កីឡាអន្តរជាតិ
អន្តរជាតិ
×![]()
ដោយ: តន ចាន់រិទ្ធារ៉ា
បន្ទាប់ពីមានអំពើហិង្សារវាងអ្នកគាំទ្រក្រុមជម្រើសជាតិអង់គ្លេស និងក្រុមជម្រើសជាតិរុស្សី ក្នុងការប្រកួតពានរង្វាន់កីឡាបាល់ទាត់ទ្វីបអឺរ៉ុបប្រចាំ ឆ្នាំ២០១៦ អាជ្ញាធរបារាំង បានស្នើឲ្យទីក្រុងម្ចាស់ផ្ទះ ហាមឃាត់ការប្រើប្រាស់គ្រឿងស្រវឹង នៅក្បែរកីឡដ្ឋានប្រកួត និងនៅតាមទីតាំងសម្រាប់ក្រុមអ្នកគាំទ្រ។ 
រដ្ឋាភិបាលបារាំង នឹងរឹតត្បិតការប្រើប្រាស់គ្រឿងស្រវឹង នៅក្នុងទីក្រុងដែលជាម្ចាស់ផ្ទះ នៃការប្រកួតពានរង្វាន់ទ្វីបអឺរ៉ុបប្រចាំឆ្នាំ ២០១៦ បន្ទាប់ពីការកើតឡើងការប៉ះទង្គិចរវាងអ្នកគាំទ្រ និងប៉ូលិស នៅឯទីក្រុង Marseilles។ ការរឹតត្បិតនេះ ជាចំណាត់ការបន្ទាន់របស់រដ្ឋាភិបាលបារាំង ដើម្បីរារាំងការកើតឡើងអំពើហិង្សា នៅពេលខាងមុខ ខណៈស្ថាប័នគ្រប់គ្រងកីឡាបាល់ទាត់អឺរ៉ុប កំពុងតែស៊ើបអង្កេតចំពោះអំពើហិង្សានេះផងដែរ។
រដ្ឋមន្ត្រីមហាផ្ទៃបារាំង លោក Bernard Cazeneuve អះអាងថា លោកនឹងចាត់វិធានការចាំបាច់ទាំងអស់ ដើម្បីហាមឃាត់ការលក់គ្រឿងស្រវឹង ការប្រើប្រាស់ និងការដឹកជញ្ជូនគ្រឿងស្រវឹង ទៅកាន់តំបន់មួយចំនួន នៅថ្ងៃប្រកួត ព្រមទាំងនៅថ្ងៃ ដែលកន្លែងជួបជុំសម្រាប់អ្នកគាំទ្រ ត្រូវបានអនុញ្ញាតឲ្យចូល។ លោក Cazeneuve បន្តថា ការហាមឃាត់ ក៏នឹងរួមបញ្ជូលទាំងកន្លែងសាធារណៈ និងហាងលក់ដូរផ្សេងៗជាដើម។ ជាមួយគ្នានោះដែរ មន្ត្រីប្រចាំតំបន់ ក៏អាចហាមឃាត់បារ និងហាងកាហ្វេ ពីការលក់ នៅខាងមុខហាង ផងដែរ។
យោងតាមការផ្សាយរបស់ BBC ទាក់ទងនឹងការប៉ះទង្គិចនៅទីក្រុង Marseilles រដ្ឋមន្ត្រីមហាផ្ទៃបារាំង និយាយថា អំពើហិង្សានេះ មិនអាចទទួលយកបានទេ។ ពោល គឺមិនអាចទទួលយកបានទាំងអាជ្ញាធរ ទាំងសង្គមបារាំង និងជាពិសេសនោះ គឺអ្នកស្នេហាវិស័យកីឡាបាល់ទាត់តែម្ដង។
ការហាមឃាត់នេះ ធ្វើឡើងនៅក្រោយការប៉ះទង្គិចរវាងក្រុមអ្នកគាំទ្រជម្រើសជាតិអង់គ្លេស និងក្រុមជម្រើសជាតិរុស្សី នៅថ្ងៃទី១១ ខែមិថុនា។ អ្នកគាំទ្រប្រទេសទាំងពីរ បានប៉ះទង្គិចគ្នាមុនការប្រកួតម្ដងរួចទៅហើយ។ ប៉ុន្តែចលាចល ក៏កើតម្ដងទៀត ក្នុងទីក្រុង Marseille ក្រោយអង់គ្លេស និងរុស្ស៊ី បញ្ចប់ក្នុងលទ្ធផលស្មើ ១-១ នាការប្រកួត Euro ឆ្នាំ២០១៦ ។
យ៉ាងណាមិញ នៅឯទីក្រុងLens ជាទីតាំងការប្រកួតរវាងក្រុមជម្រើសជាតិអង់គ្លេស និងវែល នៅថ្ងៃទី១៦ ខែមិថុនា អាជ្ញាធរបារាំង ក៏បានហាមឃាត់ការលក់គ្រឿងស្រវឹងរួចហើយដែរ។ ចំណែកឯ អ្នកគាំទ្រ ដែលមិនមានសំបុត្រសម្រាប់ចូលទស្សនាក្នុងកីឡដ្ឋាន ឬចូលតំបន់សម្រាប់អ្នកគាំទ្រ ត្រូវបានប្រាប់ មិនឲ្យធ្វើដំណើរនោះទេ។
សូមបញ្ជាក់ថា ការប៉ះទង្គិចគ្នាក្រោយការប្រកួតរុស្ស៊ី-អង់គ្លេស បានបណ្តាលឲ្យអ្នកគាំទ្រអង់គ្លេសមួយចំនួនត្រូវបញ្ជូនទៅកាន់មន្ទីរពេទ្យ។ នារយៈពេលបីថ្ងៃចុងក្រោយនេះ គេក៏សង្កេតឃើញថា អំពើហិង្សាបានកើតឡើងជាប់គ្នារវាងក្រុមអ្នកគាំទ្រជម្រើសជាតិអង់គ្លេស និងក្រុមអ្នកគាំទ្រជម្រើសជាតិផ្សេងទៀត រួមទាំងប៉ូលិសផងដែរ។ អង្គភាពកីឡាបាល់ទាត់ប្រចាំទ្វីបអឺរ៉ុប ក៏មិនទាន់ប្រកាសដាក់ពិន័យជាផ្លូវការណាមួយឡើយ ដោយពួកគេគ្រាន់តែព្យាយាមអំពាវនាវឲ្យមានការស្ងប់ស្ងៀមប៉ុណ្ណោះ៕
Tag:
បារាំង
Euro 2016
© រក្សាសិទ្ធិដោយ thmeythmey.com
