ប្រធានាធិបតីស៊ីរីប្រកាសរំដោះទឹកដីទាំងអស់ពីក្រុមឧទ្ទាម

អន្តរជាតិ

នយោបាយអន្តរជាតិ

ប្រធានាធិបតីស៊ីរីប្រកាសរំដោះទឹកដីទាំងអស់ពីក្រុមឧទ្ទាម

08, Jun 2016 , 4:02 pm

រូបភាព

ដោយ: តន ចាន់រិទ្ធារ៉ា

ប្រធានាធិបតីស៊ីរី បានសន្យាដណ្ដើមយកទឹកដីទាំងអស់ ដែលក្រុមឧទ្ទាមប្រឆាំងវាយដណ្ដើមនឹងរដ្ឋាភិបាលរបស់លោក។ ការសន្យាបែបនេះ ហាក់ដូចជាការបដិសេធរបស់ស៊ីរី ចំពោះផែនការផ្ទេរអំណាចដោយសន្តិវិធី ដែលផ្ដួចផ្ដើមដោយអាមេរិក និងរុស្សី ស្របពេលដែលវិបត្តិមនុស្សធម៌ ក៏នៅមិនទាន់ដោះស្រាយចេញនៅឡើយ។

ប្រធានាធិបតីស៊ីរី លោក បាសសា អាល់ អាសាដ (Bashar al-Assad) បានប្រកាសចំពោះមុខសមាជិកសភា ថា លោកនឹងរំដោះទឹកដីដែលបាត់បង់ មកវិញឲ្យបាន។ ប្រធានាធិបតី អាសាដ ប្រកាសដូចនេះ ខណៈដែលកងកម្លាំងរដ្ឋាភិបាលរបស់លោក កំពុងតែបើកប្រតិបត្តិការដណ្ដើមយកទឹកដី ដែលបាត់បង់ទៅក្រុមឧទ្ទាម និងក្រុមជ្រុលនិយមរដ្ឋឥស្លាម នាពេលកន្លងមក។
លោក តន ចាន់រិទ្ធារ៉ា លម្អិតព័ត៌មាន

ថ្លែងក្នុងសភា នៅថ្ងៃទី៧ ខែមិថុនា ប្រធានាធិបតីក្រាញអំណាចរូបនេះ អះអាងថា ស្ថានភាពនៅនឹងកន្លែង គឺប្រសើរជាងស្ថានភាពនៅខែមុន និងកាន់តែប្រសើរថែមទៀត ពីមួយថ្ងៃ ទៅមួយថ្ងៃ។ ដោយលើកឡើងពីជោគជ័យ ក្នុងការរំដោះទីក្រុងប្រវត្តិសាស្ត្រប៉ាល់មីរ៉ា ប្រធានាធិបតី អាសាដ និយាយថា យើងនឹងរំដោះទីតាំងទាំងអស់ ពីដៃក្រុមឧទ្ទាម។ លោក ក៏ប្រាប់សមាជិកសភាដែរថា ទីក្រុងAleppo ដែលកំពុងតែស្ថិតក្រោមការគ្រប់គ្រងរបស់ក្រុមឧទ្ទាម ដែលមានអារ៉ាបីសាអូឌីត និងតួកគី នៅពីក្រោយ នឹងក្លាយជាកន្លែងកប់សាកសពពួកគេវិញ។

ឆ្លៀតពេលនោះដែរ ប្រធានាធិបតីស៊ីរី ក៏បានអរគុណចិន ដែលប្រើសិទ្ធវ៉េតូ នៅក្រុមប្រឹក្សាសន្តិសុខ ដើម្បីរារាំងការដាក់ទណ្ឌកម្មលើស៊ីរី។ តែលោកមិនបានភ្លេចគុណ រុស្សី អ៊ីរ៉ង់ និងក្រុមហេសប៊ុលឡា ដែលជាសម្ព័ន្ធមិត្តដ៏សំខាន់ ក្នុងការការពារអំណាចរបស់លោក និងជួយជាកម្លាំងប្រយុទ្ធ សម្រាប់ជួយរដ្ឋាភិបាលរបស់លោកនោះទេ។ នាពេលកន្លងមក យុទ្ធនាការដែនអាកាសរបស់រុស្សី ក្លាយជាអាវុធដ៏ខ្លាំង ដែលជួយកងកម្លាំងលោក អាសាដ ក្នុងការដណ្ដើមទឹកដីត្រលប់មកវិញ ហើយជាក់ស្ដែង នោះគឺការដណ្ដើមទីក្រុងប៉ាល់មីរ៉ាតែម្ដង។

លើសពីនោះ លោក អាសាដ បានបញ្ជាក់ពីជំហររបស់លោក ក្នុងកិច្ចចរចាសន្តិភាព ដែលគាំទ្រដោយអង្គការសហប្រជាជាតិ។ លោកសង្កត់ធ្ងន់ថា ស៊ីរី នឹងត្រូវគ្រប់គ្រងដោយរដ្ឋាភិបាលរួបរួមមួយ មិនមែនដោយរដ្ឋាភិបាលអន្តរកាល ដែលស្នើដោយក្រុមឧទ្ទាមនោះទេ។ លោក អាសាដ ថែមទាំងបន្ទោសក្រុមឧទ្ទាម ចំពោះបរាជ័យនៃការចរចាចំនួនបីលើក ដែលធ្វើនៅទីក្រុងហ្សឺណែវ ក្នុងឆ្នាំ២០១៦នេះ។

ជម្លោះស៊ីរី ដែលលេចជារូបរាងនៅក្នុងឆ្នាំ២០១១ បានក្លាយជាសង្គ្រាមស៊ីវិលបង្ហូរឈាម និងបណ្ដាលឲ្យមនុស្សជាច្រើនម៉ឺននាក់ បាត់បង់ជីវិត។ វិបត្តិនេះ ផ្ដើមចេញពីឥទ្ធិពលនៃបដិវត្តន៍អារ៉ាប់ ដែលធ្វើឲ្យរង្គោះរង្គើរបបផ្ដាច់ការ នៅអេហ្ស៊ីប ទុយនេស៊ី លីប៊ី និងយេម៉ែន ជាដើម។ ក្រុមឧទ្ទាម ដែលទទួលបានការគាំទ្រពីប្រទេសអារ៉ាប់ខ្លះ និងក្រុមលោកខាងលិច បានប្រយុទ្ធនឹងកងកម្លាំងរបស់លោក អាសាដ ដែលមានទ័ពអាកាសរុស្សី ជាកងជំនួយសំខាន់ ដែលធ្វើឲ្យក្រុមឧទ្ទាម ចុះខ្សោយយ៉ាងខ្លាំង ក្នុងរយៈពេលចុងក្រោយនេះ៕