បញ្ហាសំរាម ៖ អ្នកគាំទ្រយល់ដឹងជាងមុន ប៉ុន្តែមិនទាន់អាចសរសើរបានឡើយ

កីឡាជាតិ

ជាតិ

បញ្ហាសំរាម ៖ អ្នកគាំទ្រយល់ដឹងជាងមុន ប៉ុន្តែមិនទាន់អាចសរសើរបានឡើយ

08, Jun 2016 , 8:19 pm

រូបភាព

ដោយ:

វាជាភាពជោគជ័យមួយរបស់វិស័យកីឡាបាល់ទាត់កម្ពុជា ដែលក្នុងជំនួបរវាងក្រុមជម្រើសជាតិកម្ពុជា និងក្រុមជម្រើសជាតិឆាយនីសតៃប៉ិ មានអ្នកចូលរួមទស្សនាគាំទ្ររហូតដល់ជិត៦ម៉ឺននាក់។ ការប្រកួតដែលធ្វើនៅពហុកីឡដ្ឋានជាតិមួយនេះបានបញ្ចប់យ៉ាងជោគជ័យដោយក្រុមជម្រើសជាតិកម្ពុជាបានយកឈ្នះ ឆាយនីស តៃប៉ិក្នុងលទ្ធផល ២-០។ ប៉ុន្តែក្រោយបញ្ចប់យ៉ាងជោគជ័យជាមួយអ្នកគាំទ្ររាប់ម៉ឺននាក់នេះបានធ្វើឲ្យពហុកីឡដ្ឋានជាតិទាំងមូលបន្សល់ទុកនូវគំនរសំរាមយ៉ាងច្រើនសន្ធឹកសន្ធាប់។

បន្ទាប់ពីមានការសរសេរពាក្យស្លោក«សូមមេត្តាចោលសំរាមក្នុងធុង»នៅតាមរបងពហុកីឡដ្ឋានជាតិគេសង្កេតឃើញថាគំនរសំរាមទាំងនោះត្រូវបានគេច្រកក្នុងថង់យ៉ាងមានរបៀបរៀបរយជាងមុនបន្តិចមិនពាសវាលពាសកាលដូចជំនួបមិត្តភាពអន្តរជាតិជាមួយទីម័រនោះទេ។ ទោះបីជាយ៉ាងនេះកី្ត បញ្ហាធុងសំរាមហាក់ដូចជាមិនឆ្លើយតមទៅនឹងតម្រូវការប្រើប្រាស់នោះទេ ពោលគឺនៅមានចំនួនតិចតួចបំផុត ជាពិសេសធុងទាំងនេះមានទំហំតូចៗទៀតផង ជាហេតុធ្វើឲ្យអ្នកទស្សនាទាំងនោះបោះសំរាមយ៉ាងគរនៅមុខធុងសំរាម។

ទន្ទឹមនឹងនេះ លោកពូម្នាក់សុំមិនបញ្ចេញឈ្មោះដែលកំពុងបោសសំអាតនៅទីនោះបានត្អូញត្អែរចំពោះបញ្ហាធុងសំរាមផងដែរថា៖«ធុងសំរាមវាមានតិចតួចពេក ហើយតូចៗទៀតផង ដូច្នេះមិនវាមិនអាចឆ្លើយតបនៅនឹងប្រើប្រាស់នោះទេ ព្រោះថាពេលមានកម្មប្រកួតអន្តរជាតិម្តងៗមានអ្នកទស្សនារហូតរាប់ម៉ឺនឯណោះ។ ហេតុដូចនេះខ្ញុំចង់ឲ្យអ្នកគ្រប់គ្រងនៅទីនេះដាក់ធុងសំរាមឲ្យច្រើនជាងនេះ ហើយធំៗនេះ។ ទោះបីវាមិនអាចឆ្លើយតបទៅនឹងតម្រូវការទាំងស្រុង ប៉ុន្តែវាគ្រាន់បើជាងនេះ»។

ជាមួយគ្នានេះ អ្នកស្រីម្នាក់ដែលរស់នៅខេត្តកំពតដែលទើបនឹងចូលធ្វើការជាអ្នកបោសសំអាតនៅទីនោះបាន៣ខែបានកត់សម្គាល់ឃើញថា បញ្ហាសំរាមនៅក្រៅធុងនេះមិនមែនជាការបោះពាសវាលពាសកាលរបស់អ្នកទស្សនាទាំងស្រុងនោះទេ ដោយសារធុងសំរាបមានទំហំតូត និងមានចំនួនតិចតួចពេក ជាហេតុធ្វើឲ្យអ្នកទស្សនាទាំងនោះបោះចោលនៅក្រៅធុងដូច្នេះ។ លោកស្រីម្នាក់នេះបានរៀបរាប់ដូច្នេះថា៖«សំរាមនៅក្រៅនេះមិនមែនអ្នកទស្សនាមិនចង់បោះក្នុងធុងនោះទេ ដោយសារតែធុងយើងវាតូច ហើយមានចំនួន វាធ្វើឆាប់ពេញ»។

អ្នកស្រីរូបនេះក៏ដូចជាអ្នកបោសសំអាតឯទៀតបានសំណូមពរដល់អ្នកគ្រប់គ្រងពហុកីឡដ្ឋានជាតិសូមមេត្តាដាក់ធុងសំរាមបន្ថែម និងដាក់ឲ្យធំជាងធុងសំរាមដែលកំពុងប្រើបច្ចុប្បន្ន ដើម្បីបង្ករភាពងាយស្រួលដល់ការសំអាតរបស់ពួកគាត់ ជាពិសេសដើម្បីឲ្យឆ្លើយតបទៅនឹងតម្រូវប្រើប្រាស់។ អ្នកបោសសំអាតទាំងនេះក៏បានសំណូមពរឲ្យបន្ថែមអ្នកបោសសំអាតផងដែរ ព្រោះបច្ចុប្បន្នមានអ្នកបោសសំអាតត្រឹមតែ២០នាក់ប៉ុណ្ណោះ។

ទន្ទឹមនឹងនេះ ពួកគាត់ក៏បានសំណូមពរដល់ទស្សនិកជនដែលគាំទ្រវិស័យកីឡាបាល់ទាត់ទាំងអស់ មេត្តាជួយចូលរួមចំណែកក្នុងការរក្សាបរិស្ថានទាំងអស់គ្នា«បរិស្ថានល្អផ្តើមចេញពីយើងទាំងអស់គ្នា»។ ទោះបីជាមានទស្សនិកជនមួយចំនួនធំបានយល់ដឹងពីបញ្ហាបរិស្ថាន ក៏នៅមានមួយចំនួនតូចដែលមិនទាន់យល់ដឹងផងដែរ៕