក់ មុន្នីឧត្តម មានឱកាសទាត់បាល់ប៉េណាល់ទី បន្ទាប់ពីអ្នកចាំទីឆាយនីស តៃប៉ិ Pan Wen Chieh ធ្វើឲ្យ ចាន់ វឌ្ឍនាកា ដួលក្នុងតំបន់គ្រោះថ្នាក់។
ឧត្តម ត្រូវបានលោកអាជ្ញាកណ្តាលជនជាតិហ្ស៊កដង់ Ahmed Faisal Mohammad Alali ត្រូវឲ្យទាត់បាល់ប៉េណាល់ទីសារជាថ្មី បន្ទាប់ពីការទាត់លើកទីមួយខុសបច្ចេកទេស។ ទោះបីជាយ៉ាងណាក៏ ខ្សែប្រយុទ្ធព្រះខ័នរាជស្វាយរៀងដែលទើបលេងបាន២នាទី រូបនេះ ធ្វើបានសម្រេចដោយជោគជ័យនាំកម្ពុជានាំមុខ ២-០។
កម្ពុជារង់ចាំមើលការចាប់ឆ្នោតរើសពូលសម្រាប់ជុំទីបី ខណៈឆាយនីស តៃប៉ិ ត្រូវប៉ះជាមួយជាមួយទីម័រខាងកើតសម្រាប់ការប្រកួត Play-Off លើកទីពីរ។ ទីម័រខាងកើត ត្រូវបានម៉ាឡេស៊ី បានក្នុងលទ្ធផលសរុបទាំងពីរជើង ៦-០ ។
ជម្រើសជាតិកម្ពុជា៖ ស៊ូ យ៉ាទី (អ្នកចាំទី), ហុង ផេង, ណុប តុលា (សឿយ វិសាល ៧៨), រស់ សំអឿន, ហូយ ផល្លីន (ប្រាក់ មុន្នីឧត្តម ៥៦), កែវ សុខផេង, ចាន់ វឌ្ឍនាកា (ស៊ុន វណ្ណដេត ៩០+១), ទិត្យ ឌីណា, ច្រឹង ពលរដ្ឋ, ឈិន ឈឿន, សុខ សុវណ្ណ (ប្រធានក្រុម)។
កីឡាករដែលមិនបានចូលលេង៖ នេន សុធារ័ត្ន, ឃួន ឡាបូរ៉ាវី, សុះ ស៊ូហាណា, ងយ ស្រ៊ីន, សុក សំណាង, ឡេង មករា, អ៊ុំ សេរីរត្នន៍, កែវ សុខសីលា, ឆេង ម៉េង, ប៊ិន ធារី (ជាប់ពិន័យកាតក្រហម), ភួង សុខសាណា (របួស)។
Tag:
បាល់ទាត់
ជម្រើសជាតិ
មិត្តភាពអន្តរជាតិ
Asian Cup
© រក្សាសិទ្ធិដោយ thmeythmey.com