អាមេរិក បញ្ជូននាវាដឹកយន្តហោះទៅសមុទ្រម៉េឌីទែរ៉ានេ ដើម្បីកំញើញរុស្ស៊ី

អន្តរជាតិ

អាមេរិក បញ្ជូននាវាដឹកយន្តហោះទៅសមុទ្រម៉េឌីទែរ៉ានេ ដើម្បីកំញើញរុស្ស៊ី

10, Jun 2016 , 8:39 pm

រូបភាព

ដោយ: តន ចាន់រិទ្ធារ៉ា

សហរដ្ឋអាមេរិក បានបញ្ជូននាវាដឹកយន្តហោះទីពីររបស់ខ្លួន ទៅកាន់តំបន់សមុទ្រម៉េឌីទែរ៉ានេ ខណៈដែល នាវាដឹកយន្តហោះមួយទៀត កំពុងស្ថិតនៅតំបន់នេះស្រាប់។ គេមើលឃើញថា ការបញ្ជូននាវាដឹកយន្តហោះ ដល់ទីពីរគ្រឿង មកកាន់តំបន់នេះ ជាការបង្ហាញសាច់ដុំយោធា ពីសំណាក់អាមេរិក និងសម្ព័ន្ធអឺរ៉ុបរបស់ខ្លួន ទៅកាន់រុស្សី ដែលកំពុងតែបង្កើនវត្តមានទ័ព នៅតាមព្រំដែនភាគខាងកើតជាប់អឺរ៉ុបរួចហើយនោះ។

សូមស្តាប់ការបកស្រាយរបស់លោក តន ចាន់រិទ្ធារ៉ា៖

នាវាដឹកយន្តហោះ USS Dwight D. Eisenhower ត្រូវបានបញ្ជូនទៅដល់សមុទ្រម៉េឌីទែរ៉ានេ នៅថ្ងៃទី៨ ខែមិថុនា ដើម្បីចូលរួមការពារសន្តិសុខអាមេរិក នៅអឺរ៉ុប ដែលរងការគំរាមកំហែង។ មន្ត្រីអាមេរិក អះអាងថា ការពង្រាយនាវាដឹកយន្តហោះ នៅសមុទ្រម៉េឌីទែរ៉ានេ គឺដើម្បីបង្ហាញសាច់ដុំ ដាក់កងកម្លាំងរុស្សី ដែលកំពុងតែពង្រាយយោធារបស់ខ្លួន នៅក្នុងតំបន់អឺរ៉ុបខាងកើត។ នាវាដឹកយន្តហោះនេះ នឹងសហការជាមួយនាវាដឹកយន្តហោះ USS Harry S. Truman ក្នុងប្រតិបត្តិការ នៅតំបន់នេះតែម្ដង។

ជាមួយនឹងការបញ្ជូននាវាពីរគ្រឿងបែបបនេះ មន្ត្រីយោធាជាន់ខ្ពស់ទ័ពជើងទឹកអាមេរិក លើនាវា Truman លោក Bret Batchelder និយាយថា វាជាការពិត ដែលការបញ្ជូននាវានេះ ជាការបង្ហាញកម្លាំង។ ដោយចង់សំដៅដល់រុស្សី លោកបន្តទៀតថា វាមិនមែនជាគួរឆ្ងល់ទេ ដែលមានអ្នកដទៃកំពុងតែតាមដានរឿងនេះ ហើយនេះ ជាការបញ្ចេញនូវ អ្វីដែលអាមេរិក មាន។

ទីបញ្ជាការអាមេរិកប្រចាំអឺរ៉ុប ប្រកាសថា កងនាវាដឹកជញ្ជូនយន្តហោះ USS Dwight D. Eisenhower នឹងចូលរួមក្នុងប្រតិបត្តិការ នៃកងនាវាទី៦ ក្នុងគោលដៅគាំទ្រផលប្រយោជន៍សន្តិសុខអាមេរិក នៅអឺរ៉ុប។ នាវា USS Dwight D. Eisenhower នឹងចូលមកជំនួសកន្លែងនាវា USS Harry S. Truman ក្នុងតំបន់នេះ បន្ទាប់ពីនាវាទាំងពីរ បញ្ចប់ប្រតិបត្តិការរួមគ្នា ពេញមួយខែមិថុនានេះមក។

ការបញ្ជូននាវាដឹកយន្តហោះ មកកាន់សមុទ្រម៉េឌីទែរ៉ានេ ធ្វើឡើងស្របពេលដែល ទំនាក់ទំនងរវាងណាតូ និងរុស្សី មិនសូវជាល្អប៉ុន្មាននោះទេ។ ភាគី ទាំងពីរកំពុងតែបង្កើនសមត្ថភាពយោធារៀងៗខ្លួន ក្នុងតំបន់បាល់កង់។ អាមេរិក និងណាតូ នឹងពង្រាយកងទ័ពបួន អង្គភាពបន្ថែម ក៏ដូចជាប្រព័ន្ធការពារមីស៊ីល នៅតំបន់នេះ ។ ជាលទ្ធផល រុស្សី ក៏ឆ្លើយតប តាមរយៈការបន្ថែមទ័ពមួយចំនួនផងដែរ។

រដ្ឋាភិបាលក្រុងវ៉ាស៊ីនតោន បញ្ជាក់ថា ការបង្កើនវត្តមានយោធានេះ មានគោលដៅពីរ គឺចូលរួមក្នុងយុទ្ធនាការកម្ទេចក្រុមភេរវជនរដ្ឋឥស្លាម និងរក្សាតុល្យភាពអំណាចយោធារុស្សី ដែលកំពុងតែបង្កើនដូចគ្នា។ បើតាមការប្រកាសរបស់ទីបញ្ជាការអាមេរិកប្រចាំអឺរ៉ុប វត្តមាននាវាដឹកយន្តហោះទាំងពីរ បង្ហាញពីការប្ដេជ្ញាចិត្តរបស់អាមេរិក ចំពោះការធានាសន្តិសុខ និងសន្តិភាពអឺរ៉ុប។

១. រុស្សី គ្មានផែនការវាយលុកប៉ូឡូញទេ
ទន្ទឹមនឹងការប្រឈមមុខ កាន់តែខ្លាំងរវាងរុស្សី ជាមួយនឹងសម្ព័ន្ធមិត្តណាតូ-អាមេរិក ប្រធានាធិបតីរុស្សីក៏ ធ្លាប់លើកឡើងថា រុស្សី នឹងវាយប្រហារ ប៉ូឡូញ និងរ៉ូមានី ដែលណាតូ មានគម្រោងពង្រាយប្រព័ន្ធការពារនៅកាន់ទីនោះ។ យ៉ាងណាមិញ មន្ត្រីការទូតរុស្សី អះអាងថា រុស្សី មិនមានគម្រោងវាយប្រហារប៉ូឡូញទេ ហើយលោកចាត់ទុកការយកបញ្ហានេះ មកពិភាក្សា ជារឿងមិនសមហេតុផល និងគ្រោះថ្នាក់។
នៅក្នុងបទសម្ភាសន៍ជាមួយទូរទស្សន៍រុស្សី ប្រេសិតរុស្សី ប្រចាំណាតូ លោក Aleksandr Grushko ក៏បានបដិសេធ អ្វីដែលអគ្គលេខាធិការណាតូ និយាយក្នុងទស្សនកិច្ចនៅប៉ូឡូញ ថា ជារឿងមិនសមហេតុផលទេ។ មិនតែប៉ុណ្ណោះ ប្រេសិតរូបនេះ ចាត់ទុកសមយុទ្ធយោធា របស់ណាតូ ជារឿងគួរឲ្យស្រគៀរត្រចៀក។

ទាក់ទិននឹងសមយុទ្ធនេះដែរ លោក Aleksandr Grushko សង្កត់ធ្ងន់ថា វាជារឿងគ្រោះថ្នាក់ សម្រាប់ណាតូ ដែលធ្វើសកម្មភាពបែបនេះ។ រុស្សី នឹងមិនវាយលុកប៉ូឡូញទេ ហើយការលើកឡើងដូចនេះ គ្រាន់តែជាប្រឌិតរឿង សម្រាប់ឲ្យណាតូ ពង្រឹងនយោបាយ និងយោធារបស់ខ្លួន ក្នុងតំបន់នេះ តែប៉ុណ្ណោះ។

២. រុស្សី នឹងមិននៅស្ងៀម ចំពោះការបង្កើនវត្តមានទ័ពរបស់ណាតូ
អនុរដ្ឋមន្ត្រីការបរទេសរុស្សី និយាយថា វត្តមានកងទ័ពណាតូកាន់តែច្រើន មកកាន់តំបន់អឺរ៉ុបខាងកើត និងតំបន់បាល់កង់ មិនមែនធ្វើឡើងដោយស្រួលគ្មានការតបតអ្វីទេ។ រុស្សី ក៏នឹងពង្រឹងយោធារបស់ខ្លួនដូចគ្នាដែរ។ ក្នុងការផ្សាយរបស់សារ័ត៌មាន RT នៅថ្ងៃទី៣១ ខែឧសភា លោក Aleksey Meshkov ប្រាប់ឲ្យដឹងថា វត្តមានទ័ពណាតូ នៅជិតព្រំដែនរុស្សី កំពុងរំលោភនឹងមូលដ្ឋាន នៃទំនាក់ទំនងរវាងរុស្សី និងអឺរ៉ុប។

កាលពីដើមខែឧសភា រដ្ឋមន្ត្រីការពារជាតិរុស្សី លោក Sergey Shoigu ក៏បានប្រកាសផែនការពង្រាយទ័ពបន្ថែម ជាការឆ្លើយតប នឹងសម្ព័ន្ធយោធាណាតូ។ លោក ប្រកាសថា រុស្សី នឹងបន្ថែមទ័ពពីរអង្គភាព នៅតំបន់ខាងលិច និងមួយអង្គភាព នៅភាគខាងត្បូង សម្រាប់ទប់ទល់កងកម្លាំងណាតូ នៅក្បែរព្រំដែនរុស្សី។ ជារឿយៗ រុស្សីអះអាងថា វត្តមានទ័ពណាតូ និងប្រព័ន្ធមីស៊ីល នៅអឺរ៉ុប និងតំបន់បាល់កង់ ជាការគំរាមកំហែង មកលើសន្តិសុខរបស់ខ្លួន ហើយរុស្សី មិនអាចនៅស្ងៀមនោះទេ៕