កាលវិភាគប្រកួតដែលមិនគួរឲ្យជឿ និងដ៏ពិបាកសម្រាប់ក្រុមបឹងកេតអង្គរ ព្រះខ័នរាជស្វាយរៀង និងក្រសួងការពារជាតិ ដែលមានកីឡាកររបស់ខ្លួនទើបបំពេញបេសកកម្មក្នុងក្រុមជម្រើសជាតិបានមួយថ្ងៃ ប៉ុន្តែត្រូវបន្តកាតាព្វកិច្ចបន្ថែមទៀតសម្រាប់ក្លិបក្នុងយុទ្ធនាការដណ្តើមពានរង្វាន់សម្តេច ហ៊ុន សែន នាថ្ងៃទី៨ ខែមិថុនា នេះ។
បន្ទាប់ពីសម្រាកអស់រយៈពេលជាច្រើនថ្ងៃ ដើម្បីទុកពេលឲ្យកីឡាករដែលនៅក្នុងក្របខណ្ឌមិត្តហ្វូនខេមបូឌានលីកប្រមូលផ្តុំជម្រើសជាតិហ្វឹកហាត់ត្រៀមប្រកួតអន្តរជាតិនានា ការប្រកួតពានរង្វាន់សម្តេច ហ៊ុន សែន ប្រចាំឆ្នាំ២០១៦ នឹងចាប់ផ្តើមការប្រកួតសប្តាហ៍ទី៩ ដែលជាការប្រកួតបញ្ចប់ក្នុងពូល A និងពូល B ដើម្បីស្វែងរក២ក្រុមក្នុងពូលនីមួយៗឡើងទៅប្រកួតនៅវគ្គបន្ត។ ក្រុមបឹងកេតអង្គរ ត្រូវប្រជែងជាមួយ ក្រុមក្រសួងការពារជាតិ ដើម្បីឈរកំពូលតារាងក្នុងពូល B ខណៈខេមពូឌានថាយហ្គឺរ ប្រជែងជាមួយ ព្រះខ័នរាជស្វាយរៀង ដើម្បីឈរកំពូលតារាងក្នុងពូល A។
ក្រុមបឹងកេតអង្គរ និងក្រសួងការពារជាតិ ជាក្រុមដែលមានពិន្ទុខ្ពស់ជាងគេនៅក្នុងពូល B ពោលគឺមាន១២ពិន្ទុដូចគ្នា ក្រុមទាំងពីរត្រូវជួបប្រកួតគ្នានាល្ងាចនេះនៅពហុកីឡដ្ឋានជាតិ ដើម្បីប្រជែងគ្នាឈរនៅកំពូលតារាងក្នុងពូលB ហើយក្រុមទាំងពីរនេះត្រូវឡើងទៅប្រកួតនៅវគ្គបន្តតំណាងឲ្យពូល B ដោយស្វ័យប្រវត្តិផងដែរ។
ថ្វីត្បិតតែនេះ មិនមែនជាការប្រកួតដែលស្ថិតនៅក្រោមសម្ពាធក៏ដោយ ប៉ុន្តែក្រុមបឹងកេតអង្គរ និងការពារជាតិ ចង់បង្ហាញការប្រកួតដ៏ទាក់ទាញ ជាពិសេសវត្តមានរបស់ ចាន់ វឌ្ឍនាកា ហុង ផេង ស៊ូ យ៉ាទី សុខ សុវណ្ណ និងរស់ សំអឿន សម្រាប់បឹងកេត ក៏ដូចជា ឈិន ឈឿន និង ច្រឹង ពលរដ្ឋ សម្រាប់ការពារជាតិ ជាដើម។
ចំណែកខេមបូឌានថាយហ្គឺរ និងព្រះខ័នរាជស្វាយរៀង ដែលជាក្រុមត្រូវឡើងទៅប្រកួតនៅវគ្គបន្តតំណាងឲ្យពូល A នឹងត្រូវប្រជែងគ្នានារសៀលនេះ នៅកីឡដ្ឋានវេស្ទើនផងដែរ ដើម្បីដណ្តើមឈរលំដាប់លេខ១ក្នុងពូល A។ ខេមបូឌានថាយហ្គឺរ មានកម្លាំងជើងពេញ ខណៈព្រះខ័នរាជស្វាយរៀង ដែលមាន ណុប តុលា ហូយ ផល្លីន សឿយ វិសាល និងប្រាក់ មុន្នីឧត្តម ទើបនឹងចូលលេងឲ្យក្រុមជម្រើសជាតិ បានមួយថ្ងៃប៉ុណ្ណោះ។
ជាមួយគ្នានេះ ខេត្តកណ្តាល, យុវជនបឹងកេតកំពង់ចាម, ខេត្តកំពង់ឆ្នាំង និងក្រុមកំពង់ផែស្វយ័តខេត្តព្រះសីហនុ នឹងធ្វើការប្រកួតបង្គ្រប់កិច្ចនៅក្នុងពូល A ដោយខេត្តកណ្តាល បើកទ្វារកីឡដ្ឋានរបស់ខ្លួនស្វាគមន៍ យុវជនបឹងកេតកំពង់ចាម ចំណែកម្ចាស់ផ្ទះខេត្តកំពង់ឆ្នាំង ទទួលក្រុមភ្ញៀវមកពីកំពង់ផែស្វយ័តខេត្តព្រះសីហនុ។
ទន្ទឹមនឹងនេះ ម្ចាស់ផ្ទះខេត្តព្រៃវែង នឹងបើកទ្វារកីឡដ្ឋានរបស់ខ្លួនស្វាគមន៍ក្រុមភ្ញៀវ កងរាជអាវុធហត្ថខេត្តកំពង់ធំ ឬឯ កំពង់ផែស្វយ័តខេត្តព្រះសីហនុ នឺងធ្វើដំណើរទៅកាន់ខេត្តកំពង់ឆ្នាំង ដើម្បីជួបប្រកួតជាមួយក្រុមម្ចាស់ផ្ទះ ខេត្តកំពង់ឆ្នាំង។ គួរបញ្ជាក់ថា ការប្រកួតនេះរបស់ក្រុមទាំង៤នេះ គ្រាន់តែជាការប្រកួតបង្គ្រប់កិច្ចប៉ុណ្ណោះ៕
កម្មវិធីប្រកួតពានរង្វាន់សម្តេច ហ៊ុន សែន ថ្ងៃទី៨ ខែមិថុនា នេះ៖
ពូល A៖
-ម៉ោង៣:៣០-ខេត្តកណ្តាល ជួប យុវជនបឹងកេតកំពង់ចាម នៅកីឡដ្ឋានខេត្តកណ្តាល
-ម៉ោង៣:៣០-ខេត្តកំពង់ឆ្នាំង ជួប កំពង់ផែស្វយ័តខេត្តព្រះសីហនុ នៅកីឡដ្ឋានខេត្តកំពង់ឆ្នាំង
-ម៉ោង៣:៣០-ខេមបូឌានថាយហ្គ័រ ជួប ព្រះខ័នរាជស្វាយរៀង នៅកីឡដ្ឋានវេស្ទើន
ពូល B៖
-ម៉ោង៣:៣០-ខេត្តព្រៃវែង ជួប កងរាជអាវុធហត្ថខេត្តកំពង់ធំ នៅកីឡដ្ឋានខេត្តព្រៃវែង
-ម៉ោង៣:៣០-អាស៊ីអឺរ៉ុបយូណាយធីត ជួប ខេត្តស្ទឹងត្រែង នៅពហុកីឡដ្ឋានជាតិ
-ម៉ោង១៨:០០-បឹងកេតអង្គរអែហ្វស៊ី ជួប ក្រសួងការពារជាតិ នៅពហុកីឡដ្ឋានជាតិ។