អន្តរជាតិ
នយោបាយអន្តរជាតិ
×![]()
ដោយ: តន ចាន់រិទ្ធារ៉ា
កូរ៉េខាងជើង នឹងបើកសម័យប្រជុំសភារបស់ខ្លួន នៅចុងខែមិថុនានេះ បន្ទាប់ពីទើបតែបញ្ចប់សមាជបក្សពលករកូរ៉េ កាលពីដើមខែឧសភា កន្លងទៅ។ កិច្ចប្រជុំសភាលើកនេះ នឹងអនុម័តលើគោលនយោបាយសំខាន់ៗ ក៏ដូចជា អនុម័តលើកាតតែងតាំងមន្ត្រីរបស់រដ្ឋកុម្មុយនីស្តឯកោនេះផងដែរ។
មួយខែក្រោយសមាជកម្រ នៃបក្សពលករកូរ៉េ កូរ៉េខាងជើង នៅថ្ងៃទី៩ ខែមិថុនានេះ បញ្ជាក់ថា សភារបស់ខ្លួន នឹងបើកសម័យប្រជុំ នៅចុងខែមិថុនា។ កិច្ចប្រជុំលើកនេះ នឹងពិភាក្សា លើរបៀបវារៈសំខាន់មួយចំនួន ទាក់ទងនឹងនយោបាយរដ្ឋ ហិរញ្ញវត្ថុ នឹងការជ្រើសរើសមន្ត្រីជាន់ខ្ពស់ ជាដើម។
«កិច្ចប្រជុំលើកទី៤ នីតិកាលទី១៣ នៃសមាជប្រជាជនជាន់ខ្ពស់ នឹងចាប់ផ្ដើមប្រជុំ នៅថ្ងៃទី២៩ ខែមិថុនា»។ នេះបើយោងតាមការផ្សាយរបស់ទីភ្នាក់ងារព័ត៌មាន Reuters ដែលស្រង់ចេញពីសារព័ត៌មានរដ្ឋកូរ៉េខាងជើង KCNA។
ប្រតិភូរាប់រយនាក់ ដែលមកចូលរួមកិច្ចប្រជុំប្រចាំឆ្នាំនេះ នឹងអនុម័តជាផ្លូវការ លើកញ្ចប់ថវិកាជាតិ និងឯកភាពលើការចាត់តាំងមន្ត្រីថ្មីៗ ក៏ដូចជា ការឯកភាពយល់ព្រមលើ ការកែប្រែច្បាប់មួយចំនួនទៀត។ ក្រៅពីនេះ កិច្ចប្រជុំនេះ នឹងក្លាយជាវេទិកា សម្រាប់អនុម័តយល់ព្រម លើការសម្រេចចិត្តនានា របស់ថ្នាក់ដឹកនាំប្រទេសក្រីក្រមួយនេះដែរ។
ឆ្លៀតក្នុងកិច្ចប្រជុំនេះ មេដឹកនាំវ័យក្មេង គីម ជុងអ៊ុន នឹងពង្រឹងឥទ្ធិពលរបស់ខ្លួន ក្នុងកិច្ចប្រជុំសភាលើកនេះ ដែលទំនងជាឯកភាពលើ ការផ្លាស់ប្ដូរតំណែងបុគ្គលមួយចំនួន ដែលចាត់តាំងដោយសមាជខែឧសភា។ លោក គីម ជុងអ៊ុន ដែលទើបត្រូវបាន ជ្រើសតាំងជាប្រធានបក្ស ក្នុងសមាជកម្រខែឧសភា ដែលគេមើលឃើញថា ជាការប្រមូលផ្ដុំអំណាចទាំងមូល មកក្នុងដៃខ្លួនឯងតែម្នាក់។
អ្វីដែលគួរចាប់អារម្មណ៍ក្នុងពេលសមាជនោះ មេដឹកនាំកូរ៉េខាងជើង ប្រកាសថា កូរ៉េខាងជើង ជាប្រទេសនុយក្លេអ៊ែរ ប៉ុន្តែ ខ្លួននឹងប្រើអាវុធនេះ នៅពេលខ្លួនរងការវាយប្រហារមុនប៉ុណ្ណោះ។
ការសាកល្បងគ្រាប់នុយក្លេអ៊ែរ និងបាញ់មីស៊ីល ជាច្រើនលើក ធ្វើឲ្យសហគមន៍អន្តរជាតិ ខឹងសម្បារ ហើយកំពុងតែគៀបសង្កត់ក្រុងព្យុងយ៉ាង ឲ្យគោរពតាមការសម្រេចរបស់ក្រុមប្រឹក្សាសន្តិសុខ។ ប៉ុន្តែ ក្រុងព្យុងយ៉ាងហាក់ដូចជាមិនខ្វល់នោះទេ តែថែមទាំងផ្គើនការហាមប្រាមរបស់អន្តរជាតិ ជាមួយនឹងសកម្មភាពយោធាម្ដងហើយ ម្ដងទៀត។ ជាក់ស្ដែងនោះ កូរ៉េខាងជើង បានបាញ់សាកល្បងដោយបរាជ័យ មីស៊ីលបាលីស្ទិកចម្ងាយមធ្យម កាលពីថ្ងៃទី៣១ ខែឧសភា កន្លងមក។
Tag:
កូរ៉េខាងជើង
© រក្សាសិទ្ធិដោយ thmeythmey.com
